[hehe]《知音人》: 五十一：自白

Oscar：「我唔知呀。」
Horace：「下？」
Oscar：「你知我A0黎架嘛，無拍過拖，都唔知中意人係咩一回事。」
Horace：「咁你對Wilson有咩感覺？」
 
Oscar靜了一會，然後深呼吸一下，再說出以下的自白。
 
「其實當初O-camp識佢果陣，真心無咩特別既，你知我地系無咩男仔，咁我同佢的確比較岩傾既，特別講籃球。你知我中學開始都中意打波，難得升到U仲有個朋友中意打波又約我打，咪越玩越熟囉。
 
之後就係佢叫我一齊入校隊選拔，然後兩個誤打誤撞一齊入左，Steven知道果陣都呆左。Wilson佢係勁既，你今日都睇到佢身手，但我真係唔知點解自己會入左去，有段時間我甚至覺得自己真係唔應該係入面，好想退隊。


 
Wilson知道之後同我傾左好耐，佢話我只係唔夠自信。佢陪我做過好多野，打波啦、打機啦、去海洋公園玩過山車啦，咩都有，就希望解決我心理上既關卡。然後唔知幾時開始，我覺得同佢一齊玩既日子好開心，好想下次快D來，同時好想比佢知我唔會令佢失望，可以打好D波。
 
雖然係咁，佢既行為有時令我好疑惑，有時佢會好熱情，好主動咁去關心我，但有時我搵佢傾計，或者想佢知我有D唔開心既時候，佢會表現得好冷淡，所以我都唔知佢究竟諗緊咩。
 
我同呀Roy傾過，佢話我只係太耐缺乏別人關心，有人突然對我上心就諗錯隔離，又話我可能見你同Edmund拍緊拖，自然對愛情有憧憬，叫我唔好諗太多。
 
今日場波雖然都理解點解唔派我上場，但發現努力左咁耐都無出場機會，去到真係無得出場果下，果種失望避免唔到。同時Wilson佢咁叻仔入成十幾分加致勝球，我發現我同佢就係存在住果個差距，加埋尋晚真係太緊張訓得唔好，所以點解頭先打完波會咁sad。」
 
Oscar一口氣說出了這麼長的自白，Horace一直安靜地聆聽著。雖然他聽完也不太清楚Oscar究竟是否真的喜歡Wilson，也不知道兩人之間的關係究竟在哪個範圍、哪個階段，但他知道，他願意說出了這些，代表他心底的矛盾真的很大。


 
Horace：「呢段日子辛苦你啦。呢幾個月我一直都好忙，無咩機會去聽你講野，都唔知你原來承受緊咁大壓力。打波果度我真係唔識幫你啦，或者你搵Steven幫你手啦。至於感情方面，其實我都唔太識處理，亦唔敢比D咩建議你，始終係你地兩個人既事，我做到既只係聽你講野，開心又好唔開心又好，希望你唔好一個人收埋自己，我或者呀Roy實會撐你。不過如果你真係想聽建議既話，你搵下Edmund啦，我之前感情煩惱都係問佢既哈哈。」
 
Oscar聽了沒有回應，默默地喝著飲品。
 
此時，Horace手機響起，是Jordan從台灣打來的WhatsApp Call。
 
Jordan：「張志鈞，你做緊咩呀？」
Horace：「同Oscar食緊飯呀，開個視像你睇啦。」
 


他開了視像通話，和Oscar對著手機螢幕中的Jordan打招呼。
 
Oscar：「佐敦，玩得開心嘛？」
Jordan：「OK呀，離開香港好休閒。係呢，聽講你地今日贏波喎Oscar。」
Oscar：「係呀，你幾時返黎呀？」
Jordan：「30號呀，你地入決賽我趕得切睇架。」
Horace：「四強好似打你地九東大喎。」
Oscar：「係呀。」
Jordan：「咁好彩我未返得切黎，唔使咁尷尬，哈哈。」
Horace：「你玩得開心D啦，夜D我返到去再搵你啦。」
Jordan：「好啦，夜D再傾。」
Oscar：「Bye Jordan。」
Jordan：「聖誕快樂呀Oscar。」
Oscar：「你都係呀。」
Jordan：「Bye。」


Horace：「Bye Bye。」
 
掛了電話後，Horace的面上掛著一個甜美的笑容，Oscar都看在眼內。
 
Oscar感歎地說了一句：「愛情既威力。」