一個中五女學生的故事: 7

「男人老狗咁um尋架你。」我雙手依然係捧住佢塊面。
「因爲我唔放心你。。」佢捉住我隻手，含情脈脈咁望住我講。我望住佢傻笑，飲醉酒同平時真係好大反差，平時唔會做、唔敢做既野，飲醉都會表露無遺，當然酒醉三分醒，
借醉行凶就係咁解。
「嘻嘻~」傻笑完我就推開佢，坐返起身。
「喂喂喂你做咩啊！」
「除衫囉」
「我夠知你除衫，我意思係你做咩無啦啦除衫啊。」
「啲衫污糟啊，唔除點訓啊。」我半撒嬌既語氣回應佢，除剩件背心就捐返上床訓。至於佢之後點我就不得而知。





星期日早上。


一陣香味撲鼻而來，聽到厨房有人煮緊野食，唔通阿媽過左黎？我行去鏡前面望一望，嘩屌！鬼都好過我，咁既樣俾老母見到一定問我琴晚去邊、搞咩黎，
拿拿林揾啲卸妝水抹乾净塊面，琴晚直接訓教妝都無落，爛面都似，換返件居家睡裙，跟手攝手攝脚行去洗手間梳洗。
呼~終於似返個乖乖女樣。
「你醒啦，去洗面跟住過黎食早餐啦。」點解佢仲係到既。。。？
「你。。點解仲係我屋企。。。」我呆左企係到問佢。
「琴晚我見你好幾次差啲仆親，驚你半夜起身唔知會唔會又有咩意外發生，我咪一直都無走，今朝見你未訓醒咪借你條鎖匙落去買啲野煮早餐你食。」啊。。成晚都係我屋企。。


「我地。。無做啲咩。。啊嘛。。」我又唔係驚佢搞我，係無估到佢無走到姐。
「無啊無啊！我無對你做啲咩架！我琴晚訓廳架咋！我發誓！你信我啦！」佢竪起三隻手指。
「得得得，見你煮埋早餐，琴晚又送我返黎，信你啦。」我笑住咁捉住佢隻手阻止佢發誓，見佢面上洋溢住笑容，我又鬆開返隻手。琴晚咁好機會佢都無搞我，真係咁君子？

「快啲去洗面食早餐啦。」佢催促我去梳洗。
「頭先你係厨房煮緊早餐個陣已經去左。」
「點解我唔知既？」
「因爲我以爲係我媽過左黎探我，所以我靜鷄鷄行去厠所。」
「點解啊媽係到要靜鷄鷄去厠所？」
「費事佢見到我鬼咁樣問長問短。」


「噢，飲杯暖水先啦，琴晚飲左咁多酒有無頭痛頭暈個啲啊，洗唔洗買解酒丸俾你？」佢個嘴無停過。
「有少少頭暈不過唔算好嚴重。」我坐係凳，拎起杯水飲。
「唔知你中唔中意食呢啲做早餐。」佢煮餐肉煎雙蛋，仲有片牛油多士，就好似大家樂個啲咁。
「ok啊，煎午餐肉配太陽蛋唔錯啊，隻蛋煎得幾靚wor。」我都幾中意呢個配搭，平時返學都係三文治配牛奶、豆漿或者咖啡，配牛奶係清腸胃，豆漿就係唔洗清腸胃個陣，
咖啡就提神。今日食個分開擺既版本，雖然無咖啡，但簡簡單單已經好chill。
「你中意就好。」佢再次面帶微笑。
「係wor，你宜家係咪素顔，比起平時清純。」唔記得左自己係素面朝天。。。雖然素顔唔算嚇人，但平時始終都係化開妝見人，而且好耐無人見過我全素顔。
「啊，係咩。」平時化淡妝返學嘛。


「你擺低啲野等我洗啦，你去休息下。」
「買又係你，煮又係你wor，我洗啦。」
「咁你唔舒服嘛，乖啦去梳化坐低休息下。」
「咁你洗完話我知啦，我擺返好啲野。」
「唔洗喇你乖乖地去梳化坐，睇下電視啦，啲碟我記得放係邊。」佢拉我去梳化坐低。呢一刻覺得佢都幾體貼、幾warm。



我開電視禁Netflix，去追我套Lucifer，套戲既男主角係有能力令人向佢講出心欲望既魔王，但係一個非常幽默既地獄主人。如果現實生活入面真係一個咁既人，我都好想知我真正既欲望係乜嘢。


「欸，你都有睇呢套美劇？」Figo洗完碗出黎。
「係啊，你又有？」大家都追埋同一套美劇。
「有啊，不過呢集我睇左了。」佢坐左係我隔離。
「拿你唔好劇透啊。」我望住個電視應佢。
「係既係既。你今日就乖乖地留係屋企休息啦，唔好周圍去喇，如果唔係聽日返唔到學啊。」Figo再三叮囑我叫我好好休息。
「咁又係啊，唔舒服我就唔返架喇。」返少一日唔會甩好多進度既。
「唔好唔返學啊。」
「點解？係wor宜家我坐你隔離，上堂無人陪你會好悶。」
「呢個都係其次，你有無唔舒服重要過我悶唔悶。」我暫停左望住佢。

好多時女仔就係因爲呢啲説話覺得窩心，甚至感動，而無可否認既係我都有感覺到被關心既感覺，


以前我都可能會諗多左、被呢啲説話俘虜左，但宜家我視呢啲係朋友既關心。

「呃。。既然你宜家無野，咁我返屋企先喇，聽日見啦。」佢打破左互望既尷尬處境。
「嗯，好啦，返去小心啲。byebye」我送佢出門口。


Figo走左之後又係自己一個係屋企既時間，繼續播Netflix。男主角每次都會問人'What's your truely disire?'

我既欲望、我想要既又係咩？