一個中五女學生的故事: 11

「喂你做咩啊！」當我以爲只剩低絕望既時候，有人發現呢個陰暗處發生緊既事，拯救左我呢個絕望無助既靈魂。呢個人好快跑左過黎扯開Vincent，然後一拳打左落去。
「人渣打得少！」Vincent俾人禁落地下一拳接一拳咁打，我依然只係識驚，靠係墻邊唔識郁。微弱既燈光照落係佢地身上，我發現原來救我既人係Alex。
「我話俾你聽你坐撚梗！」佢打到Vincent訓係地下流曬血，無力反抗、逃走，然後攞出手機報警。

「Scarlett！發生咩事！」Figo黎到後巷，見到我衣衫不整，即刻除左件裇衫嬲住我，我個腦依然一片空白，唔識講野，只有不自覺流下既眼淚。
「佢頭先差啲俾呢條仆街强奸，好彩我去完厠所經過見到，唔係都兇多吉少。我已經報左警，宜家等警察黎拉呢個仆街。」
「仆街！」Figo都忍唔住打多Vincent幾拳。
「宜家無事了唔洗驚。」佢攬住左我，但我情緒依然未穩定，仲係係恐懼之中。

「我地宜家懷疑你同一宗意圖强奸案有關，唔係事必要你講，除非你想講，但你所講既野我地將會記錄低，將來可能成爲呈堂証供。」警察黎到將Vincent鎖上手扣帶走。




「李小姐我地建議你去醫院驗一驗傷，方便我地攞到證據去調查呢宗案件，我地會問清楚醫生，睇下你既情況適唔適合同你錄份詳細口供。你需唔需要通知屋企人？」
Figo知道我心情仲係好驚，所以係我隔離陪住我、攬住我。
「唔洗。。」我唔想驚動daddy媽咪。

「黃生，你係目擊證人，我地都會同你錄返份詳細口供。」
「無問題。」Alex跟左警察返警署落口供，Figo就陪我上左救護車去左醫院兼簡單錄份口供。

去到醫院，醫生幫我驗左傷，認爲我情緒稍為穩定返，可以錄口供。
「李小姐，醫生同我地講你宜家既情況適合錄口供，所以我地宜家會帶你返警署。」
「嗯..」




「我陪你。」
「另外我地都要同林生你錄份口供。」
「無問題。」



「多謝你既合作，人証加上醫生專業既驗傷報告，相信好大機會可以告得入，李小姐你放心，呢啲人我地唔會放過，有咩消息我地會再通知你。稍後我地會有人同你辦手續，
跟住就可以離開，需要你上庭作供我地會再通知你。」搞左咁耐終於差唔多完結。
「唔該曬。」
「係咪走得喇？」Figo見我出黎即刻衝上前。




「仲有少少手續。」
「嗯，我陣間送你返去，宜家都就黎天光。」
「唔洗返學咩？」
「你唔記得喇？星期二教師發展日啊。你可以留係屋企休息。」
「嗯。」

搞掂曬所有手續，Figo陪我搭的士返屋企。


「我到了。」
「嗯。」我心入面仲係有啲不安，企左係門口一陣。

「不如你留低陪我。。」沉默數分鐘，我將呢句説話講出口。
「好。」
入到屋，我擺低曬所有野，癱軟咁坐係梳化，生理上如釋重負，但心理依然有一塊大石壓住，壓得我講唔出一句説話。




「飲杯水先啦。」Figo去斟左杯水俾我。我雙手握住個杯，而佢亦都見到我手仲係輕微震緊。
「無事架喇，有我係到。」坐係隔離既佢攬實左我，一邊撫摸我頭，而我亦都挨左係佢身上，流下無聲眼淚。

佢聽到到我抽泣，鬆手望一望低頭既我，見到我對眼紅曬，仍然有眼淚係眼眶打轉，面上亦有淚痕。佢伸手幫我抹走眼淚，眼裏全是心痛、憐惜。但無出聲阻止我喊，
而係繼續攬實我。而我亦都係擁抱、哭泣同疲倦下，係佢既懷抱訓著左。

唔知訓左幾耐，醒左之後，心情終於平復返啲。
「你醒喇？」
「宜家幾點啊？你。。無訓過？」啱啱醒既聲音聽上黎十分慵懶，見到佢既姿勢無乜點變，估計佢應該一直維持左相約既姿勢好耐。
「都有恰左一陣既。宜家三點半，你肚唔肚餓啊？我落去買啲野你食？」佢準備起身。
「唔好走。。。」我攬實左佢，我驚自己一個人留係屋企，唔想佢走。
「好好好我唔走，唔買唔買。」佢攬住我、摸住我頭安撫我。
「係到煮就得，屋企有材料。。。」我依然無鬆開手。
「好好好。」





佢簡簡單單煮左個面俾我，我勉强食左幾啖就唔想再食。
「無胃口？」
「嗯。」
「咁我幫你食埋佢啦。」我點頭。
「你呢一排。。可唔可以陪住我？」我猶豫左一陣講左出黎。
「可以啊。」
「我意思係。。。搬過黎。。陪我住。。」
「咳..咳.咳...」佢逐親。
「你無事啊嘛。。。」我拍拍佢背脊，遞杯水俾佢。
「無事。。。其實。。我都有咁諗。。因爲我擔心你自己一個係屋企唔知會做啲咩。」
「嗯，但你屋企人呢？唔會話你？」
「佢地唔理，放心。陣間我返去執啲衫就返黎好無？」
「嗯。。但我可唔可以跟埋去。。？」
「um。。。好啦，雖然好快，但我都唔放心你自己一個係屋企，即使係一分鐘。」
「嗯，咁我去冲個涼先。」




「好啊，慢慢都無所謂。」
「嗯。」

企係厠所鏡前面望住自己既倦容，琴晚既妝基本上甩曬，卸妝一抹更顯倦容、憔悴。熱水從頭淋，將大部分既疲倦同不安冲走，十分舒暢。洗頭水、冲涼液既香味，
亦緩解到我心中既壓力。冲完涼就好似重獲新生一樣，但始終唔係一時三刻可以完全驅散心中既夢魘。

冲完涼打開浴室既門先發現自己唔記得攞毛巾同衫。。。

「可唔可以去窗邊攞條毛巾俾我。。」我同厠所門外既佢講。
「下。。。咁我擰孭面俾你啦。。」

等左一陣，佢就敲門。我打開門，佢伸左隻手入黎。
「唔該。欸，我唔記得拎衫。。。」
「咁。。我幫你拎？」
「你唔知係邊架喇。。我自己黎啦。」




「咁我宜家要面向邊到？」
「你面向大門得架喇。」
「你可以出黎喇。」
我包住毛巾就行左出去，見到佢面住道門，完全唔敢郁。
「我入左房喇。」我急急脚入左房。
「嗯嗯。」

我求其揾件黑色衫褲就著左上身，無化妝、無戴con，只有素顔同眼鏡。出去廳唔見佢係到，就去左厨房，果然。。
「我洗埋隻碗去個厠所就得。」佢應該係聽到我既脚步聲。
「搞點~」係佢擰轉黎個下我望住佢。
「做咩啊？」佢抹乾手之後摸住我個頭，語氣、眼神都好溫柔。
「無野。。。」我微微低頭。
「等我去埋厠所就行得架喇。」
「嗯。」

我坐係梳化呆等佢。

「行得喇，我返黎先再冲涼。」
「欸，等等。」我係門側邊既櫃拎左個口罩出黎。
「做咩戴口罩？你唔舒服？」