由O Camp組爸組媽變左做真正既夫妻: Chapter 43
「其實唔使送我啦！反正我地聽日會見架啦！」
「唔得！如果唔送你上去既話容乜易連女朋友都冇埋架？我幾辛苦先追到你！我呢世都唔會放手架啦 ！」我摸住Claudia塊面對住佢講。
「頂你講埋咁既野！好啦！就比你返本小姐既香閨啦！但係我好驚我爹地媽咪既反應係點？」Claudia好驚咁講。
「定啲黎啦！有我係你身邊！」
我地兩個上左去Claudia屋企，然後開左門。見到世伯伯母已經係到。
「爹地媽咪我地返黎啦！Sorry咁夜返！」Claudia同佢爹地媽咪講。
「世伯伯母你地好啊！」
「唔緊要。有阿勇陪你幾夜都得啦 ！」伯母話。
「阿勇過黎坐啦！你地今日去？？」世伯話。
「爹地⋯⋯媽咪，其實⋯⋯我同左Aaron一齊左！」突然間Claudia講。搞到我嚇左一驚。死啦死啦我真係好驚佢父母會唔會殺左我？又或者周街唱衰我？明明上次我見到佢地兩個都冇呢種壓迫感架。定啲黎啦！梁智勇！你得既！
「真架？？？幾時既事啊？」Claudia好開心咁問，我見到佢地呢一刻既表情，成功左一半。
「其實⋯⋯只係廿四個鐘頭前既事啊⋯⋯不過我想我地感情穩定啲先講！」我話。
雖然我知世伯伯母好Nice，但係而家我係Claudia既男朋友，所以我講野好緊張，緊張過考DSE。
「一早要啦！阿勇啊世伯伯母想同你講幾句，寶貝女放心啦！我應承你我唔會對你男朋友點既嘻嘻！」世伯伯母講，然後拍我膊頭。然後我地三個就入左去。呢一刻我就好似坐係終院既犯人欄，聽緊陪審團同法官既判決。
入到去世伯伯母間房，呢間房既氣氛就好似終審法院，我就係犯人，法官就係世伯伯母。
「阿勇做乜咁緊張啊？放心啦世伯伯母唔係啲咩怪獸家長黎既！我地份人夠晒Open既！」世伯話。
「不過你知啦我地得林雅晴一個女，我好關心佢識啲咩朋友，我都估到你地兩個一定會拍拖架啦！但係冇咁快姐，但係我知道呢個傻女係對你真心既！」伯母話。
我全程冇出聲，只係聽世伯伯母講野，始終呢到係佢地既主場，唔可以反客為主。
「其實呢我就唔介意個囡識咩朋友既，但係最緊要呢個人正正經經，腳踏實地，正當家庭，人品又好，OK！所以呢你同林雅晴拍拖，我地好放心。」世伯話。
「不過你知雅晴以前男朋友既事架可！？」伯母話。
「我知道！佢有同我講。但係世伯伯母你放心啦！我會好好咁照顧雅晴一生一世，唔會比佢受到任何傷害！」我對世伯伯母發誓。
「嘻嘻！所以我話你地兩個係天生一對啦！你嗰日寧願遲到都要幫我換車胎，就知係一個做事認真、腳踏實地既好男仔啦！好啦我地返出去啦！再唔出去呢個傻妹實發脾氣啦！」
呢個時候Claudia衝左入黎，仲攞埋掃把，十足十管家婆上身。我見到佢淚水係眼睛裡不斷打轉，睇黎佢真係好擔心我被佢父母暴力對待。
「做咩啊BB？」我邊摸Claudia個頭。
「爹地媽咪你地係咪反對我同Aaron拍拖啊？唔好啦！我地唔要分開啊！」Claudia喊晒口咁講，仲下跪埋。
「哈哈當然唔係啦！其實你咁大個女我地都冇法幫你揸主意架啦！如果你真係同阿勇拍拖呢，我同你媽媽好贊成既。」世伯開心咁講。
「係啊阿勇真係一個好男仔黎架！你要好好珍惜佢啊！」伯母講。
「Oh really？多謝爹地媽咪！錫晒你地！」Claudia成個人即刻開心晒。
「我呢？唔使多謝我呢個男朋友架？」
「你唔係呷我爹地媽咪醋啊？」
「講笑咋！我點會呢？不如去你間房啦！」
「好啦BB！」
我同Claudia入左佢間房，之後係後面攬住佢。既然我地屋企四位家長都應承左我地既關係，我相信我地點打風都打唔甩啦！我終於完完全全地擁有Claudia啦！Yeah！
「你做咩攬住我條頸啊？」Claudia問。
「因為會。。。。暖啲囉！」
「哈哈我以為你想食我添？」
「女朋友除左食之外，最重要係錫啊！」
「咁算你都有啲良心！知道女朋友要錫錫。」
我即刻Kiss左Claudia一啖，享受戀愛既味道。能夠同我最愛既女人親熱，係一種是說不出既幸福。
「咁真正愛一個人唔係淨係鐘意佢個樣既，比起樣貌我反而鐘意既係佢既內心。」
「我真係好開心你係我。。。。男朋友！」
「我都好開心你係我女朋友！」
「做咩學我講野？」Claudia問。
「我鐘意，咁樣以後可以同你同聲同氣。」
「不過我想做野同經濟方面獨立少少。你呢？」
「你咁為我著想既？好事黎架！我都想我女朋友可以獨當一面同叻啲既。」
「你唔怕我會叻過你咩？」
「咁大家既專業都唔同好難比較喎哈哈！嗱你係老師，我係律師。大家都係「師」。不過如果你叻過我我唔mind架！」
「哈哈！你快啲比心機做個有錢人啦！之後你要養我！」
「好好好！養你養埋我地個BB！」
「講返正經野先，你聽晚使唔使返學啊？」Claudia問。
「唔使啊，不過要返工啊做咩？」
「想你教我揸車囉。」
「好啊！！夜晚同你食飯啦！」
「好啊！廿四孝哥哥！你做晒你公司啲野啦咩？」
「一早做晒啦！你呢？備課備成點啊？」我問Claudia。
「OK啦！不過我想再睇多一次！因為聽日Prof要視導。」
「不如我做Prof，聽你講書！」我就提議，然後Claudia就點左頭。
呢十幾分鐘裡面，我陪Claudia做Rehersal，另外我建議佢唔好當我係男朋友，只係當我係小朋友，同教授咁樣對待。而Claudia就一直將聽日講書既內容練習一次，而我就係佢面前樂於聆聽，全程注視於佢。Claudia呢一次既講書練習，同時令我諗返起點解以前既中小學老師、甚至大學既Professor都咁討厭我地破壞課堂既紀律，唔專心聽佢地講課。但經過左Claudia呢一次講書之後，我終於明白原來老師呢個職責真係好偉大，當佢地授課，講解每一個Chapter嗰陣，我就知佢地事前其實要準備好多功夫，可能佢地想渴望既回報只係想學生聽教聽話，爭取到合格既成績。但係我覺得佢地只係想得到學生既尊重，無論讀幾年班、咩Faculty都好，有時試下用返對方既角度去諗，我地就會自然好努力去認真對待他人。
聽完Claudia講書，我就覺得其實我既擔心係多餘既。雖然仍有些地方可以有進步既空間，但係以第一次黎講已經好好啦。始終佢經驗不算好夠，但係累積左教學經驗之後，我相信佢會係一個人見人愛既老師。
「我講成點啊？」Claudia問。
「幾好啊！唔錯啊！」
「你係男朋友既身份講啊？還是用視導老師既身份講啊？」
「用梁校長既身份同你講！」我好曖昧同Claudia講。
「冇你咁好氣啊！」Claudia好串地講。
呢個時候世伯入左黎⋯⋯