[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: CH.19 （2）

時間09:00

我地準時到達約定地點，附近依然空無一人。

我攞起手機，訊號差少少滿格，可能係我最後一次撥出電話。

「你所打嘅電話暫時未能接通，請遲啲再打過啊。」

頂！唔係玩失蹤啊！



突然，一股不祥嘅氣息出現，提醒我地要盡快離開。

「Calling本陣，WN、Alex、阿日依家喺彩虹站外面，懷疑附近有惡意生命體，請本陣立即派人支援！Over！」

我立即通知本陣，感覺中計嘅我，要求兩位隊員架起戰鬥狀態。

「收到！開啟，戰鬥mode！」

意志力MAX！
勇氣值MAX！


攻擊力MAX！

好似打機咁樣，我眼前嘅兩個隊友好似中二病發作咁點滿全部數值，提升到MAX水平。

「Calling，我地係本陣，收到，即到。」

「盡快過黎接應我地，附近嘅感覺唔太好，冇點解，就係直覺。」

我截斷咗對講機另一端嘅下一個問題，呢種多餘嘅嘢，問黎都冇用啦，唔係緊急都唔使搵你地啦！



對講機連線中斷。

有見及此，我地就唔浪費時間，雖然直覺同我講唔好周圍行，等待救援，但係中間嘅五至十分鐘冇理由就咁發夢架！又未肯定對方係真係未到，定係其實已經一早到咗，只係我地殺氣太重，嚇到佢地唔敢出現？或者會唔會係惡意倖存者，想黎「打家劫舍」？


呢啲都係有可能嘅事，對於上面三個可能性我都比較有保留，探索係我嘅強項，又有咩可能放棄所有可能性逃走？咁樣辜負大家，我都會同自己過唔去。唯一搵唔到人嘅好處就係，少幾雙筷咁樣，百害而無一利。

WN：「阿日，Alex！跟實我，唔好甩，維持每個人之間半個身位！我地依家去探索一下先，琴日開始感染者人數暴增，大家要小心，唔好死喺度，多謝合作。如果你地真係釘咗，我唔知點搞好，到時我就對M唔住架啦，所以比啲鬥志，諗下未來自己同女朋友嘅生活！開心嘅嘢，都諗諗！

但係唔好過份FF，我唔係叫你FF，打機機。係要你燃燒鬥志，正值青春嘅你地，仲要體驗下半世嘅生活！」


Alex：「你唔好驚就真，我都未驚過，仲有人等緊我，我唔可以咁快釘蓋。點都同你搏命，但唔會作死。」

阿日：「講呢啲，一齊三二一就去馬啦！」



WN：「夠曬義氣，咁就行啦。」


巴士總站，濔漫住一股氣息，好似同你講緊，「喂，呢度有人啊，睇唔睇到啊。喂，你黎捉我，我教你溝女啊。」

陰陰森森，奇奇怪怪，氛圍都完全唔對路。

我地戰戰兢兢咁樣行入去，每行一步，不安感就增加一分，壓力都隨之增加。

一步，再一步。重重嘅呼吸聲，喺巴士站不斷徘徊，心跳加速。

壓力山大。

頭上已經開始滴汗，淚流滿面。咦，唔係喎，淚流滿面？



控制唔到嘅眼淚竟然爆發，該死！

點解會喊嘅？我自己都唔清楚自己嘅結構。

但我知道，流淚喺此時係罪該萬死嘅。

快啲停啊！快啲停啊！

淚水已經無法停止。

唔應該係咁架！頂⋯⋯

有沙入眼，一定係咁。



「後面嘅兩個隊友，好彩未睇到啫，如果唔係一定會亂軍心。」我心諗。

絕對唔係因為我驚，我唔習慣，驚比人見到之後攞黎笑我。

嗯？附近竟然冇人？

咪住先，隊友呢？

完全問號？

隊友，唔見咗？

佢地就咁悄無聲息咁消失咗。

「唔向左走向右走係啊，玩嘢咩。」我爆粗。



「請求本陣，隊友⋯⋯失蹤，請問⋯有冇聯絡過你地⋯」

對講機另一端，靜如故事中嘅湖面，散發住恐怖嘅氣息。

無回應。

「妖妖妖妖妖妖妖妖妖妖！你老闆！玩柒我。」我忍受唔住，成個人嘅心態半崩潰。

依家本陣又聯絡唔到，隊友又唔見曬，無力。

我希望隊友們係安然無恙，而唔係比不知名人士或者感染者帶走咗。

漫無目的咁行下行下，就咁樣周圍行咗5分鐘，去有可能收埋自己嘅地方搵佢地，又去搵下所謂嘅倖存者，我卻又發現一件好重要嘅事。

四周圍，人影鬼影感染者嘅影都唔見一隻。

講笑咩⋯