《夾出一個她》: 第四十三集-開學
楚翹：「即學即用，叻仔吖！」
-
我：「瞓啦！再唔瞓就真係變柒頭㗎喇！」
-
楚翹：「阿妹嗰邊咁大聲，好難瞓得著。」
-
我：「咁佢哋臨瞓前冇得望住對方，包容下啦！」
-
楚翹：「嗯！好啦！你都快啲瞓喇！」
-
我：「早唞。」
-
由細到大，我嘅新年願望同生日樣望都一樣，就係要一個女朋友。今日新一年，新景象，我係時候要改下我每年一式一樣嘅願望，今年嘅願望就係希望我同楚翹可以長長久久。
-
［願望呢樣嘢，只係人類嘅慾望，淨係得個「諗」字，又唔去付諸實行，根本就冇可能達成。與其話係願望，不如話係自己嘅目標仲好，起碼自己會肯嘗試去做。］
-
睇完每年都冇變嘅「願望簿」最尾寫俾自己所謂嘅「格言」。都係更正返，我嘅目標係要同楚翹長長久久。
------
我：「各位千金小姐起身喇！新一年，新嘅開始，大家精神啲。」
-
楚翹：「嘩！乜你早咗咁多整早餐嘅？」
-
我：「屋企食慳返好多㗎，今朝特登早啲起身整，俾個新開始大家。」
-
阿妹：「如果以後啲早餐都係咁豐富就好喇！」
-
我：「你試下朝早，眼都未擘大，就去煎蛋、煎煙肉，仲要炸薯餅，食完又要洗，平時食完都係得一個煲、兩個碗加筷子。今日要洗一隻煎pan、氣炸鍋、鑊鏟、仲有三隻碟同叉。」
-
阿妹：「阿哥你唔好好似師奶咁，洗乜都要計啦！」
-
我：「數量都唔係一個大問題，最大問題係啲碟同鑊好油，要唔少時間洗㗎。」
-
阿妹：「係喎！平時食通粉都冇乜油。」
-
我：「咁你哋食快啲啦！我都要洗碗換衫㗎。」
-
楚翹：「係嘅，收到！」
-
我：「翹B唔好食咁耐喇！我哋要趕巴士返學，呢度冇司機接送㗎。」
-
楚翹：「好快㗎喇，我暴風式吸入緊㗎喇。」
-
阿妹：「阿哥你趕唔趕得切㗎？」
-
我：「應該趕得切嘅。」
-
楚翹：「你哋兩個一齊返學嘅咩？」
-
阿妹：「正確啲嚟講係搭同一班車。」
-
我：「你再唔食快啲，我就冇得同你哋一齊返學。」
-
楚翹：「乜我哋係可以一齊返學咩？」
-
阿妹：「可以吖！我哋可以一齊搭106，我哋喺大潭道落車，阿哥就搭去小西灣先落。」
-
楚翹：「彥B唔係搭82X仲快咩？」
-
我：「冇辦法啦！要同你一齊返學呀嘛。」
-
楚翹：「搭106唔會兜好耐咩？」
-
我：「會吖！咁你仲唔食快啲，我會遲到㗎。」
-
楚翹：「好快，好快，幫緊你。」
-
阿妹：「希逸係咪都搭106㗎？」
-
我：「如果佢起到身，就應該係嘅。」
-
阿妹：「希逸會唔會唔知醒㗎？」
-
我：「好難講，佢係例牌遲到嘅人嚟。嗰次約佢喺筲箕灣食早餐，食完搭車去露營，佢住附近都遲到。」
-
阿妹：「等我打俾佢先。」
------
阿妹：「喂！起身喇喂！」
-
希逸：「起咗喇！食緊早餐喇！」
-
阿妹：「食咩吖？有冇我呢邊煮得咁豐富先？」
-
希逸：「梗係有啦！我食餐蛋麵加多士。」
-
阿妹：「阿哥今日超正，起身整西式早餐，不知幾正。」
-
希逸：「叫肥哥外賣過嚟啦！」
-
阿妹：「佢啋你都傻啦！拿拿淋食喇！轉頭巴士站見啦！」
-
希逸：「不見不散。」
------
阿妹講緊嘅電話嘅同時，楚翹都用佢嘅嘆世界慢活食法食完嘢，趕時間嘅我就用單身十七年嘅摩打手洗碗，然後用小學嗰陣時訓練有素嘅三十秒著校服技能，著校服。
-
一悉間，我由一個住家男人，變成一個返學嘅莘莘學子。
-
新一年嘅第一日，巴士站早已企滿等巴士嘅學生同打工仔，而希逸都企咗喺巴士站迎接我哋三個，巴士徐徐入站，前面嘅乘客魚貫咁逼上車，而我哋排喺隊嘅中間，應該都逼到入去，臨上車嗰一刻……
-
「彥仔？」
「澄叔！？」
-
坐喺駕駛室嘅司機，原來係澄叔，澄叔揮一揮手，示意我哋唔使拍卡。上完客巴士已經再企唔到多個乘客，澄叔撳著駕駛室嘅「客滿」燈制。「咇」一聲，車頭嘅「客滿」字眼發光，所以之後嘅車站都冇再停站，直飛筲箕灣道。
-
直飛筲箕灣道嘅同時，沿途車站嘅乘客都展露一種渴望上車嘅表情，可惜巴士再容納唔到再多嘅乘客，而喺巴士上面嘅我哋就好舒服咁企喺車頭，望住澄叔揸車。
-
巴士緩緩登上柴灣長命斜，代表兩位千金準備落車，兩位女士就好似為佢哋嘅老公餞行，展露出一個依依不捨嘅表情。
-
唔知係咪開學日嘅關係，沿途都係非常之塞車。巴士攀山涉水 ，兜兜轉轉終於都到小西灣，距離學校打鐘得返一分鐘。
-
唉！我都係唔講喇！將現場旁述交俾喺課室嘅孟治雞先。
------
閘開喇！兩隻雙腳馬貼住外欄繞過架巴士奔跑，見到前面有盞綠色燈閃下閃下，兩隻雙腳馬即刻加速，開盡turbo全力衝刺！嘩！都唔知佢哋係咪阿婆嚟。正所謂「阿婆行得快，一定有古怪。」呢兩隻雙腳馬越跑越快，兜過唔同嘅行人障礙。
-
最後五十米直路，左邊矮啲白色衫嗰個歐陽浚彥開始頂唔住喇！漸漸同隻高馬，亦都係白色衫嘅希逸拉遠個距離。最後十米，兩隻雙腳馬出盡人生嘅力氣作最後衝刺。
-
「鈴鈴鈴鈴！」關閘嘅鈴聲響起，兩隻遲到馬都好準時咁到學校。我哋聽日再為大家呈獻《小西灣一日一度嘅雙腳賽馬》，多謝各位。
------
我：「你真係幾無聊㗎喎，攞啲就嚟遲到嘅人講笑。」
-
（待續 To be continued）
IG：chingchingstory