《夾出一個她》: 第一集-浚彥與楚翹

注意：本故事不是甜故

隔離嗰個係我老婆，佢同裏面啲公仔一樣都係夾返嚟嘅。
-
呢個故事正正發生喺上年聖誕假期前嘅時候…
-
「阿哥吖！我喺筲箕灣天悅訂咗啲美甲產品啊。但係呢，我今日約咗啲friend出街呀，你幫我去攞吖！」
-
「行過去好近咋，自己去攞啦！我陣間要返工啊！」
-


「唔好啦，學你話齋，行過去好近咋。唔該你啦，靚仔阿哥！」
-
「哎！是但你喇！」
-
我叫歐陽浚彥，同我講嘢嗰個係我阿妹-歐陽蕊心。我阿妹最叻就係點我做嘢，仲成日話咁樣係幫我訓練第時去照顧女朋友喎。
-
「仲有1個鐘，應該趕得切返工嘅。」
-
我父母之前因為交通意外而喪生，由於我屋企再冇任何經濟支柱，身為阿哥嘅我就當然要負啲責任啦。我每日放學就去屋企樓下嘅宵夜鋪打工，直至第二朝。雖然朝早返學，夜晚打工。放得工嚟都已經第二朝，其實冇乜時間瞓覺。所以我秉承學校嘅精神「學校是我第二個家」返學嗰陣時先瞓。
-


雖然我今年係中六，仲有幾個月就要考DSE。但我嘅成績一直都唔係幾好。而且老師都知我嘅目標唔係讀大學，所以老師都冇乜出聲話我，任由我繼續上堂瞓覺。
-
說時遲，那時快，行到天悅，細細個嘅回憶湧現；諗起細個同父母去3樓睇車，sweet到爆。只可以慨歎歲月不饒人、珍惜眼前人。
-
幫阿妹攞完嘢之後，見仲有啲時間，就行一行天悅，回味一下細個嗰陣時嘅幸福。咁多年嚟，呢度都冇咩變到，同以前一樣：暗暗黃黃嘅燈光、冷冷清清嘅商舖。
-
沿著扶手電梯落到一樓，突然有間鋪頭嘅招牌閃咗一下，充滿好奇心嘅我行過去睇。
-
「What？我冇睇錯吖嘛！」
-


呈現喺眼前係一間夾公仔鋪，雖然商場入面有夾公仔鋪係好正常，但招牌上嘅5隻大字深深吸引我；黃底黑字，寫住：「夾出一個她」。
-
我眼前一亮，雙眼發晒光。行到入鋪頭，充滿時代感嘅裝修、震耳欲聾嘅音樂呢度通通都冇。呢度只有簡陋嘅裝修，搖搖欲墜嘅吊扇。喺鋪頭側邊有一部兌換代幣嘅機器同埋得一部普普通通嘅夾公仔機，同樣黃底黑字，都係寫住「夾出一個她」。夾公仔機嘅窗框仲黐住一張A4紙，印住：
-
「你想夾女朋友返屋企嗎？而家就有機會俾你夾走個女朋友走，只需50蚊，包你夾中！」
-
我見仲有時間，就唱咗啲錢玩一玩。失敗咪當交下夾公仔嘅學費囉。
-
夾咗幾次就夾咗粒蛋出嚟，我打開粒蛋，入面得一張紙，印咗一個QR-code。我攞我部電話一scan，唔駛一秒就彈出咗一個Instagram帳號。
-
正當想dm個女仔時，鋪頭後面塊布突然拉開咗，呈現喺我面前嘅係一個妙齡少女，你冇睇錯，我冇講錯，係女呀，係靚女呀！我哋兩個四目交投、面面相覷。
-
女仔突然開口問：「你係咪會做我男朋友㗎？」
-
我呆咗一下，之後女仔又話：


-
「我離家出走，而家無人無物，你可唔可以收養我啊？求下你啦！」
-
我諗咗一陣，反正收留佢對我同阿妹無乜壞處，同埋屋企多一個靚女喎，當然好啦！
-
「你唔介意我屋企有個阿妹同屋企比較亂就得㗎喇！」
-
「我當然唔介意啦，原來你有阿妹㗎！你屋企一定好熱鬧㗎！睇你個樣應該係好阿哥嚟嘅！行啦！快啲啦！我搵到我嘅著落點啦！」
-
女仔開心到拖住我跑落樓，我紅都面晒。話晒A0嘅我從來未試過俾女仔拖住呀嘛，而家仲要係大街上拖住㖭。
-
佢拖住我去到附近嘅一間賓館攞番佢啲行李，同賓館職員做埋啲退房手續之後，我哋就一齊行番屋企。
-
「係呢，仲未問你你叫咩名㖭，我叫歐陽浚彥吖！」我膽操操開聲咁問。
-


「我叫顏楚翹呀，呢緊呢段日子就好好拜託你。你放心啦，我會俾足膳食費㗎！。」
-
「膳食費呢啲嘢你唔駛擔心，我唔係好介意嘅。不過我想知嘅係，點解你會離家出走嘅？」
-
「呢度唔方便講，可能附近有人監視，返到屋企再講。」
-
「吓？」
-
轉眼間，我哋兩個返到屋企，阿妹問做咩帶咗個女仔返嚟。楚翹即刻搶答話：「佢係我男朋友，由而家開始住喺呢度，請大家多多關照喇！」
-
阿妹：「What the…」
-
（待續 To be continued）

IG：chingchingstory