《遊夢玩家》［夢想］［網遊］［電競］（全程廣東話）: 第五章 狙擊神手？

係兩個人爭論嘅途中，樂天明個袋因為兩人嘅爭論而跌咗落地下，佢好快意識到並且將裏面嘅文件執返起嚟。

「嗱！Proposal都寫好晒啦！」夏時睇住份文件裏邊嘅些少內容，Dreamers？並且寫住遊夢網吧？夏時心諗唔通依個後生仔好早已經寫定呢個計劃書？

「不過意料之外嘅係有你呢個幫手，嗱！你身為店員應該好容易說服到老闆嘅啫！」樂天明攞咗第二份一模一樣嘅計劃書遞左俾夏時。

「我都係試吓㗎咋⋯⋯」睇住一疊又一疊好厚計劃書，夏時竟然好認真咁樣研究左起嚟。

「你又會咁順攤都有嘅，唔通你之前⋯⋯」樂天明以為對方之前都有諗住開隊伍嘅打算。





「咪講咁多啦！朝頭早6:00啦！返屋企瞓覺啦！」點知對方一句話都唔講純粹趕咗佢走。

隨後兩個人就返返各自休息嘅地方休息，但係夏時就完全瞓唔着，喺度諗緊呢份計劃書係咪真係可行，雖然佢識得店主嘅為人，但係總係覺得呢一個係一個好大嘅投資，並唔係每個人都覺得呢個投資會有好高嘅回報，甚至會面臨輸嘅風險。

最後佢都係選擇左搏一搏打咗個電話俾店主曾力克，佢已經係一個都幾老下嘅一個大叔啦，負責日更嘅工作。

「喂！大叔呀！話說你有冇興趣投資電競產業？」夏時問候過後就直接問咗佢願唔願意投資呢一份計劃書所講嘅內容。

時間已經過咗一個朝頭早去到夜晚黑嘅時間，夏時比平時遲左落去替更，始終傾左成個朝早計劃書都冇乜點時間可以瞓下。結果一嚟到居然見唔到樂天明開機玩，反而見到成班人圍住一個人喺度睇佢打機，但係夏時注意到嗰個人一啲都唔鍾意咁樣。





「喂！你唔係會員嚟嘅咩，做乜唔開機打嘅？」夏時放低自己個袋之後都打算去趁下熱鬧，順便趁着熱鬧之後叫返樂天明返嚟。原來係一個女仔，但係一個女仔喺度打機有幾出奇？

「佢究竟係有幾靚呀，需要咁多人圍住佢⋯⋯」點知所有人都對住夏時做咗一個請佢安靜嘅手勢。樂天明就見勢解釋：「重點唔係靚呀！係⋯⋯佢嘅技術啊！」樂天明咁細聲同夏時講佢當然完全聽唔明啦，呢一下夏時真係嬲咗大嗌話：「唔好意思阻塞通道請各位返返去自己嘅座位！」

因為太大聲似乎阻住咗一個女仔聽對面敵人嘅聲音，佢嗱嗱臨速戰速決，射低左一個敵人之後就企左起身話：「又係你！佢哋呢就唔係我叫佢哋過嚟嘅，但係阻住我你係咪想玩嘢？」仔細咁樣睇一睇原來係琴晚叫夏時同埋樂天明唔好咁嘈嘅嗰位女仔。

「但你都要有返啲責任掛！」夏時好唔憤氣咁樣講。

「前幾日你打出無限暴擊嘅時候咪一樣有好多人圍住你嚟睇？」結果個女仔窒返夏時轉頭。





結果兩個人都非常之唔憤氣咁樣同時講咗句話：「打一場啊！笨！」

結果兩個人就喺遊戲上面決一死戰，但夏時心諗其實都唔知道對方係乜料，不如先試下佢三盤兩勝。

「三盤兩勝，贏咗嘅今日唔可以再返嚟呢個網吧！」樂天明心諗咁狠，明明仲要同夏時傾一傾份計劃書嘅內容，唔通夏時有啲咩把握先至講出呢一句話。但係對方亦都好信攤咁樣答應咗。

一邊係Loader，一邊係Shooter，照道理兩邊都有必勝嘅優勢，夏時亦都覺得自己一定會贏，但係樂天明睇過個女仔嘅技術之後就發覺未必⋯⋯

3、2、1⋯⋯

一對一嘅PVP競賽正式開始，Loader嘅時光倒流正打算進行飛牆動作嘅時候，對方嘅一粒子彈就喺佢側邊擦身而過又兜返轉頭打佢，雖然避得快，但就咁樣俾人扣左半桶血，夏時都喺度諗咗一諗，呢個係⋯⋯

結果再一次俾人爆頭，第一場女仔操控嘅上善若水以十幾秒就勝出左，好多人都啞咗，唔通有比無限暴擊仲要勁嘅一啲技術冇人知道，但其實夏時心裏面非常明白，對方用緊嘅係失傳已久名為追蹤彈嘅一個技術。

前聯盟槍神，Creator-創神嘅周永祺曾使用過呢個技巧，但佢冇記錯雖然佢之後轉職左做教練，但佢應該冇徒弟㗎。





而且係冇Builder嘅幫助下，任何角色基本上冇可能係一人之下使用無限暴擊，所以呢舖就連夏時都唔知道點樣解決，雖然話唔係太知道但心裏面大概都有個方向。

「後生仔⋯⋯」夏時諗下又諗，諗返起琴日樂天明嘅操作好似可以打破呢一個問題。

「咩後生仔啊？我之前咪同你講過叫我天明咪得囉！」話咁快第二場好快就要開始樂天明佢仲緊張過夏時。

「琴日你嗰招，點用㗎？」望住螢幕3、2⋯⋯樂天明都唔係太理解對方喺度講緊啲咩，就隨口噏左話：「啊⋯⋯開場嗰陣時憑你第六感左右跳動睇下點啦！」

點知上善若水係唔夠3秒就已經瞄準好時光倒流個頭部，子彈好快咁射出，但始終有啲距離，操控緊時光倒流嘅夏時左右連續跳動，避開左對方微調嘅追蹤彈，女仔都嚇咗一嚇，唔通佢嘅秘技俾人識破左，隨後佢有啲唔淡定但都迫於無奈扮淡定咁樣繼續追擊，但結果一槍都成唔中，對方就嚟埋到身，佢就只好離開目前呢個蹲點位，但行唔到兩步就比對方用咗幾招連技，就打殘左，第二埸由時光倒流勝出。

夏時好似搵到打低對方嘅技巧，就好輕佻咁樣講咗句話：「之後就算打咗幾十場都係我贏嘅咋喎⋯⋯」女仔當然好唔憤氣佢都喺度思考緊究竟仲有咩方法，始終連目前呢個人佢都打唔贏，佢點樣挑戰遊戲裏面最強嘅狙擊手，佢沉默左一陣。

見到如此困況嘅樂天明突然之間意識到可能個女仔可以成為自己嘅隊友，就過咗去同佢講話：「夠㗎啦，話時話我哋而家組織緊個隊伍，你⋯⋯」





「唔使，贏咗佢先係我嘅目標！」隨後佢冷靜翻落嚟然後點返一啲平均啲嘅數值。

「仲要再嚟過？」夏時挑逗對方，但個女仔非常淡定咁樣開啟左佢哋嘅決鬥。望住螢幕，佢哋兩個都感受到有啲壓力，夏時擔心嘅係唔通佢仲有啲咩隱藏手段，個女仔擔心嘅係點樣贏咗呢一場。

最後決鬥開始！

兩人共同使出自己嘅真本領，衝向對方，係兩個人即將碰面嘅時候上善若水使出投射射擊，將自己投射到好高嘅半空中再用榴彈射擊，令自己到達好高嘅一點，然後進行高空射擊，呢個操作嘅畫面混亂程度冚比飛牆，個女仔都有啲唔習慣，但都勉強利用到一次追蹤彈，時光倒流扣左九成血，好彩嘅係時光倒流可以瞄準係空中嘅一個點然後使出大技嗜血萬擊，應該實食冇痴牙，但同時個女仔亦都準備發射出子彈。最後兩招同時交手，子彈同箭互相交插，然後攻擊到對方。

最後平手！

兩人打出平手嘅結果令人喜出望外，雖然兩個都係有啲唔憤氣但係佢哋都珍惜呢一段時間嘅較量。

「居然係平手啊！又話實打贏我嘅？」女仔笑左一笑

「其實邊個贏咗，對邊個都冇乜嘢着數，但有冇興趣加入我條Team？」樂天明以為對方只係講吓笑，女仔亦都問咗一句：「咩嘢Team？」





「由遊夢網吧老闆申請名為Dreamers-遊夢嘅隊伍。」聽到呢一句兩個人同時嚇親：「你講真㗎？」樂天明更加係唔相信，個女仔就已經握手妥協左呢件事。

「不過訓練費用由自己出翻。」夏時講咗一句令大家都沉咗嘅說話。

不過佢哋都喺度諗緊其實訓練費用都只不過係留喺網吧嘅時間同埋少少金錢，最後佢哋三個都笑左一笑。

距離隊伍成立仲差三個人。