野味小精靈: 再次被捉
喺另一邊，川朴越接近辛先生喺香港嘅臨時研究所，就越多波音蝠出現，阻礙佢前進。
「可惡......」川朴煩躁咁閃避佢哋嘅攻擊。
其實波音蝠好好對付，只要一直開住強光電筒行，佢哋已經會自動避開。但救人需要低調行動，川朴如果開強光電筒，就會即刻被人發現。
「邊個？」
一直看守住研究所嘅黑警發現外邊嘅波音蝠聲音突然好嘈好暴躁，佢以為係自己啲同事唔記得拎電筒就出咗去。佢雖然都怕咗呢啲怪物，但只要打開電筒，波音蝠基本上唔會攻擊佢哋。
佢小心翼翼咁推開保安室嘅門，忍受刺耳嘅聲音行出去。
「呃......」黑警仲未反應過嚟，已經被人打暈。
川朴除低身上嘅長袍同埋蛇獴面具，換上黑警嘅衣著。換完之後，佢表情好嫌棄咁自言自語：「好嘔心，著爛泥怪制服一定係我呢世嘅最大恥辱。」
四圍都係濃郁嘅化學物品氣味，夾雜住一絲嘅血腥味。川朴合埋眼，認真咁聞血腥味傳嚟嘅方向。居然連化學物品都蓋唔住啲味，到底呢個地方殺害過幾多異見人士。
川朴雖然經歷過唔少同伴嘅生離死別，但每一次面對生死，心情都相當沉重。
佢根據血嘅氣味，嚟到平時黑警嚴刑逼供嘅大房。地上有未乾嘅血漬，受傷嘅人應該仲俾幫黑警拖住行，喺地面形成一條長長嘅血路。
川朴順住血路，搵到樂樂所在嘅房。樂樂四肢都被人用索帶索住，隱隱咁坐喺木櫈。眼同口都被黑布蒙住，後腦嘅血未完全止住。頭冇力咁垂低，安靜到好似完全冇生命咁。
「老師？」川朴見到既熟悉又陌生嘅身影，不禁有啲心酸。
川朴嘅老師叫許忻悅，係一個好溫柔，好受人敬重嘅人。因為做記者嘅時候，踢爆小精靈嘅秘密，未來嘅三十年都會被中共嘅人通緝，逃亡到外國生活。
但佢依然好重視香港嘅事，喺外國成立咗唔同嘅組織，都救助無數被政治逼害嘅香港人。收養好多父母因運動被捕同傷亡嘅孤兒，川朴就係其中一個。
見四圍看守嘅黑警出奇地少，川朴大膽咁打暈曬佢哋。用兩支鐵線熟手咁打開困住樂樂嘅門，行到樂樂身邊想叫醒佢：「老師！老師！」
「哥？我係咪死咗啊？」樂樂聽到之後，頭微微抬起。以為自己已經死咗，所以先聽到自己哥哥把聲。
川朴聽到之後呆咗幾秒，記起老師以前提過，自己嘅樣同聲越大越似佢已經離開咗嘅哥哥。所以老師一向對自己好似親生仔咁，特別照顧同重視。
「你仲未死啊！我而家即刻救你出去！」川朴幫樂樂解開索帶，孭起，準備帶佢離開呢個地獄。
川朴身上嘅通訊器突然發出黃色嘅耀眼光芒......
「川朴！」通訊器傳出黃思焦急嘅求救聲。
「比卡！」我痛到大叫一聲。原本昏迷嘅我，重重咁跌落地面。
有一隻波音蝠即刻咬住我後頸嘅皮肉，想帶我去其他位置。雖然佢咬住我嘅力度並唔大，但我對波音蝠始終有心理陰影，所以我不停咁掙扎。嗰隻波音蝠一鬆口，我再一次跌落地面。
身後都好嘈，到底發現咩事啊？
「走啊！」身後傳嚟一把焦急嘅女仔聲。
我仲未反應過嚟，已經被雪拉比抱住，再次飛起。佢見就快被敵人捉住，即刻轉過身，身體伸出兩條綠色嘅樹滕攻擊後方嘅人類。而旁邊嗰隻波音蝠都幫手，喺大口中發射深紫色嘅污泥炸彈攻擊敵人。
呢刻嘅我先真正清醒過嚟，睇清楚而家嘅情況。
旁邊嘅波音蝠係剛才救自己嗰隻，所以先搞到滿身傷。雖然外表唔同咗，但根據佢身上嘅感覺同氣味，可以百分百肯定佢就係我喺武漢研究所嘅朋友，蝙蝠仔。
辛先生佢哋因為睇到網上嘅即時消息，所以帶咗大量人手去啟暴龍剛才降落嘅地方調查。所以川朴救樂樂嘅時候，先咁少人看守，咁順利。
佢哋發現我哋之後，就即刻展開追捕。剛才黃思喺逃走嘅時候跌倒喺地下，所以先唔小心將我掉落地。
見到雪拉比同蝙蝠仔雖然都受咗重傷，但都擋喺黃思同我面前，搏曬命咁戰鬥，保護我哋。我忍住痛支撐起身體，加入戰團，保護黃思。
黃思知道我哋三隻小精靈都受咗重傷，單單依靠超能力，堅持唔到好耐。佢想起身逃跑，但隻腳扭到，連企喺身都有困難。
原本黃思唔想騷擾川朴救樂樂，所以一直堅持住唔咁快求救。但而家先求救已經太遲，被迫到絕路啦......
黃思雖然有啲絕望，但依然雙手緊緊咁合實，好似祈禱咁。捉實川朴俾嘅通訊器，大叫：「川朴！」
通訊器瞬間發出黃色嘅耀眼光芒，照亮咗眼前一片嘅山林。所有人驚愕咁停住動作，目光集中喺黃思身上。直到光芒消失，四圍並冇咩特別嘅變化，而川朴都冇出現。
「哈哈哈哈......很有趣。幸好你剛才沒有死，看來遇到什麼奇遇了。」辛先生貪婪咁望住眼前嘅雪拉比。
「辛先生，雖然我們已經阻止那張照片在網上瘋傳。但依然有傳媒收到消息，現在已經在封鎖線外。」旁邊嘅助手提醒辛先生。
「香港的傳媒真麻煩，跟蒼蠅一樣。加大封鎖線，盡量不讓他們發現波音蝠牠們。」辛先生皺起眉頭。
其實佢唔太介意波音蝠被公開，所以先放佢哋通山飛。因為中央已經決定咗，波音蝠遲早都會用作軍事同鎮壓示威，但而家公開比預計中早。
而且好似出現咗唔少嘅驚喜，辛先生打算捉雪拉比同啟暴龍去研究多一段時間，先公開小精靈嘅事。
「啊！放開我！」身後嘅傳嚟黃思痛苦嘅聲音。
幾隻死黑警趁住雪拉比、蝙蝠仔同我一時唔注意，走到我哋身後搞偷襲。捉住黃思，威脅我哋。
我哋俾人包圍住，而黃思又喺佢哋手上。我唔敢輕舉妄動，只能夠警惕咁同佢哋僵持。
而家呢個情況已經有啲絕望，恐怕又要俾佢哋捉返研究所。逃走嘅呢段時間雖然唔長，但同樂樂佢哋一齊生活嘅日子，係我一生中最快樂嘅時光。
辛先生行到黃思面前，強行擘開黃思嘅緊握嘅拳頭，搶走佢手上嘅通訊器。
「川朴！川朴啊！」黃思被黑警壓住，但仲未放棄，不斷掙扎同叫川朴嘅名。
我正準備投降之際，突然一個黑影快速喺我眼前閃過，撞向一個神色疲累嘅研究員身上。嗰個研究所再次抬起頭，雙眼發出同剛才唔一樣嘅神彩。
「砰！」
佢臉上浮現出詭異嘅笑容，然後瞬間衝上前。佢握緊拳頭，用力打向捉住黃思嘅黑警，再用身體撞開旁邊嘅幾個同伴。
無論係我哋，定係辛先生嗰邊嘅人，對呢個突發情況都相當之震驚。被打嘅黑警回過神之後，即刻還手。而剛才仲拳拳有力咁打人嘅研究員，身體好似瞬間無力，被打倒喺地。
而旁邊又有一個黑警，用拳頭打向自己人。你一拳我一腳，有一部分人好快就開始內訌，辛先生都嚇到即刻後退到安全嘅地方。對而家混亂嘅情況一頭霧水，都冇力去阻止。
現場嘅人都睇唔靈體，只有我同雪拉比睇到穿梭喺敵人身邊，不停上人身嘅許諾言。
「哈......哈......」不停上人身，對許諾言嘅精神造成好重嘅負擔。佢再嘗試咗幾次，但都已經失敗。
雖然敵人有一部分喺度內訌，但仲有部分敵人冇受影響，所以佢未可以完全放鬆。
「比卡超！」黃思突然激動咁叫我。
「比卡？」當我回過神，我兩隻耳仔已經被身後一個研究員趁亂捉住，佢將我掉入特殊嘅籠裡面。一入籠裡面，身體即刻變得好沉重。
「比卡......超！」我嘗試使用電擊，但身體嘅超能力被壓制，完全用唔到。我不知所措咁用水汪汪嘅大眼望向黃思同許諾言，向佢哋求救。
許諾言原本見我被人捉住，佢嘅神情都好緊張。當見到捉住我嘅研究員身後仲有一個細小嘅身影，佢就放心咁勾起嘴角，露出笑容。
「謎擬Q！」我聽到外面傳嚟謎擬Q嘅聲音。然後有一塊大布包住我同身邊幾個敵人，四圍瞬間陷入黑暗。
「謎擬Q......」隱約見要黑暗中嘅謎擬Q，真身好似怪物一樣，露出一排尖銳嘅獠牙，用可怕嘅叫聲威嚇敵人。
「啊！」見到謎擬Q真身嘅人類都會尖叫同暈低，而同樣身為小精靈嘅我，都被佢嚇傻咗，身體好僵硬。捉住我嘅研究員嚇到鬆開手，我就連埋個籠一齊跌落地，先令我回過神。
「比卡......」我痛苦咁叫。籠實在太堅硬，就算被重重跌落地，都絲毫無損，我依然被困裡面。