由O Camp組爸組媽變左做真正既夫妻: Chapter 12
我哋到左SU集合，就見到Oscar同Alice（Orinention Community副主席，Year4 Global Business Management，Oscar既女朋友）仲有其他組已經到齊
我：「唔好意思又遲咗少少！」
Oscar：「唔緊要你地攞齊啲嘢未啊？」
Claudia：「準備好啦！」
Oscar：「呢間係你哋嗰間房。總共有兩個房咭！就交俾你同Claudia兩個保管啊！記得聽日走之前俾返我哋就得架啦！」
之後我哋成班人就入咗去今晚住戈間房
間房都幾大夠晒我哋喺到玩到顛，我地就放低晒啲嘢同埋換埋衫
之後就出咗去SU個門口到集合。Oscar同Alice就講開場白
Oscar：「各位freshmen大家好！Welcome to SU O Camp! 我係你哋今日嘅MC兼籌委會主席Oscar！！」
Alice：「我係籌委會副主席Alice，都係呢兩日嘅MC！」
Oscar：「好考下大家知唔知我哋嘅精神係乜嘢？」
大家都搶着答：「搏盡同無悔！」
Oscar：「係啦係啦就係搏盡同無悔啊！！」
Alice：「好啦事不宜遲我哋就馬上開始啦！！而家呢我哋會開始第一個遊戲啦！Are u ready？」
我地全部人：「We are ready！」
Oscar：「首先我地第一個GAME就係玩動物尋親記啦！呢個Game既玩法就係每組就係各自用一種動物語言，然後用口罩蒙住雙眼，再被我地既莊員分散到唔同既位置，而各個人只可用自己組別既聲音同自己既組員相認啦！邊個認得最多呢就為之勝出！」
我地組原來係抽到羊，於是我同班仔女講陣間要用羊咩叫黎搵返我地組既人
講解左之後，之後大家都比班人用眼罩蒙住雙眼，然後被大家分散到唔同既位置
不過可能我地組溝通唔係好夠同埋講得比較細聲，所以呢個game我地組就輸左比其他組。
跟住Alice就宣佈玩第二個遊戲啦，就係「搵鞋」啦！呢個時候我地要除晒啲鞋放係一個指定既地方，然後莊員就將我地所有組既鞋撈亂，要我地係限時之內搵返我地既鞋同著返
遊戲一開始，我地就即刻去搵我地對難。不過唔知係咪我對Vans Sk8波鞋係咪太出名，所以都有好多人著。結果我同Claudia搵左好耐都唔敢確定係咪自己嗰對，最後又係我地組輸。所以我地全組要被人罰食Wasabi。
通常食Wasabi既人都知道如果食得多既話會帶陣攻鼻既氣味直湧鼻腔，然後會標出眼淚水
不過我可能由細到大都食慣左，所以都識點樣去處理呢個問題。但係我見到Claudia好似食到想死，眼淚係咁一直流，真係替佢可憐。
於是我就上前去安慰佢。。。。
我：「係咪好辛苦啊？」
Claudia：「嗚嗚。。。好辛苦好想喊啊！！嗚嗚。。。」
我：「嗱你而家試下用鼻深深咁吸一口氣，然後用口呼出啦！會好啲架！我地一齊做啦！一！二！三！吸氣！呼氣！」
Claudia：「真係好啲啦！多謝你啊！」
我於是用紙巾幫Claudia抹乾佢啲眼淚，唔知點解我總係覺得佢喊完個樣會顯得佢更加可愛。亦都搞到我好似照顧小朋友咁。
完事之後，Alice同Oscar就開始講野。
跟住就係O Camp既重頭戲－－－－Terasure Hunt
Alice：「好啦好啦終於黎到我地重頭戲－－－Tresure Hunt啦！！WOHO！！！！嗱各組呢就要按照你地既路線圖黎玩你地既要玩既game！不過有限時既！你地要係三個鐘頭之內要返到黎啊！邊個最快返黎呢就係最高分啦！同埋會有獎勵架！好啦組爸組媽麻煩出黎攞下路線圖啦！之後就可以出發架啦！WOHO！！！」
Oscar：「各位freshmen係咪好興奮啊？順便補充一下你地係要玩五個checkpoint遊戲！玩完第一個之後我地個helper就會同你地講第二個checkpoint，如此類推！」
我地成班人High到彈起
我同Claudia攞左我地組既路線圖，之後比大家研究吓
好彩今次只係係香港島玩唔使係過海，不過都夠我地玩架啦
聽完指令後我地就即刻出發
首先我地第一站就要落去禮賓府
我地成班人就由大學行到去禮賓府（因為等左好耐都冇車同埋MTR去唔到），但係我習慣叫佢做港督府。
去到禮賓府個Checkpoint之後，就有我地O Camp既helper係到
Helper：「你地係咩組？」
我地全部人大叫：「比卡超與多啦A夢啊！」
Helper：「好啦！我地個Checkpoint Game就係（以X傳物）啦！首先你地會抽到張紙，然後就根據嗰張紙既身體部位再將個氣球由頭傳到尾！中途唔可跌架！」
我：「我同組媽都要？」
Helper：「你地唔使玩，但可以比暗示佢地。限時十分鐘。」
我同Claudia就睇住佢地商量同玩，Claudia行埋我耳仔邊問我：「我地使唔使幫佢地啊？」
我：「唔使住！等佢地自己試下！要比少少信心班仔女！」
Claudia比左個OK手勢我。。。。
班仔女商量好之後，就示意個helper開始計時
真係估唔到班仔女竟然好有默契一次過搞掂
Helper：「好啦！恭喜你地！不過要答一條問題先！HKU總共有幾多個Faculty啊？」
組仔組女：「10個！」
Helper：「好啦！呢個就係下一個Checkpoint地圖啦！加油！」
我地成班人就行去下一個checkpoint，原來下一個checkpoint就係－－－－香港警察總部
唔知點解我地成班人變到好驚，因為係班阿SIR面前唔知做咩。。。。究竟邊個諗出黎架？？？？
不過要黎既始終要黎，唯有虎須山上行
我同Claudia唯一可以做既就係安慰佢地
去到灣仔警察總部，見到另一個helper同一隊PTU警員（一個督察加五個警員）係到
唔知我地個game係咪阻街比警察告"非法集結"呢？？？？
我同Claudia就上前問個helper係咪比人腰斬左個game，點知原來唔係。因為之前SU已經向警方申請左集會，所以就派左隊PTU黎維持秩序
Helper：「你地係咩組啊？」
我：「比卡超與多啦A夢啊！」我就示意班組仔組女過黎
Helper：「好啦人齊既話我宣佈今日既game啦！呢個game就係你地睇住張相，然後就做返個姿勢出黎。組爸組媽都要做埋！」
我地再細心咁睇下張相，原來係一個男要對住一個女仔做一個求婚既姿勢，而其他人要係到扮超人變身
經過一輪既商議之後，班仔女叫我扮同Claudia求婚，而佢地就清一色扮超人
到正式埋位既時候，我就扮到好真心咁同Claudia求婚，用好認真既眼神望住佢。
見到Claudia好怕醜，面都紅埋同忍唔住笑。
而班仔女都識做，係到扮超人變身，最後1 take過冇retake
搞到個helper同班阿sir都忍唔住笑。。。。令到我地都唔好意思
helper：「嗱呢個係下一個checkpoint，快啲去啦！」
下一站－－－原來係人來人往既Time Sqaure，於是我地就搭MTR出發
係搭車既過程中，我同Claudia係到互相對望同係到笑，不過大家都好怕醜。而班仔女係車廂到高談闊論
睇黎佢地已經好friend。。。
我地去到銅鑼灣站就落左車，之後去左Time Sqaure既出口見到我地checkpoint個helper
如果你地平時行開街既都知道由朝到晚既Time Sqaure永遠都係咁多人，我地呢日都唔例外
通常啲人見到我地班大學生係大庭廣眾到玩埋啲game肯定會笑我地低B。。。。。
不過既然做得組爸，就要豁出去！點都要做得好好睇睇！
我同Claudia係到安慰班組仔組女因為呢個game係一生人一次，就算玩嗰陣比其他人恥笑都唔好理。因為香港人係好善忘架！！！！所以轉過頭咩都會唔得架！！
見到個helper，佢就同我地講呢個game就係五分鐘內用啲報紙砌一間屋比我同Claudia住
我同Claudia係到等班仔女去商量點樣砌間屋比我地住
等左一陣，間屋終於砌好，班仔女就示意我地兩個埋位。
不過唔知佢地係咪整到間屋太細，只可以容納到一個人
我就唯有叫Claudia坐我前面，之後為免驚佢郁黎郁去整霖間屋。於是我就攬住Claudia條腰，而我就挨左落佢個膊頭，嗚啊！佢條腰真係好幼。
唔知點解Claudia身上散發住一種迷人既淡香味，搞到我都有少少興奮。而Claudia就係嫣紅一笑
跟住成班組仔組女就係到企晒係我地後面到影相。。。
個Helper就係到幫我地影相：「三！二！一！笑！」。
影完之後，Claudia就係到哼我個頭。「喂啊衰人你捨得放手未啊？」
原來我仲攬住Claudia條腰，之後比成班人圍住我地，搞到我地兩個都唔好意思
Helper：「嗱呢個係下一個checkpoint，快啲去啦！不過要答一條問題先！香港島總共有幾多個區啊？同埋係邊幾個區呢？」
Miki：「中西區，灣仔區，東區，南區。一共四個！」
Helper：「岩啦！好啦走啦！」
我地仔細望個checkpoint，下一站係－－中環皇后像廣場
於是我地落返去搭MTR去中環，出閘後見到有間7-11。見大家都咁攰，於是我就話請班仔女同Claudia野飲
佢地就係到叫好，於是就係張紙仔到落order
Claudia：「不如我陪埋你去啦！我順便要買少少野！」
我：「好啊！ 」
我同Claudia就拎住張Order紙去左7-11到買野。
Claudia係到擰我隻耳仔：「嘻嘻頭先你得米啦衰人！」
我：「Sorry啊頭先咁樣攬住你！」
Claudia：「做咩同我對唔住喎！我都冇嬲你哈哈！嗱你請返我飲野！我請返你食野！咪當冇野發生過啦哈哈！」
我：「唔知尊貴既林小姐想飲咩呢？」
Claudia：「我要Bonaqua樽裝水啦唔該！」
我：「收到！」我都攞左枝水同其他野飲比佢地
而Claudia就買左少量既零食，之後去左比錢就返去搵班組仔組女
班仔女見到我同Claudia獎勵佢地，個心情變得好興奮
跟住我地就入左閘
搭緊車途中，組仔阿Will無啦啦問我野
Will：「係呢組爸你考左車牌幾耐啦？」
我：「都有三年幾啦！我18歲即刻去運輸署到入紙學車啦！」
Ray：「咁個流程係點架？」
我：「首先呢就要牌照事務處到交兩份野。一係學習駕駛執照申請表格，另一份係駕駛考試申請書。到時入form要帶埋身份證同錢。冇亮錯既話Total係1000蚊咁上下。」
Travis：「之後係咪筆試同路試啊？」
我：「Exactly！！如果筆試Pass左就可以拎考路試既排期信。之後就搵師傅學車！」
Quniton：「之後路試係點架？」
我：「首先會有個視力測試，不過如果有近視既話一定要戴眼鏡或者Con，如果唔係會Fail。OK左就要可以上車考試，如果安全返到黎再加上個考牌官冇聲出既話呢就代表你Pass啦！」
Gillbert：「跟住係咪拎所謂既P牌啊？」
我：「係啊！之後就攞P牌架啦！不過要等一個星期先可以去牌照事務處到拎P牌。然後等一年先可以轉正式車牌。」
Travis：「咁你考左私家車啊？」
我：「我考貨Van同電單車啊！因為可以兩樣都揸得，同埋排期會快啲！」
Ray：「嘩組爸你好勁啊！咁你有冇買車啊？」
我：「有啊！之前我有部豐田Corolla 100仔，不過之前因為燒左Engine就劏左架車。之後就換左部二手既掃把佬囉！」
Will：「嘩你咁勁架！咁你冇買電單車啊？」
我：「之前有部Honda既NSR250烈火戰車。不過因為我後期去左英國Exchange，再加上我屋企人都唔揸電單車，所以就用左一年左右就賣左架車啦！之後一直都冇買返電單車啦！」
Quinton：「I see！下次等我地考左車牌一齊游車河啦！」
我：「好啊！到啦我地！」我地於是就落左車
出左閘之後，我地就去左皇后像廣場到搵我地checkpoint helper
Helper：「係咪比卡超與多啦A夢隊呢？」
我：「係啊！」
Helper：「嗱你地呢就要去搵五個外國遊客去影相，之後就比我睇就OK啦！」
好在今日係假期，所以一般都會搵到外國遊客
不過入得HKU既學生既英文水平都唔會差得去邊，所以如果同外國人溝通其實唔難！
所以我同Claudia就比佢地試下，如果搵到既就叫我地兩個埋位
估唔到班仔女既做事效率都幾高，所以我地就好快搞掂搵到10個外國遊客影相
之後就返去比相個helper睇話OK
Helper：「好啦！問你地一個問題先！就係要講其中六間HKU Hall啦比我聽啦！」
Will ＆Sandy：「太古、偉倫、馬禮遜、利瑪竇、李國賢同埋聖約翰！」
Helper：「岩啦！呢個係你地既下一個checkpoint啦！加油啊你地！！」
終於黎到最後一站，就係過對面海既－－－港澳碼頭啦！
我地就於是即刻跑去港澳碼頭，去到售票處到見到我地個helper
Helper：「係咪比卡超與多啦A夢隊呢？」又係呢句。。。。。真係冇咩新意。。。
我地答左係之後，個helper就講解今次個game
Helper：「嗱呢個Game呢就係唱兒歌啦！玩法就係我會唱出指定兒歌同比歌詞你地，然後你地就有半分鐘既時間諗下點樣唱，然後要唱出全首。準備好未啊？」
我地：「準備好啦！」
Helper：「好啦我唱啦！從哇哇一聲睜開眼睛看地球
從懂得緊握媽媽暖的手
到依依呀呀一聲兩聲仍唔夠
從爬爬行行然後曉得走」
個helper唱完之後，Elise就即刻估到歌詞：「我知我知！王馨平既｛生命有價｝！」
Helper：「岩啦！之後就要唱成首啦！」
Elise：「盡快將 憂愁眼睛 憂愁面孔
憂愁內心 拋棄吧
找回你的微笑嘴巴 一同和唱 可以嗎
啦啦啦啦 啦啦啦啦 啦啦啦啦啦啦啦
一同拍掌全力讚賞生存是有價
從哇哇一聲睜開眼睛看地球
從懂得緊握媽媽暖的手
到依依呀呀一聲兩聲仍唔夠
從爬爬行行然後曉得走
從孭起書包吸取知識不用愁
從你有佢有開始手牽手
到它朝開心傷心痛心齊嘗透
人活著實在奇妙怎猜透
願你知生命實在亦是有些意外
不用徬徨迷途只須緊記
它有無窮色彩 它有無盡的愛
願憑著自信垮過障礙賽」
Helper：「岩啦！恭喜晒你地完成所有Checkpoint！你地可以返SU啦！」
我：「嘩Elise你好勁啊識唱呢首歌！」
Elise：「冇啊！我記得以前讀幼稚園嗰陣個Miss成日播呢首歌架！所以我咪記得囉！」
我：「哈哈！好啦我地要快啲返去啦！」
我地於是成班人落返去搭MTR返HKU
去到SU個Office，見到Oscar同Alice仲有其他莊員係到
而其他組就唔係到，我諗應該仲未返到或者去左食野
Oscar：「嘩Aaron你地嗰組咁快返到既？你地破左紀錄喎！」
我：「吓乜我地最快返到咩？其他組呢？」
Alice：「佢地仲未返到啊！得你地組咋！」
Claudia：「真架！有冇獎勵先！」
Alice：「嗱呢箱水比你地補充返啦！然後休息一下啦！記得係SU前個門口集合啊！」
我：「OK！」
我就拎左箱水比班組仔組女飲！不過唔知係咪天氣太熱所以佢地都飲得好急！
見到個箱得返最後一枝，我就比左Claudia飲
Claudia：「多謝你啊！你唔口渴啊？」
我：「你飲先啦！Lady First啊嘛！」
Claudia：「你都飲少少啦！不過要離口喎哈哈！」
於是我同Claudia就一齊Share左枝樽裝水
不過Claudia好論盡，搞到件O Camp衫濕左少少
我於是比左張紙巾佢抹，佢就話：「唔該你喎！」
而其他組呢個時候都陸陸續續返到黎。。。。。