《夾出一個她》: 第三十集-希逸之家（下）
我：「拿拿淋開波玩switch啦！」
-
希逸：「咦！咁今晚咪要4P？」
-
我：「係吖！唔通5P咩？」
-
希逸：「4P好，4P好。」
-
我：「你又諗咗啲咩呢？」
-
希逸：「4P可以玩得激烈啲囉！」
-
我：「明明呢句好正常，但出至你把口，就變咗好鹹濕。」
-
希逸：「4P梗係刺激啲啦！4個人一齊揸賽車比賽喎。」
-
阿妹：「點吖！你班鹹濕佬講完啲鹹濕嘢未吖！天黑喇！車都未揀吖！」
-
我：「係咪衰吖你！掛住講鹹濕嘢，又唔揀車，而家我哋俾人鬧喇！」
-
希逸：「你冇份嘅，你唔好姓歐陽喇，你改名姓賴啦！」
-
楚翹：「兩位，我哋揀完車喇！連轆同滑翔傘都揀完，你哋可唔可以快少少呢？」
-
我：「係！我哋即刻揀！」
-
希逸：「係！幫緊你，幫緊你，好快好快，轉個彎就到。」
-
楚翹：「揀快啲啦！吖~~~」
-
我：「幫緊你幫緊你，好快㗎喇！」
-
阿妹：「識唔識揀車㗎你！」
-
希逸：「揀完！之後揀場。大家有咩心水？」
-
楚翹：「我想玩彩虹賽道吖！」
-
阿妹：「機場嗰條賽道都幾好玩。」
-
希逸：「我鍾意揸礦場嗰條線。」
-
我：「大家唔使爭，我哋唔係玩盃，可以每人揀一條賽道嘅。」
-
希逸：「好啦！各選手就位！」
-
「3、2、1 Go！」
-
楚翹：「頂！早咗俾油，放屁㖭。」
-
我：「去到兩秒就嚟轉一秒先撳油門，太早撳會放屁㗎。」
-
楚翹：「如果我揸GTR，我就唔使放屁啦！」
-
我：「如果你揸GTR，你放屁放得仲勁㖭吖！」
-
阿妹：「Mario Kart點會有GTR呢？揸BB車就得。」
-
希逸：「幾位，專心揸車啦！」
-
阿妹：「小心甩尾吖！」
-
我：「你食紅龜啦！歐陽蕊心。」
-
阿妹：「阿哥有冇搞錯吖！恰女仔！」
-
希逸：「蕊心BB，你放心，等我幫你報仇。食屎啦，歐陽浚彥，接招，藍龜攻擊。」
-
我：「Yeah！衝線！第一名。」
-
希逸：「咦！我隻藍龜呢？」
-
我：「而家咪中囉！你講嘢講咁耐，我都衝咗線啦！」
-
阿妹：「冇鬼用，做少少嘢都唔得。」
-
希逸：「講完名之後先用技能會勁啲㗎！」
-
阿妹：「勁啲……輸呀嘛！」
-
楚翹：「係喎！今日我哋搞個IG投票講食飯AA制定男方俾錢好。結果係點？」
-
我：「你唔講，我都冇咗呢回事㖭！」
-
阿妹：「你哋班男人有咩係記得吖！」
-
我：「我淨係記得楚翹㗎咋。」
-
楚翹：「一定係咁啦！」
-
我：「就係咁。」
-
阿妹：「拿拿淋睇結果啦！肯定係男方俾晒錢。」
-
我：「結果出現喇！係……係……」
-
阿妹：「你快啲啦！喺度吊人癮。」
-
我：「係……係AA制啊！恭喜大家。」
-
楚翹：「我寫包單，全部都係仔嚟！」
-
我：「唔係吖！有女投AA制喎！」
-
楚翹：「邊個女仔吖！你有女嘅咩？」
-
我：「冷靜啲！我好專一嘅！嗱！我介紹俾你識啦！安琪就係阿妹啲姊妹嚟嘅。」
-
楚翹：「咁鯨魚呢？」
-
希逸：「鯨魚係我哋班嘅同學嚟，佢有男朋友，做鴨嘅，你可以放心。」
-
楚翹：「咩話！做鴨？」
-
希逸：「喺西環做鹵水鴨吖！」
-
我：「鴨皇做鹵水鴨真心整得好好食，搵日買返嚟食。」
-
楚翹：「好吖！我想知道佢係咪真係叫鴨皇？」
-
我：「係吖！我哋幫佢改㗎！話晒佢做鴨㗎喎。」
-
希逸：「喂喂喂，講清楚啲，係整鴨先啱。做鴨又係第二啲嘢嚟。」
-
我：「都係嗰啲啦！都有個「鴨」字咋嘛！你啱啱咪又係話佢做鴨。」
-
希逸：「哎！搞不清楚喇！」
-
楚翹：「不如聽日去鴨皇嗰度買鴨？」
-
我：「你係咪傻咗？聽晚要返「燒夜店」㗎！」
-
楚翹：「我都唔記得咗㖭！」
-
我：「大家都知今晚肯定玩通宵，如果聽日有人早起身嘅，咪去買囉！」
-
希逸：「嗱！我實起唔到身嘅！你哋去買啦！」
-
我：「朝早買唔到做午餐，咁下次再買啦！聽晚訂咗位去食牛歡喜呀嘛！」
-
希逸：「你唔講，我都冇咗呢回事㖭！」
-
我：「科技使人記憶退化，呢句好啱。」
-
阿妹：「係有女使人記憶退化，因為啲記憶體攞晒去記我啲嘢。」
-
希逸：「梗係啦，我最愛嘅蕊心BB。」
-
呢一晚，大家都玩得好癲，簡直就係瘋癲嘅一晚，玩完Mario Kart就轉戰 1 2 switch，之後轉場，玩PS4。夜闌人靜，大家梗係玩啲恐怖啲嘅game，於是希逸就熄燈，玩一隻聽者恐怖，聞者驚驚嘅 Outlast 2。
-
呢隻恐怖遊戲係一人控制嘅，所以希逸同我就輪流控制主角嘅去向，而女士們就當睇鬼片。而作為男士嘅我哋……嘻嘻！梗係有福啦！咩福利就唔講喇！梗係由大家發掘啦！我講咗各位男士就冇福利㗎喇！
-
玩完呢一晚，亦都正式代表聖誕假期嘅終結。雖然正式嚟講，仲有幾日先開學，因為聽晚「燒夜店」開返，我同楚翹都要返去打工，再冇乜時間去玩。冇辦法啦！搵食啫？犯法㗎？我想㗎？
-
（待續 To be continued）
-
多謝大家支持，《夾出一個她》已經連載到第三十集，實在係唔容易，呢個故事亦都係故事台第一個故事總view數達到10000嘅故事。同時間，加埋呢集故事台連載字數高達100000，再次多謝各位支持。
IG：chingchingstory