[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: Ch.13(3)網軍出擊

「好啦好啦，真係驚咗你啊！青梅竹馬嘅好朋友～」佢淺淺一笑。

佢嘅笑容又再一次佔據我嘅心，我此刻淨係識得望住佢傻笑。

「夠鐘煮飯啦，唔玩啦，等陣再算啦。ByE~」

「好啦，你話架～」👈🏻融咗嘅我。

就係咁，佢就落咗去煮飯，唔知呢次算唔算係一次奇妙嘅獨處呢？



又諗起一句歌詞添：「多想把你抱緊處理，你的笑多療癒，讓人生也甦醒。」

時間18:45

今日嘅晚餐尚算豐富，因為樓下班惡魔炸刑，話要食多啲喎！

冇計啦，唯有聽佢地講下啦，費時佢地嬲爆爆走佬啊嘛，真係走鬼咗我都唔知要去邊度搵佢地，冇理由要佢地自己出去送死架，係咪先！我應承咗大家要保護佢地直到疫情（定其實算係災難？）完結架！

不過是鬼但啦，橫掂都係要做架啦！我相信大家都知道我嘅難處！



佢地死咁咗任何一個，我都算係違背咗我自己嘅諾言！

所以都係比多少少好嘢比大家食啦，用美食誘惑人心，往往都係最簡單方便快捷嘅方法，亦都係最慳皮嘅方法，自古「民以食為天」，有得食就係呢一個末世之中最好，最重要嘅事。

喺未食得飯嘅呢一段時間，我再次巡查呢一個地方，再同我呢一班嘅同學傾咗陣計。

同時，我都搵到我哋一班嘅隊長，再安排大家分隊食飯，為免出現其他意想不到嘅情況，例如搶嘢食啊，同埋大家一齊食嘢可能會出現唔同疾病嘅交叉感染啊，我地絕對唔可以比呢一個情況發生，每個人都需要有一個最好嘅身體狀況，唔可以病到死下死下咁，係呢個時勢，好可能一個普通嘅感冒菌都會殺得死人，畢竟街上面少咗平時默默付出嘅清潔工人，衞生情況有夠差劣。

除咗傾呢啲無聊野之外，我地仲討論緊有冇需要上網放帖文，仲有討論區啊，放一啲尋找倖存者嘅資料，等我地呢一個地方變得更加強大，駐守範圍當然都會擴大。



我地唔可以收容一啲毫無用武之地嘅人，佢地黎到之前一定要經過重重嘅面試，要通過先可以接受佢地要加入嘅要求，因為資源短缺，我地要盡量慳（雖然仲有1，2個月存貨，但多個人多雙筷，又要比多一個食飯，我地嘅資源會消耗得更加快，仲有都唔知可唔可以盡信其他唔識嘅陌生人，費時出事。

經過我嘅說明之後，佢地分別去到FB同IG，仲有高登同LIHKG出post，盡可能接觸更加多人，希望真係可以搵到新戰友，新戰力，我地就唔需要繼續孤軍奮戰。

好彩我地嘅followers都唔算少，仲有討論區嘅人流都依然係有，我地應該唔會食白果嘅。

我地即刻洗版咁po（都唔算嘅），順便得到更多新知識，同政府冇話比市民聽嘅資料。

果然唔少人都有喺討論區到開po求救，我地就順理成章將我地整理好嘅據點資料貼上去討論區上面，我地梗係唔會同佢地講個確實地址啦，只係放低咗基本嘅路線，去到彩虹站就已經停低，之後嘅情況就要保持聯絡啦，我地呢度一定會比外面更加人性化，唔會比投靠我地嘅人身陷囹圄，萬一佢係專業人士或者係有特別技能嘅朋友咁就死得，又少一個戰友，你可能會覺得，一個人姐，死咗咪算囉！

呢一個末世啊，再冇辦法用之前嘅諗法架啦。

保護得一個係一個啊，之後嘅倖存者只會越黎越少，並無回升嘅可能性，更加唔係打機，唔可以復活，死咗就係死咗，感染咗就係感染咗，請大家認清事實啦。

每一個身懷技能嘅人都好重要，更加冇可能缺少佢地。



我地要自強，就一定要靠佢地，帶黎更多知識同方法，仲有好重要嘅經驗。

我地亦列出咗一張清單，有寫到少量嘅糧食，加埋少量嘅武器清單，吸引倖存者加入一齊抗敵。

好啦，搞掂，應該好快有飯食。