2019／發夢撞返做ptgf時嘅舊客之後（又）跟咗佢返屋企: 插敘：蛛絲
黄花雨時時諗起嗰一晚。圓月夜。火光沖天，濃煙滾滾落彈雨。素未謀面嘅手足喺自己手邊，咳，咳到全身抽搐嘔出胃液，一條懸絲，喉嚨吊到唇邊，晃晃蕩蕩直到俾引力扯斷，掛落腳下枯草。
半透明嘅黏液沾滿橋口烈火嘅碎光。
嗰條閃光細絲，好似蜘蛛絲，將黄花雨五花大綁。
應該要爭分奪秒。但黄花雨失神，好多秒。只想縮起自己喊。
但戰場上眼淚無用。不應有淚。
但呢度係中大。佢屋企。
—
每次有手足不勝濃煙由二橋回撒，都要穿過濃煙，漸漸現形。踉踉蹌蹌，一步一步，越近越睇得清鏡頭嘅勇武filter濾走咗嘅脆弱。
首先會見到火光鑲邊嘅輪廓。然後係蒙灰嘅身影。最後，如果唔係戴住鍍膜泳鏡滑雪鏡，就會見到一對睫毛，底下不斷湧淚。睇到一絲眼仁都係奢侈。
二號橋同大路垂直成T字，交界作為前線，白煙濃到不能視物，只靠火光辨方位，每發子彈都首當其衝，仍人頭湧湧，大家前赴後繼。
T字頂連住一方可泊十數架車嘅露天停車場，穿過可到單程橫路，有樓梯通向網球場、gym同運動場，相比尚算平靜。
黄花雨跟FA喺停車場戒備，身邊有滅煙隊同討論中彈有無得claim工傷嘅開live記者。聽到聲息，輪廓初見，FA就一組衝前。接人。扶去後排。沖眼洗臉冰敷洗傷口。
其實都只係止痛，聊勝於無。真正嘅痛已經刻入骨肉沉入靈魂。黄花雨心知。
有時返嚟嘅人有人扶住㩒住扯去後排休息。而更多時候，一個人返嚟，沖一沖眼，洗一洗臉，又撞向厚重嘅煙牆。義無反顧。
好多人要撒隆巴斯。屌腳踎到好撚痛。好多人唔願洗傷口。喂唔好嘥時間啦。郁兩郁又甩。黄花雨想像汗混合催淚結晶醃住大家傷口，頭皮發麻，只好又氹又唉，快手將醫療膠紙兜多兩個圈。
整親係要唞㗎。黄花雨細聲講。手足聽到失笑。佢都笑。兩個人都笑。短短苦苦嘅笑。夜空染橙色，好似不祥末日。
有人嗌，有記者右眼中彈，問佢問題答非所問。人湧去。黄花雨忍住望嘅衝動，快手收好紗布膠紙，跟住彈起嘅手足又跑返去交界。
又一個手足瘦弱嘅身影跌跌撞撞由濃煙中現形。
可能係上一輪催淚彈太密太應，其他FA未返得切上前。附近無其他FA。
黄花雨咬牙一個人跑過去，越近橋頭，眼越痛。戴軍用嘅FA會直接踩入煙接人。但佢眼罩唔防煙。愧對手足，要佢哋一個人忍痛摸黑行。本來可以陪住佢哋。早廿步。
黄花雨喺霧薄處伸手，穿過手足腋下半揹，高佢一個頭嘅男人就咁冧喺佢身上。臉撞佢雙罐防毒面具，一下壓歪佢頭盔。黄花雨由四條柱狂奔落橋時隨手執，有一邊Y帶扣唔緊。手足嘅低嚎帶哭腔，透空氣又透肉透骨，震響黄花雨大腦。
黃花雨反手拖住手足，好似一場殘忍嘅蒙眼越野夜路試膽。手足鉗緊佢五指，手心所及，汗流如漿，如入泥濘。
將手足半托半拖帶到停車場中後，聽得肩上人單罐防毒面具入面壓住咳聲鼻水聲，又見攻勢稍緩，決定除低手足眼罩，沖眼。
唔洗提示，手足自覺側頭。扭成九十度，鹽水就唔會流落豬嘴。水柱一落，見到眼皮下眼珠翻白震顫。鹽水一點點掛喺睫毛間。
對眼咁靚。蒙臉嘅大家都有最清澈明亮嘅眼。黄花雨心中酸楚，又諗起麥展風，放軟聲：好快唔痛。無事㗎。會無事㗎。
側左。側右。鹽水滑過太陽穴流入髮鬢。
手足正要開眼，黄花雨解開佢防毒面具要沖臉。
一念之差。
黄花雨忘記，催淚彈甚至射過入運動場。
遠方火光後突然似一機爆谷爆開。碰碰碰碰。數唔清幾多響。
其中一粒催淚彈橫空飛跌兩人腳下。
手足狂咳。
滅煙隊湧過嚟，夾彈入水袋。濃稠白煙纏繞唔散。
黃花雨眼內起火，涕淚奔流。
眼鼻喉所有黏膜都痛，最痛係羞愧。急救金科玉律：確保現場環境安全。第一課第一節第一句。低級錯誤。
濛成一灘嘅視線中見到手足臉垂落，鼻水眼水口水喺空中匯流，拉絲發光。
黄花雨想幫佢抹嘴，但大家全身衣物都浸滿催淚煙。將防毒面具㩒返上佢塊臉，想帶佢行，手足一手揮開，蜷身又大聲嘔吐，但淨係嘔得出半透胃液。
嗰一條細線喺火光與熱風中晃盪。
好似斷落嘅蜘蛛絲。
黃花雨嘅胃隨佢越發空洞嘅乾嘔聲一下一下抽緊。
黄花雨死命拉。肩上人沉重而拒抗。黄花雨知佢痛。黄花雨都全身發痛，心臟漲裂到想流真正嘅眼淚。但如果喊，就似乎示弱，一切會再無法忍受。
如果可以，黄花雨想所有痛都由自己承受。所有。但大家都喺地獄，痛苦嘅總和係無限。點分都唔會減輕。
另一位FA衝前扶走手足。臨別終於微微開眼，望黄花雨。眼神怨憤又決絕。馬上就轉開。黄花雨不能言語，只能搖頭，眼水一直由眼眶流落防毒面罩邊，積水沁濕臉頰。
有FA嚟拉黄花雨，手穿過佢腋下將佢半揹起，行得好快。到後方其實不過十幾步，光線暈暗，忙亂空氣中隱約有秋天應有嘅涼爽。側頭，鹽水，眨眼，紗布印乾。
眼水止住。可以重新呼吸。但黄花雨更想喊。
無膽上前線，做後勤又累人。
現場環境要安全。但邊到可以搵到無煙霧。
黃花雨諗，地獄就係咁。佢嘅中大起烽煙變戰地，佢珍惜嘅人一早被逼從軍征。
而佢無辦法阻止，無力守護任何嘢。
手足半開眼，眼神怨憤又決絕。
甚至連他人信任都辜負。
佢呆立不過十數秒，眼前就有十幾廿人來來回回。佢隔離大家傾緊call白車。但四邊塞死晒。
醫生話想要氧氣機。大家討論。中大入面可能都有。
眼淚無用。要喊嘅話應該返屋企。
但中大就係佢屋企。日日夜夜。知識。美感。做人。感情。回憶。全部全部。
黄花雨覺得心同腦都被扯開兩邊。對自己無能嘅憎惡好似鐵釘直插入已經支離嘅意識。
佢企喺後排路邊，等人過嚟就接應，洗眼洗臉洗傷口包扎。混混噩噩。唔知呢場惡夢點樣先醒。沖眼洗臉冰敷洗傷口。
佢撞見tutor、大O mate、hallmate、仲有好多人面善。但今晚知識同情誼都失效。大家結成新嘅意志，同時要獨自面對自己嘅命運。所有痛傷甚至死，都只屬自己。
有FA問黄花雨要冰袋。佢呆呆滯滯遞過，諗諗吓又跟住跑過去。
俾人扶過嚟嘅手足單住一隻腳，嘶嚎不止。唔緊要啦今朝已經係咁我無事。我兄弟喺出面。我要返出去。今朝roommate俾人拉我點解仲喺度。段崇智同班高層所謂談判——
幾個男人默默無語，將佢㩒低喺路邊坐好。佢腳踝腫到手擺近就感受到熱氣。FA話已經見佢第三次。敷一敷冰又走返出去。唔知佢點忍。
手足掙扎。把聲屈住喺粉蓋雙罐防毒面具入面，嘶啞不堪聽。我兄弟仲係出面呀仲係出面出面唔得啦我——
黄花雨不忍，跪低，伸手兜過佢頸，將佢抱住。
手足全身一震，忽然無力，臉撞落黄花雨肩背，痛哭失聲。
良久手足終於震住吐出一句。
我好無用。
佢頭墊住黄花雨肩，佩甲嘅心口上下起伏，戴防割手套嘅手握成拳，不住捶地。
辛苦你。
黄花雨感覺到兩個人緊貼嘅心臟無助狂跳，眼淚終於湧出。
我好無用。
黄花雨將手收得更緊，呼氣，俾壓實佢心口嘅一句離口。
對唔住。
反而輪到手足慌亂。一收頹喪，小心翼翼。
大家都喺度。
我知。
眼淚縱橫，暗中閃光，又似另一品種嘅蜘蛛絲，爬滿每個人嘅臉，網羅所有自責、逞強、不甘、怒怨。所有情緒混和化學刺激草草流出體內，又轉瞬被戰火蒸發。
大家趕赴戰場，為他人，為信念變得堅強，將思緒與自我暫時全部鎖起，怕思考會拖慢腳步，拘束手腳。
但掙破蛛網，黄花雨先可以更加深刻地體認到當晚嘅決心：
縱地獄亦同往。
我哋只可以如此。