喺創神遊戲公司嗰邊,主管正喺度責問緊周永祺收購帳號嗰邊嘅業績,主管好明顯並唔係在意佢究竟收購左幾多帳號,而係佢究竟收唔收購到天中明燈同時光倒流兩個帳號,結果令主管非常失望,周永琪只好解釋話:「我已經係再三追問底下問咗佢哋嘅意願,但睇嚟佢哋都唔想賣咗呢個帳⋯⋯」

「你知唔知道咁樣會好影響我哋公司嘅業務㗎!吓!」主管繼續再三追問,但周永祺就只係繼續咁樣道歉,最後等主管吞咗啖氣先至出返去做嘢。

「冇嘢吖嘛,阿祺⋯⋯」見到周永祺咁沮喪嘅趙薇亞上前問咗佢一句。「冇嘢啊⋯⋯你入去做你嘅匯報先啦⋯⋯」身為周永祺女朋友嘅趙薇亞決定咗都係唔過問咁多就入去做匯報啦。

「主管,關於開發部個方面,呢份係我哋研究過最新Server嘅數據!」主管只係叫咗佢放低之後就要求佢離開,始終市場上有人高價收購嗰兩個帳號,雖然係筆意外之財,但佢都恨不得想賺到呢筆錢,可以話係諗錢諗到癲咗。

「你都問唔到啊?」企係外面嘅周永祺見到趙薇亞好快咁喺主管嘅辦公室行咗出嚟就知道,佢哋心裏面嘅嗰個問題始終都係冇人答到佢地。





到底時光倒流係咪真係打算組織一隊新嘅隊伍?

去返王朝娛樂公司嗰邊, 陳霆洪都收到有新隊伍打算參賽嘅小道消息,不過佢完全冇諗過呢種事情會出現係夏時身上,因為佢太過了解佢嘅為人,佢一個唔擅長同其他人合作嘅一個人,雖然話十年前已經係咁樣,但係佢都有諗過佢會唔會有改變嘅一日,如果有嘅話,佢希望未來佢哋並唔係敵人,而係隊友。

「你覺得機率係幾多?」 陳霆洪問咗身為Dynasty-王朝副隊長嘅秦偉信有關對方可能成為敵人嘅機率。

「你真係想聽真相,雖然我都唔係太肯定⋯⋯」秦偉信好保險咁樣講咗呢一句話,始終而家小道消息太多,都難分真與假。

「如果係敵人嘅話我哋需要進一步了解對方嘅戰術同埋對方有啲咩人⋯⋯」 陳霆洪心裏面雖然有一萬個不情願,希望對方並唔係敵人但都係要打定心理準備,隨時要有決一死戰嘅把握。





「話說天中明燈琴晚並冇上線,只有時光倒流同一個叫做上善若水嘅帳號喺度打PVP,本身冇咩野嘅⋯⋯但係睇返紀錄,我發現左一樣好有趣嘅嘢。」秦偉信同陳霆洪對話嘅途中無意講咗呢一句話。 秦偉信面露難堪,雖然佢知道唔應該再比壓力比陳霆洪,但佢依然講咗出嚟:「追蹤彈⋯⋯上善若水呢個帳號識得用追蹤彈⋯⋯」 陳霆洪突然之間擘大左佢對眼,心諗如果可以將呢個人才挖到返嚟都好,但佢諗返起夏時都有接觸過佢,所以呢位人才如果要挖返嚟似乎應該凶多吉少。

太陽已經落幕好幾粒鐘,正係夏時起身替更嘅時候,不過今日好唔好彩起身就打咗個乞嗤,佢完全唔知道邊個係佢背後講佢壞話,就打算返番網吧同樂天明同埋琴日識嗰個女仔商討接住落嚟要成立隊伍嘅必要條件同策略。

「你嘅目標係?」夏時去到網吧2樓嘅一間雜物房清空左一角就同兩位商討策略。

「唔使講肯定係職業聯賽啦,始終嗰度先搵到差唔多有料嘅人⋯⋯」個女仔率先咁樣講左,始終係佢眼中佢都係以依個為目標。

「話時話識咗你兩日,都唔知道你叫咩名?」樂天明雖然俾人搶咗講答案嘅機會但都為咗蒲一蒲頭問咗一句。





「乜你咁煩㗎!孫善尚,叫我狙擊手或者狙擊就得啦⋯⋯」孫善尚為人非常豪爽但都好唔鍾意有麻煩野,就照直答咗呢一句。

「哦⋯⋯Ok⋯⋯」面對氣場咁勁嘅兩個人,樂天明基本上氣場弱到毫無立足之地。

「嗱咁你哋應該有聽過未來挑戰賽㗎啦,冇記錯半年之後就會有一場!只要我哋喺精英挑戰裏邊有隊伍連續贏到兩次職業選手嘅話,就可以獲得參賽資格。」聽住夏時解釋嘅兩位點左一下頭。

「接住落嚟,就係職業聯賽,個人賽大家都知啦一打一睇邊個死先,常規賽事就六打六攻城戰。我哋雖然有主力輸出,有Support,有遠程追擊,但我哋始終需要一個可以玩到創意型職業嘅人,一個玩無賴,同一個打雜。」呢個就係喺夏時眼中最標準嘅隊伍格式。

「話時話點解你係咁樣排嘅⋯⋯」樂天名好似有啲唔明白點解會多咗一個打雜,同埋點解需要一個無賴。

「如果搵唔到一個同預言家一模一樣嘅無賴嘅話都幾難打得贏Hades-冥主,雖然對面個預言家仲係個細路,但係奸得好離譜。」夏時好全面咁樣分析如果要打職業聯賽嘅話大概要啲咩人先打得贏對面嘅隊伍。

「哦~嗰個邊個呀!蘇,蘇奇華!」樂天明食住塊薯片諗咗幾下先至諗到個名。

「然後打雜就隨便咋嘛⋯⋯話時話你幾時買咗包薯片係邊度攞㗎?」望住樂天明手上嗰包薯片,夏時覺得有啲搞笑就問咗一句。





「冇⋯⋯自己帶上嚟架!要唔要食啊?」夏時本身心諗呢條友仔係咪真係打算整條Team出嚟,居然咁唔專心都有嘅,但轉過頭來孫善尚居然已經喺度同樂天明喺度開餐。夏時即刻成個人無言。

諗返起遊戲夏時突然間醒起一件好重要嘅事,就問咗樂天明一句話:「話時話你係咪依兩日都冇玩?」樂天明依一刻先意識到個問題呢兩日都喺度睇佢哋兩個喺度打同埋分析戰術,都唔得閒升級。

「好心你啦又係你話要組Team嘅,而家又唔上心喎,係咪想⋯⋯」夏時已經嬲到冇得再嬲咁鬧咗樂天明一餐,樂天明只好笑口笑面咁樣避過呢件事。

隨後就乖乖地落返樓下繼續升級,留低夏時同孫善尚喺度討論點樣去搵另外三位隊友返嚟。孫善尚就突然問起:「點解你哋會突然之間組咗呢對Team嘅?」夏時雖然都驚對方失望但都只好照直回答話:「嗰條後生仔囉血氣方剛,又咁啱得咁橋俾佢碰正我老細願意投資係佢身上喎,雖然冇仔細咁睇過佢份Proposal,但佢寫咗一啲好重要嘅嘢。」孫善尚突然之間覺得有啲好奇,夏時就回答左佢話:「我用喺呢度所使用嘅時間嚟賭呢一個遊戲嘅復興同埋當年嘅熱情。」兩個人就突然之間咩都冇講,回想返當年點解會玩呢隻game。相比之下佢哋點一個啱啱畢業嘅後生仔都比唔上。
已有 0 人追稿