但上天並冇聽到黃思嘅祈禱,佢被人捉咗上車之後,只係剩底樂樂同佢自己嘅兩個背囊,孤零零咁掉喺地下。

樂樂喺廁所出到嚟,有啲驚呆。因為見到佢哋兩個背囊都喺地下,而黃思就唔見咗人影。

「油油?」樂樂拎起地面嘅兩個背囊,迷惘咁抬起頭,用雙眼尋找黃思嘅身影,但始終都係搵唔到。

「油油!」樂樂大聲再叫多次黃思,希望可以聽到佢嘅回應,但最後都係失望。

樂樂將兩個背囊放喺石壆,然後搵出自己嘅手機,打電話搵黃思。





「鈴鈴鈴~」

樂樂聽到電話鈴聲之後,慢慢放低耳邊嘅手機。佢驚恐咁向聲音嘅源頭行過去,開手機電筒照過去,發現有部手機靜靜咁掉喺草叢裡面。

樂樂即刻緊張咁拎起草叢裡邊嘅手機檢查,證實真係黃思部手機之後,樂樂覺得自己好似瞬間被人淋凍水咁,手腳都好冰冷。

好奇怪,太唔對路啦!

樂樂有安慰過自己,估黃思有冇可能只係走開一陣。但現實話佢聽,呢個可能性接近零。





正常嘅話,點會將背囊就咁掉喺地下。正常嘅話,佢嘅手機點會唔係跟身,而係喺草叢發現。

“我而家應該點算好啊?油油好似有危險......要報警啊?但報警有用咩?”

“對唔住啊油油,我唔應該掉低你一個......”

樂樂拎住黃思嘅手機,無助咁蹲喺地下。佢個心而家亂,又內疚又迷惘,唔知下一步應該點做好。

突然有個身影行到樂樂面前,遮擋住樂樂頭上嘅燈光。樂樂抬起頭,因為係逆光,所以睇唔到對方嘅樣。只聽到佢擔心咁叫自己嘅名:「阿悅?」





樂樂咪起眼,想睇清楚對方係邊個。

睇清楚之後,樂樂緊緊咁捉住'唐澤'嘅手䄂。就好似就嚟浸死嘅人,緊緊咁抱住眼前嘅水泡:「唐澤?我應該點做好啊?」

「發生咩事啊?」'唐澤'緊張咁蹲下身,同樂樂平視。

「鈴鈴鈴~」

未等樂樂回答,樂樂嘅手機就突然響起。樂樂打開一睇,發現係一個冇來電顯示嘅電話。

第六感話俾樂樂聽,呢個電話好可疑,但為咗搵返黃思,佢都係小心翼翼咁接聽:「喂?」

「你好,請問係許忻悅小姐?」對方嘅語氣好有禮貌。

「係啊......」樂樂有啲不安。





「係咁嘅,有啲機密,想約個時間同你傾下嫁。請問你而家方唔方便傾幾句?身邊有冇人?」

機密?

樂樂望一眼旁邊嘅'唐澤',決定講大話:「冇,請問有咩事啊?」

「有關小精靈嘅事,我想知道許小姐你知道幾多。」我嘅身體喺聽到對方提小精靈三個字之後,已經緊張到出曬冷汗。

「小精靈?咩嚟?」雖然知自己嘅秘密被人發現咗,但樂樂依然想垂死掙扎。

「唔該你唔好扮傻啦,許小姐。你明明知道,我係講寵物小精靈裡邊嘅謎擬Q。」對方語氣有啲唔耐煩。

「你到底係邊個?」對方好大機會係同警方有關,上次搞完唐澤,今次想捉自己。睇嚟小精靈背後嘅秘密真係好可怕,所有知情人士都有危險。





「我係邊個並唔重要,剛才我嘅同事專程想請你嚟傾計,但唔小心請錯你嘅朋友,真係唔好意思。」對方嘅語氣完全唔係喺度道歉,反而係暗藏威脅。

「咁你哋而家想點啊?」樂樂警惕咁問。

「放鬆啲,只係想請你帶埋謎擬Q嚟,一齊傾吓計,飲個茶。」對方依然每句都暗藏威脅,根本令樂樂放鬆唔到。

「好......我想聽吓我朋友把聲先。」樂樂覺得佢至少要確定黃思喺佢哋手上,而且係安全。

「你朋友攰過頭,已經瞓咗,睇怕同你講唔到電話。」對方語氣無辜咁講。

「你!」樂樂聽到好嬲,想開口鬧對方。但記起黃思仲喺佢哋手上,樂樂唯有忍住怒火:「咁講時間同地點......」

「而家都已經係凌晨,你返去好好休息吓先。時間不如就定喺今晚6點,而地點我會喺5點左右通知你。」

「好......」話就話俾時間樂樂休息,但最後只係俾一個鐘時間樂樂去目的地,令樂樂連準備同反抗嘅時間都冇。





「記住唔好俾其他人知,否則你可愛嘅朋友之後會發生咩事,真係冇人知。到時見。」對方講完之後,就收咗線。

“油油......”樂樂失神咁望住自己部手機,直到'唐澤'叫佢。樂樂回過神,先發現全身嘅衫褲都俾自己嘅冷汗浸濕。

「阿悅,發生咩事啊?」'唐澤'擔心咁望住臉色唔好嘅樂樂。

如果樂樂講真話嘅話,'唐澤'一定唔會俾自己一個人去冒險。

樂樂其實感覺到,今日嘅'唐澤'真係好奇怪,但被迫到絕路嘅樂樂已經冇時間思考其他嘢。

如果係平時嘅唐澤,恐怕自己冇信心瞞過佢。但眼前嘅'唐澤',應該有機會。

「唐澤啊,你今日未話還返小精靈俾我嘅,不如我而家就去你度要返。」樂樂唔太識講大話,但都要嘗試。





「吓?唔係幾好嘅,咁夜......」'唐澤'有啲尷尬咁拒絕。

許諾言雖然暫時上咗唐澤身,但佢根本睇唔到唐澤嘅記憶。佢唔知唐澤嘅屋企地址,又冇可能返去自己生前嘅家,所以先仲留喺示威區附近漫無目的咁行。

「唔緊要嫁,我識去你屋企,我同你一齊返去拎啊。」樂樂捉住'唐澤',半呃半氹咁。

越係危急嘅時候,就越需要冷靜......呢個係樂樂做咁耐記者,所學到嘅嘢。

“點解阿悅會知道?阿悅睇嚟同呢個身體嘅原主人好熟咁。唔知呢個身體原主人嘅意識去咗邊呢......” '唐澤'怕自己講多錯多,所以默默跟實樂樂嘅腳步,暗暗都為呢個身體嘅原主人擔心。

到咗唐澤屋企門口,'唐澤'搵咗好耐先搵到條鎖匙。果然好奇怪,但救黃思要緊。

「比卡!」我一直屈喺屋企就快發霉,見到樂樂都喺度,就興奮咁衝過去。

「比卡超,我好掛住你啊!」因為好耐冇見,樂樂見我衝埋嚟,都興奮咁抱起我舉高。

'唐澤'見我衝出嚟,表情有一瞬間好震驚,但好快就控制住。

「謎擬Q......」謎擬Q都跟住我後邊出現,佢用戒備嘅眼神望住'唐澤'。好似望住獵物一樣,隨時準備想作出攻擊。

'唐澤'見到謎擬Q好似野獸一樣嘅眼神,覺得好熟悉,心臟突然猛烈一跳,頭都開始痛。

「啊.....」'唐澤'痛苦咁抱住頭,感覺到身體原主人嘅意識開始甦醒。

「你冇事嗎?冇事嘅話,我有啲急事要做,要走先。」樂樂一邊抱起埋謎擬Q安撫佢,一邊關心'唐澤'嘅情況,心裡面忐忑不安。

「唔可以。」唐澤輕聲講,佢低下頭,令樂樂睇唔清佢而家嘅表情。

「咩話?」樂樂一時間聽唔清剛才唐澤講咩。

「你唔可以帶小精靈佢哋走......」唐澤強忍住頭痛,抖震咁伸出手,想搶返我同謎擬Q。

「比卡!」我好擔心唐澤嘅情況,所以想跳出樂樂嘅懷抱,去唐澤身邊。但身體俾樂樂堅堅抱住,走唔到。

「對唔住啊,但只有佢哋先救到油油......」樂樂感覺到正常嘅唐澤已經返嚟,所以對佢嘅擔心都減少咗一大半。樂樂急促咁講完,就直接抱住我同謎擬Q跑出去。

「等等!」唐澤想追上去,但感覺到頭痛加劇,令佢雙腳冇力咁跪喺地下。

許諾言並唔知道樂樂同唐澤係咩關係,亦都唔知道而家係咩情況。但見佢哋起爭執,下意識就幫樂樂嗰邊。所以佢嘗試去同身體嘅原主人搶身體嘅控制權,幫樂樂拖延時間,令佢可以抱住小精靈逃走。

當許諾言回過神,佢嘅靈魂已經離開咗唐澤嘅身體。唐澤見樂樂成功逃走,佢握拳頭,大力打向地面洩憤。

許諾言意識到自己已經死咗,而家只係一隻鬼。佢唔知唐澤聽唔聽到佢講嘢,但都心虛咁問唐澤:「你有冇事?」

「哈哈......有咩可能會冇事啊!」唐澤而家真係嬲到就快爆炸,而且樂樂嗰邊睇怕已經出咗事,所以先呃佢俾返小精靈佢。

如果唔係呢個靈體搶咗自己嘅身體阻事,唐澤一早就可以睇穿樂樂,而且根本冇可能將小精靈交俾佢。唐澤最憎人哋破壞佢嘅計劃,令事情走出佢嘅劇本。

所以佢根本唔得閒去怕呢個陌生嘅靈體,反而係許諾言俾暴躁中嘅唐澤嚇一嚇。

「我唔知你係邊個,你上我身有咩目的,但唔好阻住我。」唐澤拎起車匙同背囊,想追上樂樂,搶返小精靈。
已有 0 人追稿