眾人歷劫過後,終於能抵達礦坑的入口。大礦坑原本為甲城昔日採礦者發跡的地方,由於多年來的開採挖掘,淘空了礦產,最終只剩下僅存的一兩家業者繼續經營。現在的礦坑已淪為貧民生活的地方,大量貧民、難民、新移民、非法居留者一起蝸居在沒有合適維生設備的空間內,生活質素極其惡劣,而邪惡病毒的蔓延更加劇了問題的嚴重性。由於長期缺乏陽光照射,這裡只能依靠安裝在洞穴天花的那些專為採礦者設置的人造光源照明,在缺乏維修的情況下,光線閃爍不斷,再加上內裡濕氣凝聚,一路上行走時感覺異常陰暗和潮濕,地獄之名因而得來。
在下層世界內,居民經過檢疫後,是可以申請通往天堂的通行証,但一般配額很少,且有價有市,然而那些具實力前往天堂生活的人總是離不開強者和擁有天賦本錢的女性。區內暴力罪案無日無之,一般居民病死街頭又或者被搶劫都是非常等閒的事情。曾有居民舉家失蹤,翌日在水井內發現大量肢離破碎,屬於多個人類身體部位的殘骸。基於保安的理由,這區實施了居民進出的管制,一般居民是無法走進被稱為天堂的上層世界,導致發展出偷渡潮。

眾人在一處由礦洞挖掘而成的狹窄通道入口進入,經過三、四道樓梯後,在通風井位置推開一道鐵門便到達商業區。區內街道淺窄,兩旁都是一些瘦骨嶙峋的人,這些人衣衫襤褸,在街道兩邊擺賣一些日常生活用品,當中居然有人住在一些大小約三米乘兩米乘一米,由礦洞壁挖成的棺材房內。由於段連城對所有街道及附近的市場仍然保留昔日的記憶,很快他便找到附近的一間服裝店,一次過替所有人更換了衣服,以便喬裝打扮混入住宅區。
「原來甲城有咁多人居住嚮呢種地方,睇嚟我哋國家嘅資源分配不均情況比想像中嚴重得多。總統畢凡絕對唔係一個治國人才,佢以為利用恐怖手段就可以保障權力,淨係將咁多人關嚮礦坑已經足夠激發起民怨。」進入市區後,美瑾打從心底慨嘆起來。
「雖然咁講,但係如果繼任者唔好好咁控制住呢批來自貧民區內嘅居民,後果亦可能相當嚴重。」文治說。話畢,即轉身向段連城吩咐:「總理大人必須立即離開呢度。我哋要前往杜司令嚮軍方嘅根據地。」
「呢度實施緊出入管制,亦即係封關,一般冇通行証嘅只能夠靠偷渡前赴外界。依家我哋要等飛燕養好傷,同埋我需要時間搭通天地線俾你哋順利咁離開,所以仲需要嚮度逗留一段短時間。」段連城說。
「段連城,你知道身為總理私人保鏢必須絕對服從上級指揮嗎?」文治說。
二人各不相讓之下,司馬亮立即出面調停:「段先生講得啱,以目前嘅形勢,機關一定會嚮地面重重佈防,換句話講,依家亦非突圍嘅最好時機。最好我哋能夠掩人耳目,我嚮逃走嘅時候帶咗少量隨身醫療用品,希望能夠嚮呢段時間醫治好飛燕所受嘅傷,正所謂多一個人,多一分力量,我哋要保存實力,以便能夠應付敵人,順利離開。」
「司馬亮嘅分析好中肯,建議亦非常好。」美瑾說。




「我有一個落腳地點,嗰度有足以信任嘅人可以俾我哋暫時匿藏。」段連城說。

洪水退卻後,在研究所的地下室內,八腳馬等人終於以爆破等手段攻入,可惜他們找到的是多個被地下水淹沒的空置房間。
「報告長官,嚮呢個地下室內所有嘅房間都已經仔細咁搜過,裡面空無一人,相信目標已經從緊急出口離開。」助手說。
「你哋派人分成多隊,嚮地下水道沿途搜查,就連死屍都唔放過。」八腳馬說。
經過多個小時後,下屬匯報進展,原來在出口處發現了狂龍和蝙蝠的屍體。
「報告長官,呢兩具屍體嘅死因好古怪,似乎並非同目標人物扯上關係。」助手一邊說,一邊把死屍的面容給八腳馬核對。
「兩件廢物,竟然同我爭奪美瑾?去同閻王邀功好嘛?」八腳馬說著,然後一腳踏在狂龍屍首的胸部。
「長官,佢哋係咪自相殘殺?」助手問道。
「兩人應該係行刺嘅時候失手,然後先至被殺嘅,睇下佢哋面上嘅恐怖表情就知。」八腳馬說話同時,陷入沉思當中。「照理狂龍同我功力不相伯仲,上次嚮殺手比試大會上我仲被佢嘅纏龍爪暗算,面上多咗一道疤痕,按呢個邏輯推斷,同陶美瑾同行嘅高手實力有可能嚮我之上。」




「報告長官,我哋已經搜索晒所有嘅地下水道,冇發現目標人物嘅蹤跡,但嚮水道嘅另一邊,有一道牆穿咗一個大窿,外面通往大礦坑。」另一名助手說道。
「估唔到就連我打開晒所有上游河流同配水庫嘅水閘,出動咗呢種程度嘅洪水,佢哋都大難不死。」八腳馬話畢後馬上發出命令:「你哋聽清楚,從呢度開始方圓十公里內,我要你哋搵出所有能夠通往地面嘅出入口關卡,並且出動裝甲車同無人機全天候嚴密佈防,當收到目標人物嘅消息,馬上通風報信!另外,你負責搵一隊配備生化防護裝備嘅持械精英跟我進入大礦坑內嘅貧民區消滅目標。」
「長官,嗰度唔係我哋機關嘅地盤。」助手說道。
「咁又點呀?派人同我聯絡下層地獄嘅一言堂,搵到堂主賈士圖後,話我哋要佢幫手,事成嘅話,一言堂可以統一嚮地獄內嘅各派勢力,以後可以任意橫行。我要陶美瑾佢哋死無全屍。」八腳馬笑著說。
已有 0 人追稿