果然不消一分鐘,嗰頭打完,十三佢地就翻咗嚟。

「點解你地身上面有血嘅,你地嗰邊都有感染者?」我問。

「點會冇,一兩隻咁,不過小兒科。」十三自信滿滿。

「咁唔好磨時間啦,大家綁好安全帶,我地向目標點出發。」我促他們快坐穩。

「GO!」他們齊聲說。



「唔好咁大聲。」再這麼大聲就一定會出事吧。

我使出學咗冇幾耐嘅行車技術,踏上救援路途。

「揸穩啲啦好嗎。」Alex笑說。

「快就冇咩可能穩到,話曬我冇車牌,唔係專業司機。」我不敢想像在半路上撞車會是怎樣的情況,在這情況下只好一下比一下謹慎。

「不如我開車,你睇下你啲message先啦,同埋你手車真係好差,唔夠膽再坐。姑勿論會唔會撞死,但我都幾肯定會引起唔少動靜。」阿飛說。



「你識揸車?咁當然可以。冇問題。」我立即將球踢到他手中,然後我自行觀看新來的訊息。

「上緊嚟上緊嚟,幫緊你幫緊你。」阿Long—05:27

「你地點樣上去?」我—05:27

「我地揸廢車上去,同埋咩私家車咁囉。仲有兩架單車,俾兩個牧羊人開路。總共12個人。」阿德—05:28

「一個都不能少,兄弟如手足,手足加油。」我—05:28



「數量越嚟越多啦,大家到邊?

依家就快俾佢地兩邊圍攻,我地盡量隱藏,應該就可以等天橋嗰班感染者自己走開。

或者你地可以繞後路先引開前門感染者,之後去到個大公園度落腳。

嗰邊嘅感染者唔多,你可以試下,不過有冇其他倖存者我就唔知啦,小心啲。」Zenia—05:29

「彩虹邨總站會合,我地直踩上去,唔好怯,等等見。」05:30

我完全唔明,佢地明明築起咗磚牆,要如何駕車出外呢?

可能係我聽少咗啲重要嘢?

「阿飛,彩虹總站停,我地會合其他人,如果見到就可以唔使停即刻走。」我通知阿飛。



「會唔會引到感染者架。唔好唔記得,唔止一種感染者喎。」阿飛的大腦很清晰。

若然真係咁唔好彩引到附近嘅感染者全部聚集起嚟,唯有用一種方法去面對,就係汽油彈。

但汽油彈係咪真係夠用呢?就真係成疑啦。

雖然話我地知嘅感染者種類只有三種,但根據咁多套電影嘅橋段嚟睇,呢個可能性真係微乎其微,基本上接近零機率。

今次任務,最大危險,就係未知嘅感染者。

兩分鐘過去,我地已經到達約定地點。

不遠處就見到大家都到咗。



「行啦!」我對阿飛說,然後扭頭向他們揮手示意。

眼見佢地已經開車,我地都一直加速,直接去到AC兩班受困的地方。

沿路上的確見到三兩個感染者,晨早流流啊,佢地都會做早操咩?

定係根本唔需要睡眠?唔需要休息?

未有該方面資訊。

但數量方面,呢個時間的確係少好多。頭先一路過嚟都只係見到不超過10隻感染者,新型嘅感染者又唔係幾覺,可能呢邊真係所謂嘅新手級別。

上去嘅路途亦都唔容易,因為一出巴士站就見到嘅路有非常多嘅雜物,加上有若干架已經報廢嘅車阻擋住路面,我地嘅車輛都未能夠直行直過。

只有靠幾位同學一齊去移除路上嘅雜物,而我地負責前後方嘅警戒工作。



「速速完成,聲浪太大可能會引到一啲未見過嘅感染者出現!」我提醒眾人。

「武器,戒備。前後各企4人,其他唔使搬唔使打嘅朋友唔該留喺車上面,唔好出聲,唔好有任何大動作。」迅速指揮。
已有 0 人追稿