位於地獄底部深處的一言堂,今夜在會議室內舉行由八腳馬牽頭的秘密會議,然而在通風口的暗角一則卻迎來了兩個不速之客。
「你呢句話當做威脅我哋機關嗎?」八腳馬怒氣沖沖地問。
坐在大班椅上的賈士圖穿著筆挺西裝,衣著光鮮,以平淡的口吻說道:「唔好講得咁難聽,我要嘅只係呢區嘅人口控制權,一個肯買,一個肯賣,公平交易,更何況非法居留者冇戶籍,國家檔案室冇任何紀錄,講得明白一D,當呢班生不如死嘅賤民體內嘅器官移植到有錢人同大商家呢類嘅藍血貴族之時,已經係佢哋嘅無上光榮,更加為甲城慳番唔少米飯同藥物,絕對係死得有價值。」
「估唔到你都幾識得開條件喎。好,就咁成交!但係你哋要秘密行事,我唔要有手尾跟,同埋收貨嘅時候我要核實一下目標嘅身份。」八腳馬不爽地說。
「你要嘅人,係生係死,我幫你搵,包你滿意。」賈士圖說畢,遂指使一眾手下為八腳馬開路離開。

身處通風口的二人偷聽完畢,便以敏捷身手離開,他們是花拉與金不換。金主要負責保護四出打聽情報的花拉,因一言堂是區內最大的龍頭,加上附近新增大量來自機關的人員出入,自然成為他們調查的對象。
「我哋要立即將情報通知總理。」花拉說。
「妳能夠聯絡到杜司令嗎?」金不換問道。
「呢度係地底深處,軍方嘅網絡嚮度用唔到,我相信杜司令佢哋依家只知道總理離開咗地下水道,要令佢哋掌握到我哋嘅行蹤唯有利用民用網絡上線,但係咁反而更容易暴露行蹤,令機關捷足先登。」花拉說。




「真係希望老師嘅接頭人能夠順利送我哋離開。」
「你嘅傷勢冇大礙嗎?」花拉說話同時,流露出關懷的眼神。
「相比起飛燕,咁樣嘅傷根本唔算得上係咩。」金不換說畢,不期然與花拉四目交投。「其實你哋點解以軍人身份加入銀翼幫?軍方同政府唔係一向情報共享嘅咩?」金決定轉換話題以避開對方視線。
「自從畢凡成為總統後,國安局同軍方就斷絕咗交流,最近我哋更發現機關試圖入侵軍方嘅電腦系統,所以軍方決定反制,而銀翼幫嘅出現只係繞過軍方勢力,利用幫會人事打擊機關同收集佢哋嘅犯罪証明,當然狂龍佢哋亦都係機關所佈署嘅棋子。」
「點解咁相信我?妳唔怕我設計害妳嗎?」
「我嘅隊友有好多都已經先後離世,對我嚟講死亡都係遲早嘅事,最重要係死前搵到自己鍾意同愛嘅人。」花拉說話時表現出一抹冷豔的笑容。

鏡頭來到地獄的另一處,在一間裝飾得尋常不過的雜貨店內,穿上平民衣服以掩飾身份的段連城在店舖背後的員工宿舍探頭視察外界情況,該宿舍空置了一段日子,主要用作放置雜物,現為眾人暫避風頭的容身之所,一名小孩從廚房送來了一些食物。
「你哋俾總理食D咩?」文治劈頭問道。
「呢個係媽媽煮俾你哋食嘅。」小孩說。




「呢種食物實在難以入口,唔通你哋舖頭冇一D正經同似樣嘅食物咩?」
「我勸你哋最好將就一下,呢度唔似得地面咁輕易可以搵食。」段連城說。
「大家一齊食,呢一刻我認為能夠生存落去先至係最重要,直至有辦法離開為止。」美瑾回應道。
在房間的另一個角落,司馬亮為五十嵐飛燕檢查身體狀況,他以一個手提式儀器掃瞄和修復五十嵐身體的內部,儀器同時發出一種特殊的深層次雷射光去修補受傷破損的身體組織,令傷口加速復原。
「教授,我情況點樣?」五十嵐飛燕問道。
「幸好妳冇傷及內臟,亦都冇嚴重骨折,食咗藥之後相信多休息幾日就可以完全康復。」司馬亮說。
「多謝你嘅照顧,依家外面咁亂,我想盡快回復戰鬥力。」

此時,雜貨店的老闆從外面回來,並且帶來了一些從上層世界回收的二手物資,準備作為銷售用途。他跟段連城以朋友身份打了個招呼。「點樣,外面風聲緊嗎?」段連城率先問道。
「外面嘅警察比起平時多咗最少三倍,另外仲有裝甲車,仲有D可能係便衣嘅人嚮度監視,就算我有運輸業通行証,出入都要搜身,貨物亦要檢查,照我睇硬闖關卡呢套行唔通。」說話的人名叫何大義。




「咁仲有咩辦法?」
「嚮地獄內,有一言堂同通天門兩大勢力,一言堂一早跟機關串通,欺壓百姓,反而通天門嘅人多數肯照顧我哋,佢哋經營採礦,但暗中打劫官倉,將治療邪惡病毒嘅疫苗分俾升斗市民,佢哋嘅礦石都係從大型升降機直接運上地面,由於有黑幫勢力關照,警察都唔敢跟佢哋作對,亦唔設任何關卡檢查。」
「聽講通天門嘅話事人係通天嫂,你能夠幫助我鋪橋搭路嘛?」段連城乘勢問道。
「當然冇問題,只係需要些少時間。」
此時,剛好金不換和花拉從外面歸來,花拉搶先說道:「大家快D離開,我哋收到風一言堂帶咗一大隊人依家嚮外面四圍咁搜捕緊我哋!」
「我哋有咁多人,大不了同佢哋死過!」曾經當兵的何大義回應。何大義已往跟段連城在服兵役時認識,雙方情同手足,無分你我。
「唔可以,我唔想你為咗幫我而連累阿嫂同囝囝!」段連城回答。

正當二人僵持不下之際,外面突然有人用喇叭高聲廣播:「各位街坊請注意,我哋係一言堂,現正幫政府捉拿通緝犯,凡係私下窩藏疑匪嘅,全家上下一律會被判合謀罪,最高刑期係十年!」
已有 0 人追稿