陰陽路情: 第一章：臨時賣血

今日明明day off，諗住可以瞓到3點再施施然落去跑吓步打吓機hea一日啦，點知仲瞓緊喺張牀上面嘅時候……

鈴鈴……鈴鈴……

我尋晚明明無較鬧鐘㗎喎，點解會響嘅？

我瞇起對眼睄吓個電話mon，係派更朱仔打嚟。

「堯堯你今日得唔得閒？龍翔道近畢架花園有單大鑊嘢，可唔可以返黎幫手攝位？」



「吓……好啦。」

於是我換好衫，搽啲粉畫吓眉就飛的出大荔拎車。

喺車上面碌吓FB，龍翔道東行近畢架山花園8車相撞，全線封閉。睇相見到一部FK2成份頭冇咗，仲有一部反咗肚嘅……深藍色M4？！我冇睇錯呀嘛，呢部咪係Theresa部車？上個禮拜我哋仲一齊去幫架車鍍膜咋噃……

我即刻打畀Theresa。無人聽。

佢唔聽電話只得兩個原因。一係佢開緊工，一係佢出咗事。不過佢條字軌呢個時間應該未開車㗎，唔通……



返到廠簽完到就去咗搵車。又估唔到居然架Kuoni PZ8988會冇人攞，於是順手拎埋去打仗。

呢個時候又有人打畀我。

係Theresa呀！！

「喂？Yui？做咩無啦啦打畀我？」

「屌你嚇卵死我咩又唔聽電話，幾驚你出咗事呀。」



「我同人調咗字軌呀嘛…… Btw你話驚我出咩事？」

「我以為龍翔道架M4係你揸……」

「啋，我尋晚爆咗呔未得閒整呀，架車仲喺車場，放心啦。」

「好啦……我開工先啦咁。」

「你今日唔係放假咩？」

「臨時畀人捉咗去42c救火囉。」

私到上長亨之後就去搵站長。今日呀哥當值，梗係要r吓啲福利啦。

「呀哥，42c咩料？」



「有一半車塞死咗喺呈祥道呀，龍尾就快到荔景添。你去做一單天馬中載藍田先再睇吓點啦，記得竹園轉上龍翔道避開條龍。」

「呀哥，我好肚餓呀，畀我食d嘢先開工啦……」

「頂你個肺咩……好彩我盒飯仲有剩姐，嗱嗱聲食完好去開工啦。」

「哎呀唔爭在餵埋我啦，你咁得閒。」

「唉怕咗你……好啦。」

「多謝呀哥！！！」

食完飯就即刻着車，踩到最盡飛去天馬苑接濟班大帝。果然，成個站人頭湧湧，講真我成世都冇見過天馬苑可以多人到咁。唉仆街喇，黃大仙党铁站嗰度打爆架車都似。