[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: Ch.6M的第二人格

時間07:10，手機電量70%，我地準時到達彩虹A出口，會合WN，見到佢嘅大背囊，我心生一計，決定再次去到附近嘅商鋪攞物資，眼見前面嘅景象已經變得杯盤狼藉，我地估計係已經有人入侵過，好彩我地係裏面依然搵到食物同飲料，獲得咗一啲急凍食品，杯麵，沖泡飲品（咖啡奶茶華田），仲有少量嘅飲用水，眼見仲有其他嘅物資，我都係手賤攞多咗幾支紅酒同甜酒。
*未滿18歲千祈唔好飲酒，傷身。
「酒精可以麻醉自己」我一直都係咁諗，但諗深一層，「酒不醉人人自醉」呢句說話看似更加合理。攞完物資後，我發現WN攞住咗佢最愛嘅monstXr同埋joXly sandy，並且快速收埋係背囊之中，呢個衰仔，諗法唔會同我一樣啩。
物資再次填滿咗我地幾個嘅背囊，粗略估計都有8kg左右，一包米嘅重量，但都係小兒科，對我黎講冇難道，因為我平時嘅書包點都有10kg左右，我嘅書包比譽為書包中嘅「霸王」，我呢個軍綠色嘅書包好實用，雖然得個兩格，裝唔到水樽，但內裏空間幾大下，裝到唔少嘅嘢，但我同時都帶起咗我嘅行山背囊，完全被比下去，行山背囊真係好大個，裝到嘅嘢係我個書包嘅2.5倍，總共可以裝到20-30kg嘅物品。我地孭住呢一個重如泰山嘅背囊，又要行返200幾級地獄般嘅樓梯先可以返到我地嘅陣地，我地嘅力量完全比呢條樓梯耗盡。「唉！真係蠢，點解我會去埋曬呢啲地方駐守，根本癡線。」我忍唔住抱怨咗一句，點知大家都睥鬼住我，一副想食人嘅樣，我真係嚇到心都離一離。
佢地開始連珠發炮，合力鬧到我無地自容：
「頂你咩，好揀唔揀，死去呢啲地方駐紮，你係咪個腦入咗水啊！」
「雖然真係好唔好意思，但係我選擇呢一個地方自然有我嘅原因，我唔會亂咁黎搏鬧架！你當我係低能仔咩！」我心諗。
口中又講出：「冇計啦，呢個地方又有停車場，前面去到彩虹邨，後面去到九龍灣，鬼咁方便，我地再上少少又可以到西貢同埋順利，又可以到觀塘個邊，咁方便，咁四通八達，去邊鬼度搵返其他咁嘅地方比你地啊，用你地個腦諗下啦！」
佢地沉默咗。
「我係咪過份咗？Sorry!我太激動！」


「頭先唔係我啊，我嘅第二人格黎架！我本身唔想比人知，但見係你地咋我先破例講下！唔好爆響口啊，如果唔係我嘅第二人格會跳出黎復仇，我都唔想見到架，因為佢真係好暴力！所以大家體諒我一下，幫手保密，我到某個時候就會同嗰個人講架啦，我唔可以瞞住佢咁耐！但係有時善意嘅謊言冇辦法唔講一下！對唔住！」
「好啦，下不為例啦！」佢地異口同聲咁講出黎，我估有80分貝以上。
「細聲啲啦，你班死仔！」第二人格Z先生又彈出黎。
「Sorry!頭先我身體又比人搶咗控制權！我會處理一下手，對唔住大家！」第一人格Mr.M講。
佢地聽完都反曬白眼咁，唔知我邊句係真，邊句係假。
（踏~踏~踏~）我地快步跑返去避難所，雖然係快步，但礙於背後嘅大背囊，我地嘅速度仲慢過平時行路。
時間07：30，手機電量68%，電池尚算健康。有驚無險返到連難所。