野味小精靈: 絕對唔會放棄
唐澤返出嚟之後，開始反思自己。喺完全唔知道對方底細嘅情況下，呢步棋行得太衝動啦。原本只係想消除自己嘅嫌疑，雖然算係成功咗。
唐澤喺未被捕嘅時候，其實已經諗好曬自己反駁嘅對白，但而家完全用唔上。自己嘅計劃超乎想像嘅順利，令唐澤嘅不安感反而增加咗。
我感覺到唐澤嘅不安，行過去，用頭頂嘅毛髮磨擦唐澤嘅手心，想安慰佢。唐澤下意識想用手推開我，但冇用力，我只係被推後咗幾步。
唐澤回過神，有啲僵硬咁撫摸住我嘅頭，我哋都慢慢嘗試接受對方。我開始覺得佢係一個溫柔嘅男仔，只係平時喺外人面前，習慣性用冷淡精明嘅形象嚟保護自己。
唐澤收拾好心情，又開始進入工作模式。佢書枱上長期放住一盒果汁糖，放便自己思考同做嘢嘅時候提神。糖盒一拎上手，唐澤就發現比起之前好似輕咗好多。
唐澤無奈咁對我哋搖一搖佢手上嘅糖盒，見我同謎擬Q心虛咁移開目光，佢已經估到兇手係邊個。
「唉......」唐澤嘆咗一口氣，右手有啲煩躁咁揉亂自己嘅頭髮，左手拎起筆開始記錄底佢發現嘅疑點。
寫完之後，一邊猜測住答案，一邊打電話：「喂，阿光。」
「唐澤？終於放返你出嚟啦，我盡曬力幫你，你先可以完全冇事出嚟。」聽阿光把聲都知道佢有啲攰。
「唔該曬，遲啲我請食飯。」唐澤當然知道啦，如果冇阿光幫手，就算班黑警喺佢屋企搜唔到嘢，都會搵機會老屈。
「算啦算啦，你唔好爆我啲嘢出嚟就得啦。打嚟做咩啊！」阿光唔耐煩咁講，佢唔想同唐澤扯上太多關係，但佢自己又有把柄喺唐澤手，迫於無奈先做線人。
「哈哈，就係想打嚟問你，有冇嘢要同我講。例如有關辛先生嘅嘢。」唐澤都係無意中捉到阿光把柄，先可以多一個助力，幫手收集警隊內部嘅風聲。
「連辛先生呢個人你都知道，果然唔講得笑。」唐澤喺電話可以聽到阿光嘅拍手聲。以唐澤嘅收風功力，阿光覺得佢唔做CID查案真係浪費人才。
「唔好拍我馬屁，再浪費時間，你唔怕俾你啲同事發現你同'黑記'通風報信？」唐澤諷刺咁講。
「嗰個辛先生係武漢研究所高層，佢仲帶住成班研究員落嚟香港。聽講佢地日日喺度睇啲香港示威地區嘅CCTV同新聞片，而喺度搵咩嘢，我就唔太清楚啦。」雖然阿光唔知道，但唐澤知道辛先生等人嘅目標就係比卡超同謎擬Q。
「佢哋嚟咗之後，灣仔警署多咗個怪談......」阿光有心想抅起唐澤嘅好奇心，所以特登轉成詭異嘅語氣講。
「咩啊？」唐澤唔想同佢浪費時間，所以敷衍咁是但做個反應，滿足阿光惡趣味。
「佢哋帶咗一個長期蓋住黑布嘅箱落嚟，長期有人守住，任何人都唔可以掂。無人知箱裡面放住咩，但裡面經常會傳出恐怖嘅動物尖叫聲，所以流傳裡面嘅係一隻怪物。」阿光嘅聲好嚴肅，唔似講笑。
「好啊，我知道啦，再有咩消息就通知我啦，再見。」唐澤收線之後，苦惱咁將十隻手指都插入頭髮。
「怪物啊？」唐澤默默咁望一望自己隔離兩隻外型可愛冇害嘅小精靈，佢想同阿光講，佢呢邊都有兩隻怪物......
電話鈴聲突然響起，再一次迫唐澤中斷思緒。
「喂？唐澤，我係樂樂啊，你......冇事嗎？」樂樂擔心到成晚都冇覺好瞓。
「冇事，放心啦。」唐澤禮貌咁安慰佢。
「我想問吓......你今次被人拉，係咪因為比卡超佢哋啊？」樂樂忐忑不安咁問。
「......」對邊嘅唐澤一陣沉默，考慮講唔講真話好。
「咁你將佢哋還俾我啊，我唔想連累你啊！」如果因為要保護佢而害咗唐澤，自己一定會良心不安。
「你唔好咁多心啦，我有分數嫁啦。」有啲唔耐煩嘅唐澤又忍唔住用手揉亂自己嘅頭髮。
「但係......」樂樂依然唔死心，想反駁。
「我俾你帶佢哋返去又點？到時未一樣連累你屋企人。」唐澤嘅語氣好認真，而且好嚴厲，不容拒絕。
「......」樂樂有啲被嚇到，一時間都諗唔到自己要講咩。
「你慢慢諗清楚啦，再見。」冇等樂樂回應，唐澤就直接收線。
果然，樂樂始終太細個，太容易義氣用事。雖然唐澤並唔係太討厭呢類人，但隨時會破壞佢計劃嘅不穩定因素，佢都覺得可免則免。
隔離十四日，之後又喺警局瞓咗差唔多兩日。因為發生太多事，公司又叫佢休息幾日，陪吓屋企人先。唐澤覺得自己宅咗差唔多成個月，骨頭都硬曬，而且肥咗好多。
晨早就執好自己嘅裝備，準備出發去太子站，831半週年嘅活動。
「你哋兩個乖乖哋留喺房，俾我知道你哋偷走出去，就知味道。」唐澤臨走嘅時候伸手彈一彈謎擬Q嘅公仔頭，望住佢嘅公仔頭誇張咁向後倒，覺得有啲治癒同搞笑。
呢個算係唐澤小小嘅惡趣味同幼稚嘅地方，謎擬Q已經俾佢訓練到唔會咁易發火。
我用真誠嘅眼神望住唐澤，表示自己會乖乖地。雖然唐澤唔溫柔，但佢係一個甜食怪，跟住佢唯一嘅好處就係成日可以食到甜品同糖水。
唐澤提早到咗到集會現場，睇吓有冇咩突發事件。但當見到樂樂嘅身影，佢即刻默默轉身準備離開，去另一邊。佢唔想被樂樂捉住，到時又有排煩。
「唐澤！」樂樂注意到轉身離開嘅唐澤，即刻追上去同佢打招呼。樂樂已經諗清楚，對要返比卡超同謎擬Q嘅事，佢絕對唔會輕易放棄。
「樂樂，咁啱嘅。」唐澤見自己已經被樂樂發現咗，唯有無奈咁轉身。喺轉身嘅一剎那，表情瞬間變成服務業笑容。想扮剛才只係冇注意到樂樂，而唔係特登無視佢。
「我已經考慮清楚，都係將佢哋交返俾我啦，我有信心可以保護好佢哋。」其實樂樂真係冇咩信心自己一個保護比卡超同謎擬Q，但佢寧願自己死，都唔想連累其他人。
「冇可能！」唐澤收斂起笑容，嚴厲咁對樂樂講，令人難以拒絕。
「咁你自己呢！你又有信心可以安然無恙咩！」樂樂冇俾佢嘅語氣嚇到，反而更加激動咁反駁。
雙方對視，氣氛瞬間充滿火藥味。
「哎？樂樂！」
突然有一把開朗嘅女仔聲，打破咗佢哋間凝重嘅空氣。樂樂下意思望過去，發現係佢嘅網友，薯仔油。
黃思難得喺人多嘅抗爭現場撞到樂樂，佢興奮咁走過去打招呼。只見樂樂同另一個男仔一齊，同時間臉無表情咁轉過頭望住佢。
黃思再行近少少，先發現氣氛好唔對路。佢哋兩個之間火藥味十足，好似隨時會爆發一樣。
「呃......我係咪阻住你哋啊？」黃思驚覺自己好似喺錯嘅時機打招呼，所以覺得好尷尬，佢臉上開朗嘅笑容都僵硬咗。
「我係唔會放棄嫁！」樂樂眼神堅定咁對唐澤講，然後越過佢。
「走啦，油油！」樂樂直接拖住迷惘嘅黃思，快步離開。
「樂樂......你冇事嗎？」黃思見樂樂心情唔係幾好，有啲怕再激嬲佢，但又好擔心。
「冇事，放心啦。」樂樂都意識到，所以盡量控制住自己嘅情緒，變返平時溫和嘅樂樂。
「油油，今日自己一個出嚟啊？」樂樂試圖轉移話題。
「係啊。」黃思一向都習慣自己一個出去抗爭，雖然樂樂同其他網友都話咁樣好危險。但如果同隊友一齊，自己反而唔係好習慣。
「咁油油你不如跟住我啊。」樂樂一直都唔放心黃思，佢成日自己一個女仔出嚟抗爭。
「可以咩？唔會阻你做嘢咩？」黃思有啲驚喜，因為平時一有活動，樂樂身為記者，都要專心報導。所以咁耐以嚟，黃思都好少有機會同樂樂一齊行動。
「可以啊，都係一樣喺前線借。一樣咁危險，今晚我哋都要小心啲。」樂樂覺得平時黃思自己一個，成日不知不覺行得太前，太危險。今日就順便睇住佢，起碼自己會安心啲。
「黨鐵出口要記者啊！」
「油油跟實我！」樂樂聽到黨鐵出口要記者之後，即刻打開直播跑過去。
去到見到有五，六個軍裝警，想清走市民放低嘅花同文宣。但有一個瘦弱嘅女仔企喺佢哋面前，阻止佢哋清走啲花。
個女仔表情雖然有啲驚，但依然堅定咁但喺軍裝警面前。樂樂仔細一睇，總係覺得個女仔似曾相識咁。