返到劇情,大家係食完嘢之後就已經10點鐘左右,大家都開始眼訓,表面上都非常之攰,每一個人塊面上面都掛住一個憔悴嘅面容,眼神十分之空洞,我有一刻真係以為佢地係個班感染者嘅一員,佢地嘅眼神真係十分之可怕,但同時又十分之可憐,因為佢地心裏面都好掛住自己嘅屋企人,擔心佢地係屋企會好唔安全,隨時都有被感染嘅風險,我記錄到呢一度,身邊有唔少人已經喊咗出黎。

我依家真係好想播一隻《我怎麼哭了》比佢地聽,雖然佢地依家並唔係失戀,但係呢一個情況,佢地真係好需要一隻差唔多意境嘅歌黎安慰佢地,作為心靈上嘅一個慰藉。好彩依家只係新疫情嘅開端,我仲有呢一個權利去播歌,暫時唔會引黎感染者,好彩好彩,我仲有呢一個令心情平伏落黎嘅渠道。

你唔好以為我呢個做leader嘅好輕鬆,其實壓力並唔細,加上要管理隊裏面嘅另外幾個同學,話你知冇壓力就係假嘅,多少都有微微嘅壓力。除咗我地team嘅三個leader外,仲有5個組員,分別1個男仔同4個女仔,好巧合嘅係,我地隊中正正有兩對CP,同時我嘅暗戀對象都咁啱分配係我嘅隊伍裏面。

我冇特別要求其他人分配佢作為我嘅隊員,而咁啱天意就要我同佢一組,你話啦,呢一種係唔係叫做緣分?

我係得知呢個消息個陣,有開心過一陣,但我又諗起自己並唔可以係呢種咁低等嘅環境草率咁表達自己嘅心理,我只好盡量壓制自己唔好做出一啲容易令人誤會嘅事,扮作若無其事咁去表現自己,其實我都好討厭面具下面嘅自己,明明就係咁不堪,點解要扮作一個擁有咗一切嘅人呢,有時候天真無邪先係呢個世界最需要嘅嘢,但好可惜呢個時代嘅我地,童年已經被沉重嘅課業壓到透唔到氣(顯然我係中一前冇遇過呢種情況,每日都唔需要浪費時間係功課上面,因為完全侮辱咗我嘅智商)所以我嘅童年過得還算寫意舒適,唔似得我班同學咁慘。



思考完人生之後,回一回神,發現已經過多咗半個鐘,依家時間係22:30,附近嘅同學開始傾起往事,同自己蝦過嘅人道歉,表達自己有幾咁後悔,我敢打賭,如果唔係因為末日嘅來臨,佢地係冇可能會做出呢種咁嘅事,果然末日嘅人類更加深不可測,定抑係話變得簡單咗呢?我保持住平日嘅冷靜,深思咗好耐。

(未完待續)
已有 0 人追稿