【新手選項故】《2020》(一個光復香港嘅故事): 【Ch 1】元旦的煙火(6)

[23:52]

無辦法，夢境實在係太過真實，真實到我都好難相信係假嘅。為咗唔令咁多位手足就咁死咗，我決定同全部人講自己嘅夢境：

「咁多位手足聽我講！我尋晚發咗個夢，見到陣間12點班解放軍真係會衝出嚟，見人就殺，仲準備埋坦克車添啊！快d走啊！」

「你係咪搞笑啊，發夢嘅嘢你都信？又唔見你夢到林鄭聽日全家X街死L哂。」「你個死偽黃，走開啦！」「咪就係！唔係嚟幫手就唔好留喺度啦！」「我哋就算係死都唔走㗎啦！」

我望住蕙，期望同我經歷過咁多嘢嘅佢會相信我，可惜都係惗多咗：「嘉楠，我都好難信你喎，話哂呢度有咁多外國記者，佢哋邊敢喺度殺人啊！你真係想走都唔洗搵個咁嘅理由啊！」





「唔係啊！我真係唔想大家一整死喺度啊，信我啦好唔好？」我真係……真係唔希望喺現實中發生。

解釋再多，喺人哋嘅耳中都只會係掩飾。結果包括埋蕙在內，無一個人願意相信我。我都估到講都無人信㗎啦，咁荒謬嘅嘢有邊個會信吖。

既然連蕙都唔信我，我唯有自己一個人走。



[11:58]





我行到去會展附近，覺得應該會比較安全。但係我又唔係好忍心揼低蕙，我決定打電話俾佢。當然，我絕對唔希望夢境會成真，我怕今次係我望住佢死。

「我唔迫你走啦，總之陣間12點你見到佢哋開閘就要即刻跑，佢哋真係會殺人㗎！」

「你……咩話，我……人多……唔好啊。我唔明……要驚到咁，中大……戰你都無咁……」終於，信號差到自己收咗線，我再打俾佢都已經打唔通。



[1月2日 12:00]





我喺遠處望到中環軍營嘅大閘緩緩咁打開，我不斷大叫：「走啊！快d走啊！」但係佢哋完全聽唔到。

依照「劇本」，會有幾個義士即刻衝咗去閘口前面，試圖一窺有d咩喺入面。佢哋開頭會懷住必死嘅決心衝到去只係開咗少少嘅大閘，之後立即轉變為驚惶失措嘅樣，正想轉身嘅佢哋隨即後腦落地。

結果，現實同夢境係一模一樣。換句話嚟講……夢境成真。

「吖！！！解放軍殺人啦！走啊！」少部份比較細膽嘅即刻拔腿就跑。

「我哋就算係死都唔走㗎啦，最多咪一齊死！」隨即將手上嘅磚頭同汽油彈揼入去。

終於，閘門完全打開，而佢哋亦都終於知道點解義士會有咁驚慌嘅死相。見到呢樣嘢，大家心入面只會惗到2個數字－6，4！

「係坦克車啊！！！！！」今次有接近一半嘅人都開始走人，較接近閘口嘅手足繼續揼所餘無幾嘅磚頭同燃燒彈，希望為身後嘅人爭取更多時間。

去到呢一刻，d對白依然係一模一樣。





我惗返起蕙嘅處境，連自己嘅安危都唔理，即刻衝返去蕙嘅所在地救佢。

終於見到蕙，佢亦向住我嘅方向逃走。但係佢一個唔留神，俾佢眼前嘅屍體kick親，成個人扒咗喺地下。我正想走過去扶佢起身，但佢身後嘅解放軍已經追咗上嚟，企咗喺佢面前。

「蕙！蕙啊！」「走啊！你快d走啊！我已經無機會再走啦。」佢合埋雙眼，而冷冰冰嘅槍管已經指住咗佢嘅額頭。

「劇本」並無改變，分別在於今次換咗主角。

「砰！」我唔想面對佢，見到後腦多咗個血洞嘅佢。我我更加面對唔到自己，係我親手害死佢。

我呢一刻非常後悔……如果我無叫佢嚟，如果我啱啱夾硬拉埋佢走，如果我無自己一個人走咗去……佢就唔會死，唔會俾我害死。

可惜，呢個世界並無如果。











。。。。。。

「總算……叫做救到佢。」

「要走啦，再唔走就會俾佢見到我哋㗎啦。」