《夾出一個她》: 第四十四集-中六倒數
孟治雞：「嘻！你哋早啲出門口就唔使咁趕頭趕命囉！我又唔使為大家做現場口述。」
-
希逸：「你估我哋想塞車嘅咩？」
-
孟治雞：「學訓導主任話齋，明知塞車就早啲出門口呀嘛！」
-
我：「我知道塞車就會早啲出門口啦，我哋就係唔知先差啲遲到咋嘛。」
-
孟治雞：「新一年喇！早啲出門口啦！早少少起身又唔會死嘅。」
-
希逸：「係喇！孟母，返去講馬啦！」
-
平時自己返學就搭82X，架車經西灣河之後直接上東區走廊所以唔會咁遲，但由於今日要同楚翹一齊搭車返學，所以就搭106，呢條線係兜阿公岩道去小西灣嘅，所以就比較塞車。好彩今日有幸運女神-即係楚翹嘅眷顧，所以先趕得切。
-
我哋成班6C每日就喺度鳩下鳩下，喺一個嘈吵但搞笑嘅環境咁過，中六生涯都去到尾聲，唔知我哋幾年後仲可唔可以好似而家咁，傻下傻下去搞笑呢？
-
人生唯一嘅中學生涯，最後倒數兩個月，正式開始。
-
月尾就要考模擬試，預備三月尾開始嘅文憑試。不過文憑試呢啲嘢，對我呢個唔讀書嘅人嚟講，根本就係一張印住幾隻字嘅廢紙，反正自己要返工，而且都冇錢讀大學，不如攞呢段時間去返工賺多啲錢，第時用嚟供阿妹讀書仲好，無謂嘥錢落自己度。
-
［條路自己揀，仆街唔好喊。］
-
每年學校都要做埋啲濕鳩生涯規劃，都唔知做嚟為乜。其實今日都唔知聽日事，我點知未來幾年、十幾年、甚至廿幾年後嘅事。我淨係知道，我而家嘅責任就係返工搵錢，照顧好我嘅屋企人，包括楚翹，供養埋阿妹讀大學，睇住佢出嫁。
-
［吓！你問我點解唔讀上去？傻啦！我根本都唔鍾意讀書，迫自己去讀都冇意思。］
-
隨著距離DSE嘅日子越嚟越近，我嚴重懷疑同學開始有精神分裂，個個上堂操卷操到黐線，加紙加紙加紙，不斷喺度加紙，啲紙就好似唔使錢咁。
-
去到小息嘅時候，個個就玩到癲晒。你係想像唔到小息前嘅五分鐘，同學喺度搏殺，小息就喺度發癲：食嘢、打機、玩水、整蠱人樣樣都有。五分鐘之後，瘋癲嘅同學係即刻坐低繼續瘋狂做卷，完完全全係精神分裂。
-
而我則係怪獸堆中嘅一個和尚，隨遇而安。當大家喺試卷中嘅戰亂之間，我就喺度瞓覺，與周公一齊溫書。
-
「鈴鈴鈴鈴~」
-
孟治雞：「鐘聲響起歸家的信號。」
-
我：「喂！三點幾，食下午茶喇喂。」
-
希逸：「吖！精神吖喂。」
-
放咗學之後，瘋狂操卷嘅同學再次回復正常瘋癲狀態，而我都起身，迎接夜晚嘅活動。
-
由於學校為咗中六同學放學之後可以更加專心溫習，所以一月開始唔俾大家再參與放學後嘅課外活動，原本諗住留低打陣波先返去買餸煮晚餐，然後落「燒夜店」返工嘅我，所以最後都係同希逸就直接去接楚翹同埋阿妹，俾個驚喜佢哋。
-
由於我哋間學校比其他學校早放，所以去阿公岩道嘅交通係非常暢通，唔使15分鐘已經到阿妹同楚翹嗰間學校，去到嘅同時，亦都見到佢哋嘅學生從樓層間行落樓梯。轉眼間，已經有兩個熟悉嘅眼影喺我哋面前出現。
-
楚翹：「B！點解你會喺度嘅？」
-
阿妹：「唔係話屋企等咩？」
-
我：「俾個驚喜你哋呀嘛！」
-
希逸：「驚你掛住我，所以咪特登嚟接你囉。」
-
阿妹：「如果我今日有課外活動，咁你就企喺門口摸門釘㗎喎！」
-
希逸：「間間學校聽日開始考試，仲點會有課外活動呢？」
-
阿妹：「呃唔到你㖭。」
-
楚翹：「唔係吖！今日仲有課外活動㗎，圖書館啲人仲要當值㗎。」
-
阿妹：「係喎！」
-
楚翹：「你唔係圖書館管理員咩？之前都好似見過你喺圖書館當值。」
-
阿妹：「係吖！不過我今日唔使當值，我係喺星期一同星期五當值。」
-
希逸：「我記低先，逢星期一同五就晏啲去接你。」
-
阿妹：「聽日開始考試，放早吖！」
-
希逸：「咁你嚟接我放學囉。」
-
阿妹：「你都黐線，我朝早考完，唔通喺街hea幾粒鐘咩？」
-
希逸：「乜你考試咩？」
-
我：「希逸生，阿妹中三咋，唔似我哋啲中六晏啲先考試㗎。」
-
楚翹：「今日阿妹同希逸都懵下懵下。」
-
阿妹：「唉！冇辦法啦，近朱者赤，近墨者黑。」
-
希逸：「近肥哥者毒，近肥哥者肥。」
-
我：「你係咪想我唔俾你入我屋企。」
-
希逸：「蕊心BB批准就得啦！」
-
阿妹：「唔得㗎！我好聽阿哥講，阿哥話唔得就唔得㗎喇，阿哥係一家之主嚟㗎嘛。」
-
我：「瞓門口啦你。」
-
希逸：「阿嫂你要幫我講好說話。」
-
楚翹：「唔幫你，鬼叫你話我嘅浚彥BB肥。抵你唔準入屋。」
-
「咦！呢位就係你新男朋友喇？」
-
「幾大隻喎，仲要幾靚仔㖭。」
-
阿妹：「同各位介紹，呢兩位係我嘅好姊妹，安琪同慧妍。」
-
希逸：「你好！我係蕊心嘅男朋友。」
-
安琪：「嘩！好大隻吖！你哋點識㗎？」
-
阿妹：「喂喂喂！咪打佢主意啊！佢係我嘅。」
-
安琪：「你都烚戇嘅，講啦！」
-
阿妹：「我哋識咗好耐㗎喇！咪就係之前同你講一齊去海馬公園玩鬼屋嗰個呢，只不過而家先一齊。」
-
慧妍：「唔怪得之前你去完鬼屋返嚟，成日含春咁笑啦！」
-
安琪：「原來收埋啲好嘢都唔分享俾大家，對你好失望囉！」
-
慧妍：「唔緊要，芯姐請我哋食出pool飯補數啦！」
-
阿妹：「窮吖！請你哋食屎就得。」
-
（待續 To be continued）
IG：chingchingstory