電話嘅另一頭接聽咗,講嘢嘅係一把略帶溫柔嘅男聲,阿明。

M:「喂,阿明!聽唔聽到?你地個邊點樣啊,係咪同3A佢地做好曬防禦,封鎖曬成個學校村?」急到飛天嘅我。

阿明:「係啊,你又知嘅?同佢地傾過啦?」佢略帶疑惑。

M:「係啊,傾過啦,話說你地leader係邊個啊?物資個一方面都ok嗎?」

阿明:「我地leader啊,咪阿東囉,最有腦係佢啦。物資個度同A班一齊共用咁囉,頂到10日嘅,我地聽日都會開始出外營救同埋物資,暫時唔使擔心。」



M:「你地要救咩人啊,幾多人啊,睇住啲啊,唔好亂嚟。」

阿明:「佢地有啲人話要救家長喎,幾對咁囉,唔係好多人,我地會小心,放心啦。」

M:「咁都好啲,好過我地,人都要救唔少,個個都想救,但又唔係個個都願意去付出,只有我地一班救援隊去做,我地都好無奈。」

阿明:「個個心態唔同,冇計啦,你肯去你就盡力啦,你唔係奉旨要幫佢地架。你問心嗰句,有用盡辦法同氣力就夠,起碼你都過咗自己嗰關先啦。」

M:「又係嘅,盡力啦,雖然救唔到人真係好大挫敗感。承諾過嘅嘢一定要做到,但總會遇到無解嘅情況,總無可能順風順水,根本就無可能。唔好話咩過唔過自己個關啦,好難講架。唔好寒暄住先,你地個邊係點樣計劃之後架。」



阿明:「我唔知啊,一係我比電話阿東你同佢傾?」

M:「ok啊,盡快啦。」

話口未完,電話傳黎另一個人嘅聲音,比起頭先個把聲,呢把明顯比較厚。

阿東:「喂,阿明話你搵我喎,做咩?」

M:「想問下你地計劃咁囉,有冇諗過如果據點失守會同A班佢地,啊,唔係或者咁講啦,有冇諗過你地之後會去邊?



同埋成個慈中比你地食完之後,你地會點樣?會去邊個方向搵新一輪物資?仲有你地武器夠唔夠?同埋有幾多條友真係夠薑同你地出去探索?

我估應該都唔多得去邊啦。」

阿東:「計劃就真係冇咩啦,我估啊,呢度學校村有咁多車啦,我地正常就會去鑽石山方向走嘅,或者向黃大仙都可以,黃大仙就比較四通八達,上去沙田坳道個邊都幾好嘅,多幾個方向比我地選擇,只不過一路上唔會太平安,多數都有唔少感染者,加上我地人咁多。最安全就係落番彩虹會合你地囉,雖然唔係幾好,但呢個係我地冇辦法之中嘅辦法。我地如果要大搖大擺咁走番落黎,應該都死唔少同學仔,其實點都係要死,最多搏一搏,搵多啲武器先。

講起武器我地其實都唔多,依然都係軍刀,大菜刀,仲有鐵珠槍,同埋強光電筒嗰一類囉,應該仲有幾種嘅,不過唔係太記得,遲啲我地同A班一齊出任務,會再搵下。

食完慈中唔使諗架啦,一定都係鑽石山,嗰邊出名多嘢食,多鋪頭,即係資源又多啦,應該都還可以嘅,只不過唔知會唔會撞到其他佔領咗地盤嘅倖存者姐,到陣時又好麻煩。我地C班就得幾個肯出,我啦,阿文啦,阿中啦,十三啦同埋阿火咁囉,唔知佢地A班點樣啦,反正遲早都要出去嘅。」

M:「咁都算好,我地都差唔多,收到曬,最後一句,萬事小心。之後電聯或者WhatsApp傾,趁仲有網絡,不妨用埋最後嘅時間啦。」

阿東:「okay, bye.」

電話掛斷,唔知仲有幾多次機會咁樣聯絡呢,真係世事難料啊。
已有 0 人追稿