野味小精靈: 波音蝠
「嘟嘟......嘟嘟......」唐澤上咗車之後，就一直打電話，但對方依然冇接聽。
許諾言見唐澤皺起眉頭，一臉唔耐煩咁，所以好奇咁問：「打俾邊個啊？」
「樂樂......但冇人聽......」唐澤有啲不詳嘅預感。
「可能佢未起身呢......」許諾言其實都有少少擔心咁望向唐澤。
「去你屋企一轉先。」唐澤將車裡邊導航嘅目的地由上水，改做樂樂屋企。
唐澤心情有啲急躁，許諾言呢個靈體嘅出現太突然。雖然令佢哋嘅勝算增加，但同時都打亂咗唐澤嘅計劃，令佢算漏咗一樣好重要嘅嘢。
敵方係咩人啊？中共？黑警？佢哋嘅行為一向係無賴，有咩可能會俾時間樂樂去準備。佢哋要捉嘅目標係樂樂，而家只係唔小心捉錯人，所以唔排除聯絡唔到嘅樂樂已經有危險。
有許諾言嘅帶路，我哋先可以順利去到樂樂屋企。我已經好耐冇返屋企啦，所以興奮咁喺精靈球跳出嚟，第一個跑到門口。
「比卡超，我講過幾多次唔可以隨便出精靈球？」唐澤用威脅嘅眼神望咗我一眼。
我聽到之後身體一震，都有啲心虛同怕俾唐澤話。所以雙耳下垂，用水汪汪嘅大望住唐澤，希望佢原諒自己。但我扮可憐嘅表情，唐澤根本望都唔望，反而係抬手，輕力咁敲幾吓樂樂屋企嘅門。
許媽媽聽到敲門聲，即刻緊張咁去開門。而我見到許媽媽，就興奮咗跳入佢嘅懷抱撒嬌。佢下意識抱住我，驚訝咁問：「比卡超？咁悅悅呢？」
許媽媽抱緊我，戒備咁望住唐澤：「請問你係？」
「你好，我係許忻悅嘅同事啊，請問佢有冇返到屋企？」唐澤溫和有禮咁問，呃許媽媽話自己係樂樂同事，令佢唔洗咁驚先。
「冇啊，我都好擔心，等咗佢成晚都未返。係咪又出咗咩事？」許媽媽緊張咁問。
「唔洗太擔心，我會幫手搵佢。而家怕佢被捕，而你同世伯自己喺屋企，我怕如果警察上門，你哋會唔識處理。我寫低另一個同事嘅電話俾你哋，你哋去搵佢先。」唐澤喺背囊拎出紙，寫低龜龜嘅電話交俾佢哋。
「唔該曬你，麻煩你啦。」許媽媽感激咁對唐澤講。雖然樂樂身為記者，之前都成日俾黑警逗，同埋試過被捕。每一次許媽媽都好怕，但好彩樂樂嘅同事同手足都會幫手。
「唔洗客氣，樂樂一定會安全返嚟。」唐澤堅定咁對許媽媽講。
「比卡超，行啦。」唐澤接手抱住我，轉身離開。
離開之後，我乖乖地走返入精靈球。而唐澤就決定即刻行動，開車出發去救人。
「一陣許諾言你入去探路先，盡量睇吓搵唔搵到樂樂佢哋嘅位置，同埋記住啲路。晏就三點前，無論搵唔搵到都返嚟同我講聲先。」唐澤對眼前嘅一團黑影講。
如無意外嘅話，叫身為靈體嘅許諾言探路應該係最安全。但唔排除班黑警做得衰嘢多，怕其他冤魂搵佢哋報仇，一早有曬防範。
許諾言自從剛才見返屋企人之後，心情就變得有啲沉重。當日831所發生嘅事，冇人會估到。估唔到再一次同屋企人相見，已經係陰陽相隔。
許諾言一直都好內疚，就咁就掉低佢哋離開。自己嘅離開，一定令父母好傷心，所以今次一定要好好保護樂樂。佢想像唔到如果連樂樂都離開，父母以後嘅生活會有幾痛苦。
「無問題。」距離目的地越嚟越近，都慢慢開始遠離市區。許諾言有啲緊張咁望住車外嘅風景，見到沿途嘅路人越嚟越少，都開始覺得不安。
「喺呢度放低我啊。」許諾言思考咗一陣，決定早少少落車。
「距離目的地仲好遠喎。」唐澤聽到之後，有啲驚愕。
「我ok，你喺前邊士多等我啦。」許諾言堅定咁講
唐澤喺士多門口停車，然後打開車門，俾許諾言離開。
「等等啊！你把聲好似好攰，真係冇問題？」許諾言只係走咗幾步，就俾唐澤叫住。
「冇事。」許諾言望住一臉擔心嘅唐澤，安撫咁笑一笑。雖然而家嘅唐澤睇唔清楚佢嘅表情，但許諾言啲聲音可以令人覺得安心可靠。
「咁好啦，你自己小心啲，有唔對路就返嚟先。」唐澤都感覺到四圍太少路人，有啲古怪。所以沉思咗一陣，唯有點頭同意。
唐澤目送許諾言離開，但心裡面依然有啲不安。
「比卡超......你可唔可以幫手跟上去，睇住許諾言？」唐澤轉過身，問坐喺後座嘅我。
「比卡？」我有啲疑惑咁擺一擺頭。
「驚唔驚啊？」唐澤打開車門。佢而家都好忐忑不安，唔放心唐澤，但都唔放心我。只要我唔願意，佢都唔會迫我去冒險。
「比卡！」我雖然驚，但依然點一點頭。然後望一望四圍有冇路人，見冇人，先快步咁跳出車外面，追上許諾言嘅腳步。
「唉！」唐澤揉亂自己嘅頭髮，深深咁嘆咗一口氣。
其實唐澤都唔想要比卡超去冒險，但聽聲音聽到，許諾言嘅狀態唔太好，自己又唔方便陪佢一齊去探路。如果論性格同體質嘅話，由同樣係幽靈體質嘅謎擬Q陪住許諾言去探路，會更加合適。
但謎擬Q而家係對家要捉嘅目標，只要仲未落喺佢哋手上，樂樂同黃思暫時都唔會有危險。如果由謎擬Q去冒險，風險太大，唐澤賭唔過。
比卡超性格就好似小朋友一樣，鍾意撒嬌，又唔太識控制自己嘅超能力，俾人感覺唔太可靠。但而家可以陪許諾言去探路嘅，只有佢。雖然唔放心，但唯有大膽賭一次。
唐澤一直心不在焉，擔心樂樂佢哋嘅情況。唯有落車買支嘢飲，散吓心。
「呢個位開舖都幾少人路過喎，平時有冇生意啊？」唐澤買完嘢飲，隨口問士多老闆一句。
「唉......之前都仲有嘅，但呢個月唔知點解，一行近隔離座山啊，就聽到啲好恐怖嘅怪聲。夜晚仲勁，變咗附近啲人未唔敢行近呢邊囉。」士多老闆一臉煩惱咁講。
「唔係吓話......」唐澤擺出一個完全唔信嘅表情。
「真嫁，啲聲好似有鬼怪咁。靚仔你都唔好喺附近留太晏啦，好危險。我而家都寧願早好多收舖，早啲返屋企算。」士多老闆認真咁講，完全唔似呃人。
怪物啊？
唐澤望住士多老闆指俾佢，有奇怪聲嗰座山嘅位置，正正就係許諾言佢哋行嘅方向。
清晨溫和嘅陽光，對許諾言嚟講格外刺眼。隨住時間越嚟越接近中午，陽光越嚟越猛烈，佢開始感覺到有啲暈。
許諾言純粹依靠自己嘅直覺行，我默默跟喺佢後邊，但佢完全冇發現。
我跟住許諾言，不知不覺行咗上山。四圍陰森恐怖，我忍唔住越跟越貼住佢。
「吱吱吱吱......」
我抖動一吓長耳仔，隱約聽到遠處傳嚟大量奇怪嘅叫聲，有啲似初生嬰兒嘅喊聲，但又唔似係。
「比卡！」我嚇到撲去許諾言嘅方向，想抱住佢隻腳。但我嘅身體穿過佢嘅靈魂，直接仆倒落地下。
「比卡超？點解你跟埋嚟？」我嘅叫聲令許諾言回過神，佢發現自己已經身處喺山上面。
佢環視四周，四圍都係高大而密集嘅樹木，完全分唔清方向。明明而家係朝早，陽光完全俾樹木遮住，只能夠喺樹葉之間透到小部分落地面。
幽暗嘅環境，反而令許諾言清醒咗唔少。因為唔知方向，唯有一直向前行。
「行啦，比卡超。」許諾言回頭，發現我依然企喺原地，所以提醒我跟實佢。
「比卡......」我對住許諾言用力搖搖頭，唔敢跟過去，因為佢所行嘅方向咁啱就喺怪聲傳嚟嘅方向。
「做咩？」許諾言行過嚟，關心我嘅情況。
許諾言只係聽到樹葉嘅「沙啦沙啦」聲，而完全聽唔到怪物一樣嘅叫聲 ，所以奇怪我點解唔肯向前行。
「吱吱吱吱吱吱......」嗰班怪物好似發現咗我哋嘅存在，以極快嘅速度咁向我哋嘅方向前進。叫聲越嚟越大，越嚟越近。
「比卡！」我反應快，即刻向反方向跑。
「比卡超！」許諾言見我逃走，都快步追上我。好快，連佢都聲到嗰班怪物嘅叫聲。
「吱吱吱吱吱吱！！！」
叫聲密集，而且好似喺腦裡邊不停迴響，聽到人頭痛，而且難以集中精神思考。
許諾言一邊跟住我逃跑，一邊回頭望身後嘅情況。遠處有大量黑影向我哋飛嚟，佢有一瞬間以為只係雀仔群。但下一秒，怪物一樣嘅生物已經就快飛到佢眼前啦。
速度太快啦，以許諾言同我嘅逃跑速度，一瞬間已經會被班怪物追上。
「趴低啊！」許諾言對我大叫，可惜已經大遲啦。佢知道自己無法去逃走，所以自暴自棄咁合埋眼。但因為佢係靈體，所以班怪物直接穿過佢。
「比卡！」我已經被怪物推跌，然後感覺到背脊被咬住，我痛苦咁大叫一聲。回過神，已經發現自己被凌空扯起。
呢班怪物嘅外形有啲似蝙蝠，但身型就同我差唔多。深藍色嘅身體，淺紫色嘅耳蝸同翼膜，有兩條又細又長嘅尾巴。完全見唔到佢哋對眼，嘴大大咁擘開，口嘅面積好似佔據曬佢哋成塊臉。可以清晰睇到佢哋尖銳嘅四粒利牙，極高威脅同危險性。
因為幾年前好興Pokemon Go，所以許諾言一眼就認出佢係裡面嘅煩膠......波音蝠。
「比卡......比...卡......」我不繼用力搖晃自己嘅身體，想掙脫。但越掙扎，波音蝠就咬得越緊，鮮紅嘅血液慢慢喺我被咬嘅位置流出嚟，一滴一滴咁滴落地下。
「比卡超！」許諾言緊張又心痛咁望住我，而我都委屈咁同佢對視，用濕潤嘅大眼向佢求救。
許諾言好後悔以前冇玩多啲Pokemon Go同睇小精靈圖鑑，佢除咗小精靈嘅名之外，其他都一無所知。
佢冷靜咁觀察四圍嘅波音蝠，發現佢地飛行嘅位置好古怪，盡量避開樹葉間照射落嚟嘅陽光。加上蝙蝠天生怕光，所以佢好快就估到啲手嘅弱點。
「比卡超！用十萬伏特！」許諾言提醒我。
「比卡超！！！」我毫無猶豫咁聽佢講，使出十萬伏特。威力好強大，電火照亮咗成個山林。將附近樹木都燒焦，令陽光照射入嚟。
其他波音蝠見陽光，都即刻逃跑返洞穴。重穫自由嘅我，因為受傷而無力，凌空嘅我直接向下跌。許諾言伸手想接住我，但我依然穿過佢兩隻手掌，重重咗跌落地下。
許諾言無奈咁嘆咗一口氣，然後起身，想幫我搵止血材料。但佢一轉身，就發現身後企咗一堆人。
「啪啪啪啪！」
聽到鼓掌聲嘅我努力抬起頭，就見到我呢生最怕嘅男人，正企喺遠處，雙眼發光咁望住我。