[hehe]《知音人》: 八十二：遲疑

Kenneth：「我地入房傾呀。」他說完這句便進入身後一間小練習室，Horace尾隨，並順手關上門。
 
Kenneth：「頭先總監應該話左你知我地黎緊會有首合唱歌要錄？」
Horace：「係呀。」                                   
Kenneth：「緊唔緊張呀？」
Horace：「er…有少少啦，個消息黎得好突然咁。」
Kenneth：「哈哈，唔緊要，我見你sing con唱歌都幾放鬆，到時你當係台上表演就OK啦。」
Horace：「嗯，盡量啦，但錄音始終唔同Live。」
Kenneth：「你放心啦，到時有我睇住你。」
Horace：「OK，係呢，你知唔知幾時收到首歌？」


Kenneth：「好似下星期有，到時再同你夾點樣準備？」
Horace：「OK，咁我過去上堂先啦。」
Kenneth：「係喎Horace…」
Horace：「做咩呀？」
Kenneth：「都係無野啦，你去上堂啦。」
 
Horace離開房間，到另一間練習室準備練習。很快，Joanne就走進去，看到Kenneth獨自一人在看手機。
 
Joanne：「點呀細佬。」
Kenneth：「都話係公司唔好叫我細佬囉。」


Joanne：「附近都無人。」
Kenneth：「好似上次pantry咁比人聽到哂幾尷尬。」
Joanne：「放心啦，我睇住佢入左課室練習先入黎。」
Kenneth：「其實，你覺得佢知唔知？」
Joanne：「知唔知咩？」
 
Kenneth沉默了一會，再說：「你覺得佢知唔知我做咁多係為咩？」
Joanne：「人地又唔係你肚入面條蟲，你唔講佢點會知？」
Kenneth：「如果你都睇得出…」
Joanne：「我對左你廿幾年，人地識左你唔夠一年，又唔係成日見到你，點比較呀？」


Kenneth：「唉，好煩。」
Joanne：「其實你諗清楚自己想點未架？」
 
此時大門鐘聲響起，Joanne轉身離開房間走回接待處，留下甚為寂寞的Kenneth一人在房間。
 
當Horace在唱片公司練習的時候，他的室友Roy和Oscar在香港島大學A宿512室輕鬆討論著。
 
Roy：「生日快樂呀，呢份禮物我同將軍Edmund夾份送比你架。」他遞給Oscar一個紙袋。
Oscar：「下次唔使啦，你搞到我以後要諗你地生日要送咩。」但他也伸手接過禮物。
Roy：「你早兩日又唔比我地請你食飯嘛。」
Oscar：「咁我地一向無搞開呢D野，無謂大家破費。」
Roy：「一場兄弟，講呢D。」
Oscar：「係喎，星期六你咁得閒約我上黎送禮呀。」
Roy：「鬼叫果兩隻野一個返工一個拍拖，要我送比你呀。你知我好多人約架嘛。」
Oscar：「知你夠義氣啦，我仲有幾個鐘時間，不如出去行下？」


Roy：「好呀，你約左仔仔幾點呀？」
Oscar：「六點半呀。」
Roy：「咁落去食完個Tea去銅鑼灣睇場戲啦，我夜晚都約左人食飯。」
Oscar：「好啦，咁行啦。不過你唔好請我啦，我會好唔好意思架。」
Roy：「得啦，咪咁婆媽，我又唔係你條仔。」
 
兩人邊說邊笑著執拾物件，離開A宿到樓下飯堂吃下午茶。
 
由於星期六的關係，飯堂人數不多，兩人很快點餐及取餐，找了位置就坐。
 
Oscar：「我都好少星期六係呢度食Tea。」
Roy：「人少少，幾舒服。」
Oscar：「咦？」
Roy：「做咩呀？」
Oscar：「你轉身望下。」


 
Roy轉過身，看到Darren和Wilson在不遠處的位置站起，準備離開。
 
Roy：「你仔仔成日都同Darren一齊既？」
 
Oscar聳聳兩肩，沒有回應。