《我本歷史書冇咗2019年》: 質疑?

二、
「吓，你哋憑咩拉我啊？」「鄭生啊，差佬係大晒㗎啦，你再嘈我開槍都得啊！」我聽都呢句唯有死死氣跟住佢哋。到咗差館門口，唔知點解有一個阿叔，一個阿嬸望實我，佢哋嘅眼神唔係擔心，又唔係厭惡。唉，我都係顧返自己呢單嘢先啦。。。啲警察先鎖咗我入一間房，過咗好耐好耐，終於有個著西裝嘅人入咗嚟。「係咪鄭凱基？」「係」「你知唔知質疑政府好大罪㗎，一等公民如果質疑政府都要終身監禁㗎？更何況係你呢啲二等公民？一經定罪，槍斃你都得啊！」我聽到之後，嚇到開始流冷汗。「我冇質疑過政府喎。」我只可以細細聲講出呢一句。「咁我問你，做咩無端端search 2019年？」「我.....我想知點解冇2019年啊麻....」「政府話冇就冇啦，點解要同你講原因，你邊個啊？不過政府係慈悲嘅，見你係初犯，你寫封悔改書，加簽張認罪書，我哋就唔起訴你。」「我簽我簽。」聽到呢到，我鬆咗一口氣。過咗3、4個鐘，我終於搞掂晒所有嘢，由差館出返嚟，天色都開始黑啦。突然，我今朝見到嘅嗰個阿叔同阿嬸企咗係我前面。「後生仔，一路行一路講，啲差佬同你講咗啲咩？」「你哋係邊個啊，我唔想比人槍斃啊！走開啦。」佢哋唔單止冇走開，仲捉住我，個阿叔同我講：「係嘅，我哋都應該介紹自己先，我叫Sunny,佢係Creamy,我老婆。我哋宜家點講你都唔會明，總之如果你信我哋，你聽日唔好食嗰個咩維生素，用呢個電話打俾我，我會話你聽點做。」說罷佢塞咗個黑色嘅盒俾我，「痴線㗎你？」說完，我就跑走咗。
「Sunny,你覺得佢會唔會打過嚟？」「佢拎走部電話已經完成咗第一步」「咁如果佢唔打嚟點算？」「Creamy,你樂觀啲啦！佢唔打嚟，我哋咪再搵佢，佢暫時係唯一一個有抗體，有可能戒到藥嘅人，希望佢會打嚟啦...」
-未完待續

最後，講返一句-本故事純屬虛構，如有雷同，純屬巧合，請勿對號入座，敬請留意，謝謝。