《夾出一個她》: 第六十六集（結局）-楚翹與浚彥

由唔小心喺筲箕灣天悅廣場夾走咗楚翹之後，唔經唔覺都過咗五個月，從嚴寒到初夏，我哋三位中六準畢業生都已經考完DSE喇！
-
考完文憑試，係時候要兌現我嘅承諾，正式同楚翹結婚，今次唔再係喺屋企玩角色扮演、再唔係講下笑、再唔係為咗氹佢而做，而真係確確實實咁去婚姻登記處簽紙，成為我真正嘅老婆。
-
「我請在座各位見證，我-歐陽浚彥，承諾願意與妳-顏楚翹為我合法妻子，我願對你承諾，從今日開始，無論順境定係逆境，富有或者貧窮，健康抑或疾病，我將永遠愛你，珍惜妳直到天荒地老。我承諾我將對妳永遠忠誠。」
-
無論喺屋企，定抑或喺婚姻登記處，楚翹聽到我親口對佢嘅承諾之時都係眼濕濕，而我都忍唔住自己嘅眼淚，流咗一篤感性嘅男兒淚，不過喺我哋兩公婆喊之前，阿妹同安琪已經喊到不似人形，就好似係自己嫁出去咁。
-
［承諾係一時，照顧係一世。］
-


我哋兩個都唔想將結婚件事搞到咁大，費事俾楚翹屋企人知道，萬一佢哋嚟踩場，掃我哋興就唔好啦，所以我哋都淨係約咗一班三五知己，睇住我哋簽紙、夜晚一齊食個飯就算。
-
但係正當我哋喺婚姻登記處簽完紙，諗住喺門口影相之際，楚翹嗌咗一個唔應該喺呢度出現嘅人個名……
-
「阿媽，呢度吖！快啲過嚟影相吖！」
-
咦！我冇叫楚翹媽嚟喎，我明明知道佢哋仲冷戰緊，兩個都互相唔啋對方㗎，佢哋幾時和好㗎？
-
楚翹：「浚彥，希望你唔好介意我叫埋我阿媽嚟！」
-


我：「完全唔介意吖！不過你哋兩母女幾時和好㗎！」
-
楚翹：「之前突然諗通咗，諗返阿媽當時都係想為我好啫，而家係我嘅大日子，點可以唔叫我阿媽㗎！」
-
顏太：「你哋肯接受返我呢個唔稱職嘅阿媽就得㗎喇！」
-
楚翹：「係喇長氣，一齊影相啦！叫你睇住我哋簽紙又唔嚟睇。」
-
顏太：「留返啲時間俾你哋班後生仔自己玩啦！遲到總好過冇到嘅。」
-


見到楚翹都可以放低對佢屋企人嘅仇恨，我都好欣慰，憎恨咗咁多年，都可以放低，真係唔容易。其實我完全唔介意楚翹媽嚟，甚至我自己之前都想用準新郎呢個身份邀請楚翹屋企人參加我哋嘅婚禮，奈何我驚楚翹唔鍾意而撤回呢個諗法。不過有啲嘢由楚翹開口係好啲嘅。話使我係外人，難免會有隔閡嘅。
-
［有啲人，就算佢對你幾差都可以原諒，因為你相信佢會改過自身；但有班人所做嘅事，一世都唔可以原諒，呢啲人渣究竟係邊個？我相信唔使多講，自己心照啦！］
-
最後，我哋簡簡單單嘅婚禮就喺紅棉路婚姻登記處出面就搞掂，冇行禮、冇搞婚宴、冇邀請一大班人出席。雖然好似好hea，但最緊要嘅楚翹喺度就得啦！係咪？
------
楚翹正式成為歐陽家嘅一份子之後，我哋都開始會返去楚翹位於半山嘅屋企同楚翹屋企人食飯，楚翹嘅屋企人亦都逐漸咁接受我呢個唔係貴族世家出身嘅女婿。雖然楚翹媽想我哋返嚟住，一家人溫馨、熱鬧啲。但我都一一拒絕楚翹媽嘅好意。
-
明明楚翹難得逃離惡魔嘅魔掌，唔通仲送佢返入去咩？再者，我都會俾人一齊昅實㗎。雖然楚翹屋企真係好舒服，要乜有乜，但我都係鍾意細小嘅蝸居，大家相處得仲融洽，唔使乜都咁介懷。
-
［如果你係我，你會揀住細屋定大屋呢？不過住大屋嘅條件係會俾人監視，昅到實一實喎！］
------
七月放榜後，我決定同楚翹兩個去澳門唞一唞，而阿妹同希逸就留喺香港渡過佢哋最後嘅時光……因為希逸決定去外國讀書，而阿妹就畢業之後先同希逸於外國再續前緣。
-
趁著得我哋兩個小情侶喺度自己獨處，而我哋都喺澳門獻出我哋嘅「第一次」……玩笨豬跳，又真係幾好玩嘅，兩個手拖手，望住夕陽跳落去。玩嘅時候踏出我哋嘅一步，但感情就晉升一大步。


-
其實我哋兩個一直傾過，想要一個小朋友，所以喺夜闌人靜，難得又冇其他人阻住晒嘅時候呢……就當然有啦！嘻嘻！
-
［至於有咩，你懂的，費事多講啦！］
------
兩年後嘅聖誕，我帶住楚翹同我哋個女，一齊行過筲箕灣天悅廣場，重遊舊地。呢度同以前一樣，暗暗黃黃嘅燈光、冷冷清清嘅商舖。再次回想返細細個嘅時候，已過身嘅父母帶我去三樓睇車，超級幸福，完全感受到父母俾我嘅愛同溫暖。到而家作為人哋老竇，唔再淨係感受幸福，而係要帶幸福俾我嘅小朋友。
-
［手牽手跨過白雪，春風吹花卉，重塑著最初的一切。］
-
沿著電梯落去，之前夾走楚翹嗰間「夾出一個她」嘅舖頭依然喺度，到而家都係夾公仔鋪，不過夾嘅，再唔係一個好老婆，而係一堆冇感情嘅公仔，唔知再有冇人可以咁好彩喺夾公仔機夾出一個老婆呢？
-
呢個係我一生人最引以自豪嘅事，每次同朋友傾計都係咁講：
-
『隔離嗰個係我老婆，佢同裏面啲公仔一樣，都係夾返嚟嘅。』
-


《夾出一個她》全文完。
-
外傳、後記將於三月發佈，敬請留意。

IG：chingchingstory