《病港２》: 137

俗語有話，新官上任三把火。

而我的火，則留待在拷問室才展示出。

一件事的結束，並不是真的結束。

它的善後工作，才是最熬油費火。

我在會長室休息一會，就到病獵協會的拷問室。





不得不說，瑪希會長初創協會時的英明。

大樓不少的空間配套，都分配得宜。

其中，拷問室是「機密區」以外，最為幽深的地方。

那裡是大樓某層的角落，走入角落裡的通道後需要穿過幾道門，當你聽到哀痛的慘叫聲，就代表差不多到達了。

平日，烏納咒就待在那裡頭，很符合他陰沉的性格。





他說過自己最殘酷的手段，是執刀往對方下陰或肚腹切割，然後讓自己的狼狗去咬扯出內裡的腸筋內臟，手段名為「犬決」。

「你好，會長。」烏納咒像個優閒的典獄長一邊喝茶，一邊閱讀外國的名著。

「你好。」這個角落小天地是我留院那一個月，瑪希講解給我知道的。

她教了我不少，關於病獵協會的事情。

我有問過她，為什麼相信我這個半年不到的人。





瑪希只是答，因為她相信白鯨。

是因為我以前跟她說過，自己跟白鯨相識？又或者，是在我身上多少看到白鯨的影子。

相信一個人，可以很簡單，亦都可以很困難。

「所有寬恕營盜賊喺哂到？」我問。

「六個盜賊，一個大河孝，全部喺到。」

「嗯。」我準備行去大河孝囚室。

「仲有嘅就係，佢嘅手下當中，有一個撞牆自殺、有兩個被刑求至死。」烏納咒進一步回報。

就是說，全寬恕營死剩四個人。





「喀」我打開大河孝的囚室。

囚室四面是牆，除了牆壁鎖住大河孝雙手和腳的鐵鏈外，就再無其他。

冷白的燈光在門打開一刻，一閃一閃的。

大河孝跟他哥很像，同樣是個年齡介乎四十中至五十的漢子。

跟他兄弟一樣留有濃鬚，樣子一看就知是個老江湖。

「大河孝？」我簡單問一句。

他抬起頭，眼神深遠的反問我：「你就係......殺咗我兄弟嘅人？」





「嗯，佢好了不起。」

老實說，要不是有一點計策暗算，我差點就死在他刀下。

我續說下一句：「但死得，好似隻狗咁。」

大河孝瞪眼欲裂，裂眥嚼齒：「哈，我兄弟佢武藝唔差，你肯定......肯定精心策劃咗一場詭計，陷佢於身亡吧。」

「可能吧。」我行前一點，俯視他：「講下你嘅嘢？」

「你朋友折磨咗我整整幾個星期......都無喺我口中挖出到一啲有用嘅資訊......你認為你......呀！！」

未待他說完，我已一腳往他臉側踢過去：「咁就，直到成功為止。」

「嗚、嗄啊......咳......」大河孝被踢掉一顆牙齒，痛苦地咳嗽：「咳......」





「就從手指開始先？」我走到他身邊，握住其尾指。

大河孝眼睛死瞪手指，像是準備承受那非人劇痛。

「咔格！」

「嗚啊啊呀呀呀！！！！！」大河孝痛得不斷把後腦撞向牆壁，試圖把自己撞暈。

我捉住他多日沒洗的頭髮，緊握其右手無名指：「第二隻。」

「咔格！！」

「嗚呀啊啊啊啊！！！！噫啊呀呀呀......」大河孝眼框漸紅。





他的兩隻手指，無法郁動的僵直著。

「你應該慶幸人類有十隻手指，因為咁係代表你有十次機會，而你錯失咗兩次。」我捉住他的第三隻手指。

「即、即管嚟呀啊啊啊！！！！！！」大河孝瘋狂的眼神，猙獰的臉孔正面向我：「我嗄、我！！寧死不屈！！！」

果然是兩兄弟，說話的風格都十足。

「咔格！！！」這次斷指聲更為清脆。

「呀啊啊啊啊──！」

拷問時長四小時，大河孝七根手指給扳斷。

情報透露為：零

見他精神現已陷入瘋狂狀態，我看再強的痛都沒有用。

等他回復一點理智，再繼續刑求會比較好。

「我會再返嚟。」我轉身離開。

「嗄啊......嗄啊哈哈哈......」大河孝七根手指呈扭曲，瞪著冷冷的地板。

一行出囚室就見到烏納咒和看守的病獵，都盯緊著大河孝囚室的門口，他們應該想知道，裡面所發生的事情。

「肉體嘅折磨，對佢似乎無用。」我對烏納咒，說。

「係，佢最難搞，佢其他手下都經已招供。」

「要從精神入手。」我說出建議。

「精神？」

「馬谷川條屍，仲喺到？」

「無，嗰日喺火場燒到化灰。」

「幫我喺其他盜賊口中，問下關於大河孝嘅事情。」

「應該無問題。」

我望一望周圍的囚室，發現有間不是困盜賊，而是一個普通人，他坐在囚室中盤腳打坐和微笑。

我記得四小時入來前，他已經維持這樣的姿勢和表情。

「嗰個咩人嚟？」我好奇一問。

「詭人，我哋俗稱佢叫「微笑詭人」，因為幾乎全日都保持宜副姿態同笑容。」烏納咒慢慢交代出，一般大眾不知道的事實：「佢亦係，第一個詭人發現個案。兩年前有一單銅鑼灣倖存區隨機殺人事件，被證實係名為「陳熠」嘅詭人做，好多人都以為陳熠係第一隻被發現嘅詭人，事實上，協會早喺再前一年，經已發現「詭人」嘅存在，而呢隻微笑詭人就係第一隻。」

「咁有冇喺佢身上，拎到咩情報。」我又問。

「以前無，但最近一、兩星期，佢不斷話......我哋多咗新詭人。」

「新詭人？」

「詳情，會長你自己問下佢？用你對大河孝嘅方法......」烏納咒抱手，低聲道：「佢係隻，肉體同精神點樣摧殘都無效嘅詭人。」

在離開拷問室前，我打算會一會這位有趣的囚犯，於是便走到他的囚牢前：「微笑詭人？」

他保持微笑，無其他回應。

「你話新詭人，係咩意思？」

「新詭人，誕生，恭喜。」他說話方式奇奇怪怪的。

「仲有？」

之後，他就再無回應。

我都無再花心機，在他的身上。

畢竟能夠長時間待在拷問室的，都不會是省油燈。

從這陰冷的角落道通行出，就彷彿回到第二個世界。

拜訪完這區，就到別處。

我這個新上任的，最好每個陌生的部門和地方都巡視一下，了解他們的運作。

接下來，要善後的工作有被救獲的少男少女。

聽林楚說，他們待在病獵協會的醫療室裡。

因為對天環人經常出入的區內醫院感到畏懼，所以他們寧死也不願走出去。

在探望他們前，我特意帶了些糖果過去。

那群少男少女總共二十五人，當中十七男、八女。

全部人的經歷，大致上跟艾匡相同。

因為在倖存區沒有工作能力、無家可歸，因而接受天環教的施惠。

久而久之，被騙拐到寬恕營上。

就算派發糖果後，他們都沒有感到一絲喜悅，只是很快把它放入口中，當作治肚零食。

我不想，說些官腔的說話，叫他們放下陰影，重新開始之類。

畢竟，這世界的黑暗，從來就未消失過。

「加入病獵，如果你哋無其他去路。」我只留下一句給他們。

成為病獵，就是保護自己的最好方法。

這世界越多病獵，彼此就越安全。

相反，病獵越少，我們病獵就越危險。

「病獵」這個字，對他們來說，或許救贖。

那些神色黯然的、表情頹然的，都稍稍抬起目光。

因為我不懂安慰人的說話，這次探訪很快就結束，連一旁的護士姑娘都愣然。

既然來到醫療室，我就順便探望瑪昆。

一位沉睡很久的病獵。

自那次爆炸事件後，都過了很久。

「佢前段日子好唔掂，但意志好堅強。」驀地，一位姑娘走入來為瑪昆抹身。

「我有冇阻住你？」我問。

「當然無，會長。」女姑娘一邊抹瑪昆的身，一邊說：「如果佢個身無臭到你嘅話。」

「瑪昆佢意志的確好強大。」他含有的病獵正義感，是我見過的人之中最強。

「喺佢俾人劫持出去個陣，佢幾乎停止咗心跳......接近十分鐘。」姑娘向我透露出。

「係？」

「我哋重新為佢駁管同儀器，一班醫生為佢急救都無用，原本準備宣告死亡......」姑娘凝視瑪昆的臉孔，說：「但係過咗十分鐘後，佢心臟又重新跳動，你話佢意志係咪好強大？我諗佢一日未見證病者死盡，佢都唔會斷氣住。」

「希望佢會喺某日醒返。」