由O Camp組爸組媽變左做真正既夫妻: Chapter 44
「阿勇！」世伯話。
「做咩啊世伯？」我問。
「對面嗰架RA-R同BENZ係咪你架？」世伯問。
「係啊！兩架都係我屋企既，不過架BENZ遲啲要比返我姑媽！」
「原來係咁！係啊想問你識唔識整車既朋友啊？想整返架GC8比林雅晴揸。之前買呢架車就係想比林雅晴操下車。不過你知啦個寶貝女太忙啦！所以整車同操車就拜託你啦！總之架車交你幫我整啦！」世伯比埋條Fit仔車匙我。
「爹地啊！我坐Aaron車咪得囉！」Claudia話。
「傻女車係攞黎揸架！你考左棍波當然要你揸GC8啦！比CVT你揸害左你啊！有阿勇做你既魔鬼教練，我就放心晒！」世伯話。
聽完世伯咁講，我就覺得佢對Claudia係用心良苦。我當時考棍波貨Van只係因為想揸部100仔，考電單車就係因為想揸部NSR，總之屋企有咩車我就用咩車；而世伯就係因為Claudia考左棍波就買左架棍波車比佢練下車，父愛真係好偉大。比在我爹地就一定唔會咁做，始終屋企要有多餘既車位先得。
「放心交比我啦！世伯！」
「Good！係呢下次有機會叫約你爹地出黎啦！出黎交流下車經。我睇得出佢真係好鐘意車，同我係同一類人啦哈哈！」世伯話。
爹地你就好啦！未來親家同你同一類人，我同Claudia既婚事一定傾得成啦。
「好啊！我爹地好好人架！咩都講一餐！」
「世間好多野要因緣會合架，我未見到佢即係緣份未到啦！」世伯話。
「係既係既！」我同世伯講。
「B啊，原來十二點幾啦！你聽日仲要返工架！」Claudia同我講。
「陪多你一陣啦B！」我摸住Claudia塊面講。
「有爹地媽咪陪我就得架啦 ！而家女朋友要你即刻返去屋企休息！知道未！」Claudia同我講，仲要用老師腔。
「Good Bye and thank you Miss Lam！再見啦世伯！」我同Claudia同世伯道別，臨走時比左個Goodbye Kiss比Claudia。搞到佢笑得好Sweet！
離開左Claudia屋企後，就返左我屋企。返屋企前我檢查全身有冇帶齊野，確保今次唔會好似上次咁漏左部電話係Claudia屋企到。一返到去，見到爹地媽咪、妹妹都訓晒。我都即刻去沖涼刷牙先。
沖完涼，就即刻向Claudia報告下行蹤，話晒除左父母、妹妹之外，佢就係唯一可以管住我既人。
「B！我返到屋企啦！」
「岩啦！頭先⋯⋯多謝你做我既視導老師啊！」
「慢慢黎啦！始終岩岩出黎實習唔可以一步登天架！加油啊你！」
「頭先爹地講下笑咋！你唔好當真，不過我只係想操下車，可以車下你返工啊嘛嘻嘻！」
「聽日教你啦！你早啲休息啦 ！」
「Good Night！錫晒你！」
Claudia講完就Off左。我退返Chat Room。又係車隊Group嗰四條仆街，唔使諗肯定又係講我啦！我打開一睇，係我、Claudia、子瑜、子謙既背影，仲寫埋一家四口家庭樂。唔使諗肯定係Donald同Stephy影啦！
Steven：「勇哥，尋日拍拖！今日就拖住小朋友啦 ！」
Wyllis：「都話勇哥智勇雙全啦！不過你真係攞部掃把佬車小朋友啊？」
我：「係啊！做保姆車司機啊！唔似得Donald架揸架CL7咁撚威威啊！」
Donald：「你架GDB四門，做家庭車都得啦！唔怪得之你死都唔買單門車啦 ！識玩啊勇哥！」
我：「下次換七人車添啊！」
Johnny：「What the Fuck？？？咁快就賣車？你揸左唔夠一個月咋喎！」
我：「屌你啦！係我爸話買比佢自己咋！今次我做返豐田撚！」
Wyllis：「Alphard？Vellfire？Estima？還是Noah定Voxy啊！」
我：「未諗到，但我父親大人話要買水貨車，打死都唔買行貨。日本車一定要買返日本本土版。」
Steven：「世伯識諗啊！車埋你地四個，又可車埋Claudia一家。識玩識玩！」
我：「係既！而家我未來岳父話要我大執Claudia架Fit仔！」
Wyllis：「咁撚快見家長？」
我：「係啊，差雙方家長會面啊！就黎去埋村公所啦！」
Steven：「快啲同Claudia生返個小朋友啦！」
我：「好啊！不過你生先！」
Steven：「屌你啦！聽日返工啊！再講啦！」
Steven就Off左，而其餘四位仁兄都下了線。我就趁呢個時候幫爹地睇下啲七人車。有時我覺得爹地媽咪既銀行到底有幾多錢。點解可以一個月內會買兩架車，雖然佢地公職收入好高，又有其他物業收租，但係一個月洗成咁多錢我都覺得有啲奇怪！
不過算啦！只要佢地既收入係從合法途徑賺取返黎，又可以向上級或者執法部門解釋到其收入來源。我就唔理佢地啦！反正我自己而家係KC做都有成兩萬蚊既收入，都夠用架啦！
呢個時候爹地就入左黎⋯⋯
「爹地！」
「頭先同雅晴去邊啊？」
「送佢返屋企咋嘛！」
「咁你地有冇見埋家長先？」
「有！佢父母既態度同你、媽咪一樣。Approve左我同Claudia既關係。」
「多謝妹妹啦你！我地就放心晒啦！嘉穎都可以安息啦！多謝佢在天之靈保佑你啊！」爹地拍我膊頭咁講。
「係既係既！爹地點解⋯⋯你會同媽咪咁快就接受左Claudia既？」
「因為⋯⋯」爹地諗左一諗，就話：「因為⋯⋯當我同媽咪第一次見到雅晴嗰陣，我地就知佢係一個好女仔黎。你啊要好好珍惜佢啊！你知啦你個衰仔平時又幼稚又低B，成個小朋友咁。有雅晴幫我地睇住你，我地兩個就好放心。但係最緊要就係你點揀姐！」
「我相信我揀得一定冇錯既！」
「咁我問你啦！你鐘意嘉穎還是雅晴多啲啊？」爹地問。
被爹地一問，我覺得佢既問題好難答，始終Winnie同Claudia都有各自吸引到我既地方，Winnie性格比較文靜內向，好怕同外人接觸，做事好似一個「傻大姐」； 反而Claudia性格活潑，文武雙全，做事成熟獨立，同我一樣好鐘意車同跑步，做任何事都唔需要我擔心。不過佢地就一個共同之處就係溫柔可愛、善解人意既好女仔。但係你話我鐘意邊一個多啲，我真係好難答到你。因為佢地兩個係我心目中好重要，Winnie離開左我係一個事實，而我鐘意Claudia都係一個事實，唔可以將Claudia當作係Winnie既代替品，必須要知道佢地兩個係唔同既人黎。既然Winnie已經係過去式，Claudia係現在式同將來式，所以我只會鐘意Claudia。
「咁咪好囉！最緊要你對雅晴係真心就得！你聽住啊！我同媽咪只會認雅晴係我地梁家既新抱，你唔娶佢既話你一個仙都攞唔到，將身家比晒妹妹！知道未？」爹地好嚴肅咁講。睇黎佢地真係逼我同Claudia結婚，Anyway佢地贊成反對與否。我只會娶Claudia作為我既太太。
「Yes Sir！」
「講返正經野先，你想換咩七人車啊？」
「一定係豐田水貨版架啦！咩車都冇所謂！行貨啲Option冇得同水貨車比！」
「你爹地我點會買行貨啊？你話Benz寶馬就冇所謂姐，豐田一定要水貨！而家叫沙皮狗幫我去搵緊車盤。就豐田啦！」
「好！我訓先啦！早抖爹地！」
「早抖！」