阿妹好似有啲唔係好接受到突然間有個女仔住喺我屋企。我急急腳向阿妹解釋:
-
「嗱!是咁的。佢叫顏楚翹,佢因為離家出走,而家無家可歸,佢只可住喺賓館。你睇下佢幾慘,一啲家庭溫暖都冇。咁你都唔想一個咁靚嘅女仔無家可歸㗎!反正屋企有間空房,所以佢就住暫時住喺到喇!」
-
起初我以為阿妹一定反對,點知…
-
阿妹:「唔緊要啦!反正屋企多一個人可以熱鬧啲,幾好吖!你好呀楚翹,我叫歐陽蕊心,係歐陽浚彥個細妹!如果阿哥對你唔好,記得同我講啊!我會幫你懲罰佢㗎!」
-
楚翹:「咁多謝你哋嘅招待先喎!係呢,你哋屋企人唔會反對我喺度嘅咩?」
-


我:「我哋嘅父母喺之前嘅交通意外喪生,所以屋企最大…」
-
話口未完,阿妹突然開口講。
-
「阿哥呀!你今日唔係要返工咩,六點半啦喎!」
-
「弊,今日發生嘅事實在太突然,唔記得咗要返工㖭!我而家出門口喇!」
-
楚翹:「你去邊度返工,我跟埋你去呀!」
-


宵夜店門外。
-
宵夜鋪老闆:「浚彥,你做咩帶個女朋友仔嚟啊!」
-
我:「佢唔係我女朋友嚟,佢係我朋友嚟㗎。佢話要睇住我返工喎,你照計佢食嘢錢得㗎喇。」
-
楚翹:「邊個話我嚟係睇住你返工,我都要一齊返工啊!老闆,點樣面試呀!我想見工呀!唔好睇我係女仔嚟,我搬搬抬抬都冇問題㗎!」
-
宵夜鋪老闆:「哈哈!後生仔女真係精力十足。你係浚彥嘅朋友 ,唔駛面試啦,你就跟浚彥學下點樣燒串燒啦!」
-


楚翹:「多謝老闆,我一定唔會令你失望㗎!」
-
呢間宵夜鋪係喺我屋企附近嘅,鋪頭細細間、提供一啲沙嗲串燒同埋車仔麵。由於好難請人,所以鋪頭除咗我之外,就冇其他員工。連老闆同老闆娘都要落埋場幫手,老闆負責車仔麵而老闆娘負責落單同埋收錢。
-
我住嗰度就係出名食宵夜嘅太安樓。一到夜晚啲人就落嚟食宵夜,而且出名到連其他區嘅人都嚟試一試地道嘅宵夜。當然除咗好多人幫襯之外,仲有…
-
楚翹:「嘩!呢度有曱甴同老鼠嘅!?」
-
我:「呢度咁多食肆,有曱甴老鼠係好正常㗎喇,唔滿意你咪走囉,門口喺嗰邊。」
-
其實我唔想佢喺度,話晒過門也是客,費事要佢咁辛苦啦!
-
楚翹:「唔使,我係唔會走㗎,我係唔會辜負老闆對我嘅期望㗎!楚翹你得㗎!加油ush!」
-
我:「真係服咗你!」


-
趁著鋪頭無乜人,老闆喺我耳邊講咗句…
-
「係咪你女朋友啫?人少少咪認咗佢囉!人又靚、服務態度又好、又上進。你同我好好對待佢呀,第時等你請我去飲㗎喇!」
-
呢一刻 ,我完全唔知俾咩反應老闆,不過透過今日短短嘅幾個鐘,我都覺得佢係一個幾好嘅女仔;佢唔怕辛苦、虛心學習,遇到唔明都好有禮貌咁問我同老闆。而且明知佢驚曱甴老鼠都表現得唔驚。
-
轉眼間,旭日初升。經過一晚嘅詳細教學之後,楚翹已經識燒串燒,而且佢都喺老闆面前試燒咗一次,燒出嚟嘅質素拍得住已經燒咗三年嘅我。想當初我用咗幾日先燒得好,佢淨係用咗一晚就學識點樣燒好啲串燒,又真係有啲慚愧㖭。
-
老闆:「恭喜你呀,你已經通過咗測試,隨時可以嚟返工㗎喇,你得閒就嚟幫下手,陪下浚彥,順面減低下男朋友仔嘅工作量啦!」
-
楚翹:「多謝老闆,我第時一定會俾心機返工㗎喇。不過呢,浚彥真係唔係我男朋友嚟。我哋係普通朋友嚟㗎。」
-
老闆:「得喇得喇!我知道喇。咁你幾時再開工?我哋呢到真係好缺人手,啲後生仔又唔肯做埋啲咁辛苦嘅工作。」
-


楚翹:「嚟緊我都會跟浚彥一齊返工㗎!佢返工,我就返㗎喇!」
-
老闆:「咁即係星期一至星期日啦,好攰㗎喎,呢度人工唔係好多,你得唔得㗎?」
-
楚翹:「放心啦老闆,我頂得順㗎喇!」
-
老闆:「咁聽日見喇,唔好遲到啊!」
-
楚翹:「Bye Bye喇老闆,聽日見!」
-
行緊屋企嘅時候,楚翹開口問我。
-
「啱先喺屋企嗰陣時你未講,點解你屋企人會喪生嘅?」
-
(待續 To be continued)




IG:chingchingstory
已有 0 人追稿