野味小精靈: 新嘅嫌疑人
半個鐘頭前，唐澤叮囑完我哋有危險之後，就決絕轉身離開。其實唐澤對未知嘅情況都會恐懼，唔知仲有冇命出返嚟，但既然決定咗，佢就唔會再回頭。
「比卡！」
我有預感唐澤要去做危險嘅事，衝過去抱住佢隻腳，想阻止佢。雖然我開頭感覺到唐澤嘅計算，的確係好討厭佢。
唐澤份人又有心計，又係工作狂，同佢相處其實好辛苦。除咗俾嘢食我同謎擬Q之外，就完全唔理我哋。仲成日話我哋麻煩，連樂樂嘅一半溫柔都冇。
但係......又完全感覺唔到佢會傷害我哋，所以而家已經勉強接受咗佢，我唔想任何嘅朋友有危險。
「謎擬Q！幫我拉開比卡超！」唐澤難得下定決心，佢怕自己一回頭，就唔敢行嗰一步棋。對比起比卡超鍾意撒嬌嘅性格，唐澤覺得冷淡又古怪嘅謎擬Q反而更加令人放心。
今次謎擬Q呆呆咁企喺原地，難得冇同比卡超唱反調。唐澤唯有狠心推開比卡超，衝出門口。
「比卡！」我想追上去，但唐澤已經鎖咗門。佢怕我唔聽佢講跟上嚟，所以連其他窗都鎖埋，將佢哋困喺屋企。
我只能夠咁坐喺地上，雙耳低落咁下垂，乖乖地等待唐澤返嚟。謎擬Q都少有咁乖乖坐喺我隔離，冇趁機攻擊我。
「比卡？」
「謎擬Q？」
我同謎擬Q突然有默契咁轉過頭對視，同樣見到對方眼底裡嘅恐懼。
'嗰個人類要嚟啦，嗰個可怕嘅男人。'
呢種感覺由我哋出世已經感受過好無數次，對我哋嚟講好似已經好遙遠，但又難以忘記。每當嗰個男人要嚟，我哋小動物嘅直覺已經響起警號。
「比卡......」我想逃走，但每當諗起嗰個人類，恐懼都令我無法控制自己，雙腳軟到好似冇力一樣。
我開始聽到門口有啲嘈雜聲，外邊嘅人類想強硬咁破壞唐澤屋企嘅門鎖入嚟。但屋企所有門窗已經被唐澤鎖住，我哋只能夠等待，被佢哋捉返研究所。
「謎擬Q！」謎擬Q突然企起身，示意我跟住佢。而家已經無路可走，我唯有聽一次佢嘅意見。
跟住謎擬Q去到廁所，發現呢度有唯一一個窗口打開咗，係唐澤偷偷地留俾我哋。佢知道我哋呢邊都會有危險，又怕比卡超會跟出嚟，所以只係同咗謎擬Q講，方便佢哋逃走。
我同謎擬Q爬出窗口，同時，我哋聽到外邊嘅大門被人成功破壞，一大班人走入屋。有警察，有研究員，同樣都有嗰個可怕嘅男人。
我同謎擬Q匿喺外邊，吹住冷風。身體忍唔住不停抖震，唔知係因為凍定因為驚。謎擬Q推起身上嘅紙袋，將紙袋變大，俾我都一齊匿入去。
雖然平時我同謎擬Q成日狗咬狗骨咁，謎擬Q成日都出絕招，用身上嘅布料包住我。我每次見到佢真身都會嚇傻咗，冇十分鐘都回唔到神。
但今次佢嘅真身居然帶俾我絲絲嘅安全感，我哋難得咁，互相依靠同安慰對方。偷聽住屋內嘅情況，等待屋裡邊嘅壞人離開。
喺唐澤屋企仔細搵咗幾個鐘，依然都冇收穫。辛先生路過玻璃櫃，好奇咁望咗裡面嘅精靈球一眼，就移開視線。
「走吧！」辛先生見完全冇發現，都唔想再喺度浪費時間。
「辛先生，探測器已經快完成了，我們要再來搜一次嗎？」
「要！但只要幾個警察，帶上那個男生就可以了。牠似乎不在這個家，所以做個樣子就可以了。」辛先生同佢啲下屬呢幾日睇香港示威嘅重播片段同喺CCTV搵謎擬Q嘅身影，已經睇到好攰。但終於都有收穫，佢哋搵到另外一個人。一個更加有可疑，懷疑同謎擬Q接觸過嘅女仔，所以佢今次先會咁簡單就放過唐澤。
辛先生離開嘅時候，都有見到嗰個女仔喺現場。感覺比佢想像中仲要平凡嘅一個人，所以佢只係望咗幾眼就上車返去。
辛先生喺車上重新打開嗰段可疑嘅影片，正正就係當日謎擬Q同樂樂相遇，伸出大掌保護樂樂，幫佢擋住警車嘅靈異片段。既然連唐澤都因為呢段靈異片發現謎擬Q嘅存在，研究所咁多精英，要發現其實唔難。
辛先生今次冇諗住咁快上門捉謎擬Q，而係先起曬樂樂嘅底，再思考樂樂嘅利用價值。居然可以令原本討厭人類嘅謎擬Q乖乖跟住佢，呢個看似平凡嘅女仔恐怕有佢嘅特別之處。
「幫我派人監視這個叫許忻悅的記者。」返到警局之後，辛先生將資料上樂樂嘅相遞俾佢嘅助手。呢張係樂樂嘅証件相，所以睇起嚟精神奕奕。表情帶住長年嘅微笑，睇起嚟只係一個好溫和乖巧嘅女仔。
「好！」辛先生俾嘅任務，助手都會俐落咁完成，但唔會多問。因為辛先生好少會做多餘嘅嘢，佢叫自己查嘅人，一定有佢嘅原因。
而而家嘅樂樂萬萬都估唔到，將會遇到危險嘅並唔係唐澤，而係自己。
雖然著保護衣嘅人走曬，企現場仲有警察守住，緊張嘅氣氛並冇減弱。樂樂同龜龜佢地跟本完全上唔到去，好彩仲有唐澤嘅鄰居喺樓上開始幫手報料。
「樂樂！做咩？」龜龜轉過頭，突然發現身後嘅樂樂已經成臉淚水。因為聽到龜龜叫自己，樂樂由自己嘅思緒中驚醒。表情迷惘咁摸一摸臉頰嘅淚水，先發現自己無聲無息咁流淚。
樂樂雖然好遲鈍，但未到蠢嘅地步。佢而家先開始覺得成件事好古怪，包括小精靈嘅存在。佢突然回想起唐澤所有嘅說話，唐澤一早就估到，所有事。
今次唐澤被捕恐怕因為兩隻小精靈......
樂樂開始覺得無比嘅自責，覺得係唐澤主動代替咗自己.....原本應該係自己被人拉，自己遇到危險嫁。
'對唔住......我咁遲鈍。對唔住......我害咗你。對唔住......原本應該係我.....應該係我......'
如果唐澤有咩事嘅話，自己恐怕講千千萬萬句對唔住都冇用。樂樂唔敢再諗，自責嘅眼淚已經悄悄咁由佢嘅眼眶不斷順住圓圓嘅臉頰滑落。
龜龜望一望前邊一大班仲未走嘅記者，再望一望身後正喺度默默流淚嘅樂樂。佢無奈咁嘆咗一口氣，工作同朋友之間，佢果然都係選擇朋友。
「暫時現場都冇咩特別事，咁而家熄一熄直播先。」龜龜對睇直播嘅觀眾講完，就熄機，收拾好自己嘅器材。佢安慰咁拍一拍樂樂嘅膊頭，然後輕聲講：「樂樂，你係咪好攰啊？我送你返去啊。」
樂樂望住眼前嘅龜龜，有一殺那，好似見返佢已經離開咗嘅哥哥，許諾言嘅影子。雖然龜龜平時性格係好似大細路咁，但佢其實同許諾言一樣，都係一個溫柔嘅人。
「嗯......」樂樂低住頭，隱藏起自己嘅表情，唔想俾龜龜睇到。樂樂默默咁跟喺龜龜身後，佢哋兩個之間安靜嘅氣氛，令龜龜一時有啲唔適應，於是不斷諗話題去同樂樂講。
「你唔洗太擔心唐澤喎，佢係聰明仔嚟，唔會有事。」龜龜安慰咁對樂樂講，但其實佢自己都好擔心唐澤。
「唐澤佢......係個好人嚟？」面對住熟悉又令人安心嘅龜龜，樂樂不自覺將內心一直以嚟嘅問題講出嚟。
「哈哈哈，你覺得佢個樣好似壞人咩？你同中指都咁講，等唐澤出到嚟一定要笑吓佢先得。」龜龜聽到之後忍唔住爆笑。樂樂聽到龜龜嘅笑聲之後，先發覺自己又問咗個蠢問題，佢尷尬到臉都紅曬。
「唐澤佢啊~由讀書開始就好聰明，而且好可靠。我覺得佢嘅最大缺點係有啲自我......」龜龜回憶住同唐澤嘅相處，有啲感嘆。唐澤係龜龜大學嘅同學，話好熟又唔算。
「我覺得唐澤會係為目標不擇手段嘅人，成日會忽視咗其他人對佢嘅睇法，或者可以算係唔放喺眼內。」龜龜一臉認真咁講，令我有啲怕比卡超同謎擬Q喺唐澤手上會唔會出事。
「但係呢......我覺得佢並唔係壞人嚟。唔好睇佢咁，要搵佢幫手嘅話，佢都係好有義氣嫁。我相信佢啊。」其實上次聽中旨姐姐講話唐澤有可疑，龜龜有幾秒都對佢產生咗懷疑，但最後都選擇去相信。
「要分辦一個人好壞，唔止要聽其他人嘅評價，更加重要係要睇你同佢嘅相處同了解。所以我講咩都係冇用，要你自己去判斷。」龜龜見樂樂聽完自己嘅說話，開始沉思，進入佢自己腦海中嘅小世界。龜龜笑一笑，都冇出聲打擾樂樂嘅思緒。
樂樂突然回過神，打破沉默：「龜龜......你個肚而家冇咩事嗎？」
樂樂仲記得龜龜之前中彈嘅事，佢其實一直都好擔心。但之後發生咗太多事，就冇時間去留意龜龜嘅事。佢受傷到而家，不知不覺已經過咗半個月啦。
「冇事啦！只係留咗個印喺度，好彩我有個大肚腩幫我頂住。」龜龜誇張咁突起個肚，用力拍幾吓。
「哈哈哈......」樂樂見佢誇張而搞笑嘅動作，忍唔住笑出聲，而心情都輕鬆咗唔少。
經過同龜龜嘅對話，令樂樂嘅內心嘅迷惘不安都消失咗，而家好似搵到方向一樣，變得堅定而踏實。佢決定要喺唐澤安全出返嚟之後，好好傾吓，有關小精靈同佢未知嘅所有事。
樂樂唔想再以不安同唔知道為藉口去逃避，唔知道就要去主動了解同面對。為咗保護身邊嘅人，樂樂第一次想主動去成長同改變。