野味小精靈: 遲到嘅英雄
唐澤同其他記者都喺封鎖線外，唔清楚裡面嘅情況。但因為封鎖線內出現咗特殊情況，令原本喺外圍看守嘅黑警大部分都加入增援，人手都變少。
「辛先生，外面的警員快要擋不住那些黑記。要不我們先撤退再想想辦法......」研究員見到眼前混亂嘅情況，擔心牽連埋自己。
明明黃思佢哋嘅人數咁少，偏偏生命力好似曱甴咁強，想捉返去都捉唔住。
「放他們回去，你覺得神奇寶貝嘅研究還能保密嗎？」辛先生鄙視咁望向說話嘅人。
「抱歉，我考慮不周詳......」研究員都心虛咁低下頭。
「沒關係，公開只是早了一點，並不影響。既然最後也是要公開，不如趁在把全部波音蝠放出來，給黑記一個教訓吧！」辛先生想像到個畫面，就露出殘忍嘅笑容。
「而這個女孩早就應該死了，再補幾槍吧。」辛先生喺旁邊嘅黑警身上拎出手槍，對準瞓喺地面嘅黃思。
「等等！」同黃思相距有啲遠嘅許諾言發現咗之後，已經即刻衝過去黃思身邊，想救佢。
「砰！砰！砰！」
封鎖線內傳嚟幾聲槍聲，令外邊圍觀嘅人同記者都即刻安靜落嚟。唐澤擔心迷擬Q同許諾言嘅情況，所以一直都留意住封鎖線內嘅情況。聽到槍聲之後，內心更加急躁。
「吱吱吱吱......」
隔咗一陣，聽到裡面隱約傳嚟密集嘅怪物叫聲，唐澤直播中嘅鏡頭都由黑警嘅大頭轉向樹林嘅深處。
「好恐怖.....」
「你哋聽唔聽到啊？」
「咩聲嚟㗎......」
其他人都聽到可怕嘅叫聲，將注意力全部轉到同一個方向。
「吱吱吱吱......」
「啊！」
大量嘅波音蝠喺樹林嘅深處飛出嚟，所有人見到之後都轉身逃跑走避。但波音蝠嘅速度實在太快，好快就飛到人群頭頂，發出尖銳刺耳嘅叫聲。人群不停推撞，有人唔小心跌倒，而發生人踩人嘅情況，現場一片混亂。
唐澤一邊拎住手機開直播，一邊幫手扶倒嘅人。佢根本冇法趁亂走入去封鎖線裡面，唯有先順住人群走。
突然天空刮起一陣大風，將人群頭頂嘅波音蝠吹散。
「啊！」其他人見有更加大隻嘅怪物喺上空，嚇到走得更快。
唐澤隱約見到怪物嘅背脊仲有兩個人影，佢瞇起雙眼仔細睇。然後震驚咁發現其中一個身影好似一個熟人，佢推開人流，跑到怪物下方：「樂樂！樂樂！」
「叔叔？」川朴見到熟悉嘅臉，都有啲驚愕。佢拍一拍啟暴龍，叫佢喺唐澤旁邊降落。
唐澤都冇時間去思考點解自己會變咗叔叔，見到面具男抱住昏迷嘅樂樂，即刻緊張咁問：「佢點啊？」
「你送老師去醫院先，我仲要返去救黃思，遲啲再同你哋解釋！」川朴將樂樂交俾唐澤之後，就拍一拍啟暴龍，趕返去救黃思，留底一頭霧水嘅唐澤喺原地。
唐澤回過神之後，即刻抱樂樂上車，然後趕去醫院。樂樂嘅呼吸已經好微弱，唐澤內心不斷祈禱，為黃思、比卡超佢哋、樂樂、仲有似係好人嘅面具男......
辛先生佢哋最後都成功捉走我、謎擬Q、雪拉比同蝙蝠仔四個，留底垂死嘅黃思一個人喺原地，撤退離開。
「你係......真正嘅死神？」接近死亡邊緣嘅黃思睇到身為靈體嘅許諾言救自己。雖然並冇成功，但依然感激佢。
「你唔會死。」許諾言溫柔咁安慰佢。
黃思好清楚許諾言講嘅係大話，但佢並冇去拆穿佢。
「我啊......一直都以為.......自己唔怕死亡......」黃思回想起自己嘅一生......性格有正義感，但好衝動。
同其他香港人一齊......為咗光復香港，守護自己嘅家，可以唔怕催淚彈、唔怕黑警、甚至唔怕死亡......
一直都係咁以為......
「但......真係好驚......好驚......」黃思年紀仲細，大學都未畢業。仲有好多事想做，好多說話想同家人朋友講，但已經冇機會啦......
自己當時死亡嘅情況，其實許諾言已經唔太記得，而且都冇咩真實感。直到而家見證住黃思離死亡咁近，佢先意識到，原來死亡係咁容易。
「黃思！」
喺高空吓川朴終於搵到黃思嘅身影，即刻降落喺佢身邊。
「醒醒！唔好瞓啊！黃思！」川朴不停拍打黃思滿臉淚痕嘅臉頰，想佢恢復意識。而黃思嘅身邊因為失血過多，開始變得冰冷。
黃思擘大眼，見到川朴之後，後悔咁向佢道歉：「川朴對唔住......我冇好好保護......比卡超佢哋......」
「蠢材！你要先保護好自己！」川朴粗魯咁鬧黃思。佢輕輕抱起黃思，然後放上啟暴龍嘅背脊，趕去醫院。
許諾言默默咁望住佢哋離開，內心有啲怕，唔敢去面對死亡。
到醫院門口，川朴落地後抱起黃思，衝向急症室。
「我......可唔可以睇吓......你嘅樣？」黃思喺川朴嘅懷抱，迷惘咁摸佢嘅面具。
「嗄......嗄......當然唔可以啦！仲要......仲要留返喺煲底見㗎！」川朴喘住氣拒絕，唔想黃思咁快完成心願。希望佢可以為咗未了嘅心事，堅持耐啲。
「係啊......」黃思真係好攰好攰，雖然唔捨得，但都慢慢合上雙眼。
放上病床之後，推入急症室急救。
「黃思！擘大眼啊！你仲未知我真名同真樣，你未來仲要搵我㗎！」川朴終於除低臉上嘅面具，拍打住黃思嘅臉，但黃思再都俾唔到反應佢。
明明仲差少少......但黃思等唔到......
「先生，節哀啦......」醫生同護士登記死亡時間，然後對表情呆滯，仲未回過神嘅川朴講。
「可惡......」川朴後悔咁跪喺地下。
如果當初聽到黃思求救就即刻趕過去，佢根本唔洗死。如果及時除低面具同講佢知自己嘅真名，佢根本唔洗帶住遺憾走。
但發生咗嘅事，已經冇如果......
心情低落嘅川朴神情呆滯，不停重複聽住黃思喺頸鏈度留底嘅最後留言。
「川朴！救命啊川朴！」
頸鏈裡面傳嚟黃思絕望嘅求救聲，仲有混亂嘈雜嘅背景，越聽就越後悔，越聽越心痛。
「砰！」
頸鏈裡面嘅留言到此為止，川朴握實拳頭，力度大到好似就快出血。川朴對自己冇遵守承諾，冇及時趕去救黃思好自責。
「我應承你......我係絕對唔會放過佢哋......一個都唔會......」川朴低住頭，安靜噉企起身，走出醫院。
而醫院裡面接受咗唔少被波音蝠襲擊或者人踩人受傷嘅記者，四圍一片混亂。川朴眼尾都冇望過佢哋，一心一意向前行，行返去樹林嘅方向。
佢依然戴住染血啲蛇獴面具，身上披住黑色長袍。因為打扮古怪，吸引咗唔少路人嘅注意。但因為氣場太過強，太得人驚，所以路人都係自動自覺為佢讓路。
而送完樂樂去醫院，確保佢安全嘅唐澤都趕返去自己嘅崗位。佢拎住直播嘅電話匿喺角落，一邊閃避波音蝠嘅攻擊同埋逃跑嘅人，一邊用鏡頭對準混亂嘅畫面。
當見到川朴嘅身影慢慢行到混亂嘅中心，佢下意識叫住佢：「喂！」
川朴冇理到佢，長袍裡面拎出皮鞭。
「咻！」
皮鞭劃破空氣，發出好大嘅聲音。無論人群定係波音蝠群都好似瞬間靜止，眼定定噉望向川朴。
其中一隻波音蝠回過神，主動衝向川朴，作出攻擊，而其他波音蝠都眼住佢一齊上。
「啪！」「啪！」「啪！」
川朴用自己輕盈敏捷嘅身手輕鬆避開，然後用手上啲皮鞭打向波音蝠。
「吱吱吱！」
只係一瞬間，已經有幾十隻波音蝠被川朴打落去，發出痛苦嘅哀鳴。但川朴完全冇收手或者留情嘅意思，瘋狂噉揮舞住皮鞭，好似喺度發洩。
優雅敏捷而又血腥暴力嘅畫面，放喺川朴身上完全冇違和感，佢就好似一隻殺紅咗眼嘅黑豹。一邊揮舞住皮鞭，一邊向住辛先生所在嘅臨時研究所直衝。
唐澤拎住手機拍到呢度畫面，都覺得好意外。見到川朴一直快速向前衝，佢盡全力追上去，但依然追唔到佢嘅身影。
而家嘅川朴，腦海不停回響住黃思求救嗰陣，絕望噉叫佢個名嘅聲，打向敵人嘅動作都越嚟越順手同兇狠。
「快點阻止他啊！他只有一個人，你們怕什麼？對他開槍不懂嗎？」辛先生匿埋喺研究所，當知道川朴居然可以單人匹馬殺入嚟，佢心裡面都開始恐懼。
「他......佢動作太快......瞄不準......」下屬甩甩咳咳噉答。川朴俐落嘅動作根本唔係正常人類可以做到，令人忍唔住畏懼。
「一群垃圾！」辛先生對呢橦落後又咁易被人入侵嘅建築物好嫌棄。拎起困住我嘅籠放上車，而佢嘅下屬都拎住雪拉比、謎擬Q同蝙蝠仔跟上去。