一個中五女學生的故事: 5
「唔知啊，未諗到住，諗到話你知。」呢一刻我地兩個仍然都係被曖昧既氣氛包圍住。
「好啦」我回應。
食完野又周圍行下，睇下衫、飾物，又買下化妝品、隱形眼鏡，然而當我每買完一樣野，Figo都會好順手咁幫我拎，所以佢手上係一袋二袋。
「我自己拎返啦，麻煩到你唔好既。」我有點唔好意思。
「唔緊要啦，好輕姐，我幫你拎啦。」Figo又推搪，無理由繼續糾纏係呢啲小問題上。
「出黎行街搞到你變左啊四添。」都係有啲唔好意思，但都係繼續由佢幫我拎。
「傻妹，幫女仔拎野應該既。」講完就係摸頭殺，我竟無言以對。
「係wor，今晚有朋友問我去唔去飲野，你。。。有無興趣一陪我去？」Figo問我。
「um。。。全部你啲朋友，我一個女仔係到好咩？」雖然私底下蒲開，呢啲場合都唔係未去過，但都要問下既，始終係外面同係學校都要有啲分別。
「唔緊要架佢地，而且有男有女，我都會take care你架嘛。」Figo似乎幾想去。
「好啦，見你好想去咁，陪你啦，係邊架間野？」睇下係咪平時去開個啲場，打定個底。
「老蘭Rexa H」Figo好似好開心咁。
好似都去過幾次？應該唔會撞到熟人掛。。
「ok，但係我咁樣落老蘭好咩。」平時去蒲就算咁樣著，個妝都會濃返少少。。
「無問題啦，唔洗補妝啦我覺得幾好睇啊。」話雖如此，我都係唔係好慣，不過淡妝都無話唔可以去蒲既~
「咁幾點去？」落得老蘭都唔會係好早掛。
「好似九點半。」Figo睇一睇手機confirm下。
「咁我地食埋野先過去。夜晚食咩？」我正式係今餐未落格就諗下餐。
「哇你啱啱先食完野咁快就問下餐。」Figo都係驚訝。
「頭先你都有份食架wor，你都唔會係好飽掛。。」大家share食都係墊下肚姐，唔會飽得去邊掛。
「咁又係，你有無咩想食？」Figo都係問我意見先。
「壽司好無？」我問。
「元氣？」Figo提出意見。
「好啊。」
7p.m.
「行左咁耐去食野咯好無？」Figo問我。
「好啊，你想過去港島個邊食，定係係呢邊食完先過去？」我問Figo。
「um，過去港島個邊先食好似無咁麻煩，好無啊？」
「好啊，我都覺得咁樣好啲」
「ok go go go！」佢好似好興奮咁。
七點鐘既港鐵依然係咁多人搭，尤其港島綫，個個就好似行尸走肉咁，低頭玩手機、睇手機，而唔係睇人，然後就人撞人，好啲既會say sorry，唔好既直接行走，
甚至根本唔知自己撞到人。
Figo應該係見到人山人海，所以一直企係我後面行，再搭住我膊頭。
「咁樣就唔怕你走失啦。」佢微笑咁講。
「又唔係小朋友，點會走失啊，最多咪約係一個地方等。」我笑笑口。
「我唔想你離開我視綫。」佢拉一拉停我，係耳邊講，有點曖昧既感覺。
「我返屋企個陣咪唔係你視綫囉，你唔係要跟埋返去掛。」我繼續笑笑口講。
「唔係跟，係送，我會送你返屋企既。」
終於上到車，但仍然好多人，所以Figo仍然都係企係我後面搭我膊頭，我就低頭玩手機。
「唔好玩手機啦，咁樣好無交流啊。」佢有啲唔開心扁嘴咁，想象下一個高大既男仔扁嘴。哈哈
「無野做咪睇下囉。」我笑笑口。
「咩無野做啊，同我傾計咪有野做囉。」佢有啲小生氣咁講。
「好喇好喇，成個小朋友咁。」我笑住咁講。
「嘻嘻。」佢真係成個小朋友咁。
「下一站中環。Next Station Central.....」
「到喇下站。」我都鬆開左佢搭住我膊頭既手。
「架車都未停定你咁心急陣間因住仆親啊。」佢講完我真係差啲仆，我即刻捉住左扶手，而Figo都扶住左我。
「都話左你架啦，唔聽我講啊拿。」佢輕輕力拍我個頭。
「哎呀，你唔好打我個頭啦。」我摸返順自己啲頭髮。
「邊個叫你唔聽我講野，好在我係隔離扶住你，下次你就真係仆親架喇。」Figo好着急咁講。
「唔洗咁緊張既，我又唔係斷脚。」我開玩笑講。
「我認真架。小心啲啦。」咁認真我點應你大哥。。
「係喇係喇。」一路講一路準備扶電梯扶手。
「你扶我只手啦，無咁污糟啊。」費事佢又哦我，所以就捉住左佢只手。佢對住我微笑，曖昧既感覺。
7.15 p.m.
「睇黎都要等好耐wor。」食元氣閑閑地都要等半個鐘至九個字。
「唔緊要，就算我地等間遲少少過去都無所謂架，唔洗急架傻妹。」
「下..但係遲到唔係要罰飲既咩。。」普通遲過去梗係無問題，一般飲酒遲過去要自隊三杯先嘛。
「欸你又知要罰飲既，之前有出去飲過？」Figo問我。
「咁點都會去過呢啲聚會既，所以知少少。」心虛到呢，明明成日去玩。
「唔係蒲開既話我會幫你頂既放心。」原來諗住幫我頂酒。
「哦唔緊要既，少少我都ok既，可以唔洗幫我頂。」蒲開有咩可能咁容易臨低。
「唔得，唔可以俾你醉。」Figo堅決咁講。
「驚抬唔到我返去？哈哈。」
「唔係，係我唔想你醉姐。女仔通常唔想俾人見到醉個樣。唔係咩？」Figo問。
「你又唔好諗到我飲兩杯就醉咁誇張，我飲過都大約知自己去到邊既，放心。同埋有你係到嘛，都唔洗擔心，我信得過你。」我唔係信得過佢，只係我唔會咁快醉同埋就算佢想食我既話，我最多扮醉，第二日訓醒扮咩都唔記得。
「好啦，如果你陣間真係唔ok就叫我幫你頂啦。」佢都係想幫我頂酒，我就睇下你有幾多斤兩~
「93號兩位。」店員嗌到我地既號碼。
「入去啦。」我拉住佢跟住店員行。
「QR code點餐就得架喇。」店員講完就行開左了。
「睇下想食咩先啦。」Figo scan完code之後遞部手機俾我揀野食。
【Fiona: 今晚你會黎？】
Figo即刻禁走個message，好似唔想俾我見到咁。
「你個friend？」我問一問佢。
「呃...係啊。」佢有啲口窒咁。
「做咩啊，你好驚佢咩？」我笑笑口問佢。
「唔係既。。」Figo好似有口難言。
「佢對你有野？」我一路問一路點我要既野食。
「係。。」o~I get it.
「即係你對佢無興趣啦。咁我明啦，想揾我陪係揾我做擋箭牌既原來。」我笑笑口咁講。
「我真係想你陪我一齊去架。」佢急切想解釋，我笑左笑無俾反應。
「你信我啦。。我真係唔係揾你做擋箭牌。。。」佢好似好無辜咁。
「係係係。知道喇。」都唔知笑佢定唔笑好。
「係咪架好似hea我咁既。」佢繼續無辜辜咁，sorry我真係好想笑，但係因爲覺得佢幾cute。
「唔係hea啊，食野先啦小朋友。」我笑住咁講。
「好啦。」乖乖地食野咪幾好。
我地一路食一路傾下計，又嗌下野食咁，好快就食左個幾鐘。
8.30 p.m.
「呢個時間食完啱啱好，呢到慢慢行過去老蘭既話半個鐘都係到到既。」
「食飽慢慢行過去都好，消化下。今餐幾錢？」我問。
「唔洗啦，我俾得啦。」Figo又提出佢請食飯。
「次次都你請，俾次機會我aa好無。」我都係笑笑口講。我都幾常笑笑口講野。
「um。。好啦你俾100得喇其他我俾啦。飲酒個度我叫你去既自然係幫你俾，呢個真係唔好同我爭喇。」酒錢男仔俾好正常既，唔俾啲女都唔睬你啦，雖然我同佢係同學，
但正常都要返啲面既。
**溫馨提示：各位男性想溝女真係唔可以勒住荷包，該俾既都係要俾。
我俾左張一百蚊佢。然後企係門口等佢俾完錢出黎。
「行得喇。」然後我跟住佢行。雖然我都算識路，但話曬都唔好俾人覺得我好熟先係。
9 p.m. Rexa H門口。
「喂你地係邊？哦好啦我地直接行入去揾你地。」Figo wts問佢啲friend。
「佢地入左去拎枱喇，我地直接入去揾佢地啦。」講完佢就拖起我只手行。
蒲過都知道Club場既bomb bomb聲係蓋過曬人聲，入到去講野基本上係大嗌都未必聽到。
「喂！Figo！呢邊啊！」Figo啲朋友揮手叫佢。
「喂！真係帶左女朋友過黎wor，幾時開始架？」What？！
「行埋左一陣未講姐，宜家咪帶俾你地見囉，我女朋友Scarlett。」Figo答完之後，我蚊左佢去一邊。
「點解會變左你條女架？？？」我一路用手機打字問佢，一邊黑人問號。
「我同佢地講今晚我帶埋條女黎。。你介意我咁講？」Figo問。
「如果係幫你解圍既我無所謂，但你講聲嘛，陣間無配合到你穿煲就唔好啦。」心諗：樣衰啲我都唔幫啊。
「咁即係之後都可以叫你扮我女朋友？」Figo驚訝。
「幫到咪幫囉，我又唔會少忽肉。」我無所謂，見係佢。
「喂你捨得返黎未啊，洗唔洗俾你搞埋野先返黎啊。」佢啲朋友問。
「屌你唔撚洗啊。」講完我地就過返去坐低開始斟酒飲。
「啊嫂你飲唔飲得啊？猜枚啊不如。」Figo既朋友問我。
「少少都ok啊，仲有Figo啊嘛。」
「佢飲唔到咪我幫佢頂囉，實頂到架。費事你恰尻我條女，我都係傍住佢好啲。」Figo坐係我隔離睇住我同佢啲friend猜枚。
猜枚都ok既，又唔係唔飲得，又唔係猜得屎。
「五！」
「收曬！ 飲！」我贏左。
「啊嫂好野，再黎！」佢朋友飲完就繼續猜枚。
「啊嫂你都幾勁，我唔信我贏你唔到！」我連贏左幾舖，話曬都蒲開。
「好~繼續囉。」
「啊嫂我真係唔夠你玩，咁勁既你。平時有無出黎玩開？」Figo朋友問我。
「無啊，佢無出黎玩開架，所以你地唔好恰佢啊，有咩等我頂。」Figo係我未開口就先搶住代我講。
「係去過下啲聚會姐。」我再答。
「哇！咁都幾勁wor，唔講以爲啊嫂你蒲開，猜枚咁勁。欸，我個邊有朋友嗌我，我揾個人過黎陪你地玩住先，轉頭返黎繼續飲，等我啊你兩個。」講完佢就行開左。
「好啊。」講完我同Figo就揮手示意。
「Hello啊嫂。第一次見，我叫啊Tim。一齊傾下計，Figo一齊啊。」Tim過黎打招呼。
「你唔好溝酒飲啦，我驚你醉。」Figo叮囑。
「哦~唔緊要，我無咁快醉，我想飲champagne。」我示意叫Figo幫我斟杯香檳俾我。
「好啦咁，但你唔可以再溝第三只酒喇。」佢再三叮囑。
「知道喇。」
「你地點識架？行埋左幾耐啊。」Tim問。
「我地同學黎。一齊左個幾月。」我答。
「哇！個幾月就帶出黎，Figo睇黎今次好認真wor。」Tim咁講，即係Figo之前好多女，但就無承認過係女朋友，不過唔意外。
「講呢啲，唔同人會擦出唔同火花，Scarlett同其他人唔同。」Figo辯解。
「佢講得啱啊，唔同人一齊有唔同既結果。」我附和佢。
「喂，但你知唔知今晚Fiona都會黎..oops。」Tim意識到自己講多左。
「哦，我知道啊，Figo有同我講。」我回應。
「啊？！啊嫂你唔介意？」Tim問。
「咁Figo揀左我，你都明咩事啦係咪先。」我笑笑口講。
「啊嫂真大方，又對自己有自信，勁！」Figo都唔係我男朋友都無咩大唔大方。
「講呢啲，你地飲住先，我去去toilet。」我起身行去厠所。
「我陪你去啊。」Figo諗住起身跟埋我去。
「唔洗啦，你陪你啲friend啦。」講完我就行走左。
行去厠所排隊個陣見到有條女望住我，條女我唔識，但Club場你眼望我眼都好正常，所以我無理。
去完厠所之後。
「你就係Figo佢地講個條女？」三條女企係我面前擋住我去路。
「你係？？」講得出Figo個名應該都係識佢，唔會係佢地講個個Fiona掛。。。
「我只係想講，唔好再痴住Figo。」帶頭個條女警告我。
「你係Fiona？」我問。
「唔係，我係佢朋友，Fiona唔識講就我幫佢講。佢追緊Figo，我唔希望有任何事、任何人妨礙到佢。」帶頭既女仔繼續發出警告。
「我知Fiona中意Figo...」
「啪！」