野味小精靈: 94

「你......」辛先生呢一刻震驚到講唔到完整嘅說話。

而家用槍指住佢嘅表面係佢嘅下屬，但其實已經畀身為靈體嘅許諾言睇準時機上咗身，而且仲暗中開鎖放返我同謎擬Q佢哋。

「比卡！」我哋幾個跑上去將辛先生圍住，我嘅臉頰都開始釋放電流威脅眼前呢個曾經令我無比恐懼嘅男人。

「辛先生吓話？你所做嘅事我全部都知道。」喺未來世界，辛先生呢個名已經臭曬。而身為未來人嘅川朴自然都有聽過佢事蹟，無論係過去定未來。

「收手喇......」趁住未來嘅錯事仲未發生......





「哈哈......收手？我還沒有輸啊！」辛先生聽到川朴嘅說話之後，突然瘋狂大笑，所有人都被佢嚇到塞一塞。

「因為你一句收手？要我放棄？別作夢了！我能爬到現在的位置，你知道我付出了多少嗎？」辛先生已經痴咗線喇，為咗自己想要嘅嘢，佢可以連命都唔要。

「你嘅自私仲有中共嘅野心害死咗咁多人，值得咩？」川朴完全唔能夠，都唔想去理解呢班人。

「他們會死，是因為冇能。」辛先生雖然被敵人圍住，但完全冇低頭嘅意思。

「你呢個賤人！都係因為你......都係因為有你呢種人生存喺世上，先有咁多無辜嘅人會死！」許諾言雙手因為激動而不停抖震，手上嘅槍向住辛先生嘅頭想扣動板手。





「能者生存是定律，無論在野外還是人類社會。」辛先生閉起雙眼等待，但許諾言因為過唔到良心嗰關，遲遲唔敢落手。

直到聽到強烈嘅風聲接近，有幾架直升機停喺佢喺嘅頭頂。許諾言發現之後，驚恐噉同川朴對視一眼。

「哈哈哈哈......我原本還看好你是個人材，但原來也是個冇能的垃圾。能殺我的時機已經過去了，現在換你們要死了。」辛先生對川朴露出奸笑。

許諾言快手噉用手臂箍住辛先生條頸，槍頭緊貼住佢嘅太陽穴，然後叫川朴逃走：「你快啲走！帶埋比卡超佢哋，仲有許忻悅！佢仲喺醫院度啊！」

「噉你呢？」川朴快速抱起我哋幾隻小精靈，將我哋放曬喺啟暴龍嘅背脊。





「我都已經死過一次，仲有咩好怕啊？」許諾言露出一個自嘲嘅笑容。

「好喇......」已經冇時間畀川朴思考太多，佢騎上啟暴龍嘅背脊飛上天。啟暴龍避過射向佢嘅子彈，撞開阻住佢前進嘅直升機。

「雖然唔知你身份，但希望你幫我保護許忻悅離開香港！佢係我最重要嘅妹！」許諾言抬頭對住川朴嘅背影大嗌，雖然唔清楚對方聽唔聽到。

「我知道喇......」川朴好似自言自語一樣回應。

許諾言一個人面對住十幾個指向自己嘅槍同無數嘅敵人，居然唔覺得驚，佢只係露出一個無奈嘅苦笑。

佢其實係想親自保護自己嘅家人，帶佢哋離開香港呢個令人又愛又恨嘅地方......只可惜自己太冇用......

許諾言閉起雙眼，迎嚟第二次嘅死亡。

「砰！」「砰！」「砰！」