《疫戰都市》-《這個殺手不太濫》: 第二十三章 - 器官農場

敵人在外，眾人立即偃旗息鼓，可惜一言堂的人似是衝著何大義一家前來。
「如果嚮我哋捉拿恐怖份子嘅時候遇到暴力反抗嘅話，參與反抗嘅人一律殺無赦！」叫囂的人在不斷提高聲浪和威嚇性。
「既然係咁，你哋快D向後門走，過三、四個鐘頭先返嚟！」何大義說，遂吩咐太太讓眾人從後門離開，何大義則趕去開門迎接一言堂的人。
以陶美瑾為首的一眾人等遮掩著面容，走了一段九曲十三灣的小路後，段連城始發現前方竟是俗稱掘頭路的死巷，眼見眾人走投無路，決定一起躲進附近的一間空置的貨倉中，當關上倉門後，四周赫然變得一遍漆黑。

「呢度好凍。仲有，點解會黑麻麻咁嘅？」文治第一個開口問。
花拉見狀，隨即以手電筒照明，但光線所及之處皆令所有人感到毛骨悚然，原來倉庫內的天花設有一行行活動路軌，上面懸掛著一條條類似豬隻的東西，近看之下竟然是一班赤裸的成年男女，那些人手腕的位置俱綁了手帶，並且在口和鼻孔插入了一些疑似輸送氧氣和營養液的透明管道，更加詭異的是那些男女的身體還被人以記號筆寫上記號和畫上各種器官的形狀及位置，似是方便解剖之用。
「嘩！」眾人無不嘩然大叫。
「呢排係屍體。」司馬亮說話同時，以生物掃瞄器去檢查那些懸掛著的男男女女。
「教授，你意思係佢哋已經死咗？」美瑾緊張地問。




「我以前聽過一個傳聞，話下層世界有一個器官農場，利用咗一種黑科技，將即場被殺嘅人嚮低溫之下變成好似植物人咁保存，咁樣屍體內所有器官都可以維持喺新鮮狀態，等接到上層世界嘅客人訂單時，就可以立即收割使用。照我睇嚟，呢個傳聞係真嘅。」

那邊廂，一言堂的爪牙在宿舍外面拍門。「開門！」
「我哋聽講呢度一帶有閒雜人等出沒，機關現正委託我哋檢查你嘅住所，識趣讓開！」一個自稱政府職員的人代表身後一班穿著軍人制服的警衛說。
「精嘅就躝，呢度係通天門嘅地盤，唔係你哋一言堂嘅地方！」何大義在門後說。
「你哋統統退下，休得無禮！」突然間，一眾來人身後出現了一把半帶邪氣的聲音：「呢個細路好乖，叔叔想請佢食糖。」說話的人是賈士圖，他的手正拖著何大義的兒子。
「放咗佢，你想點樣？」何大義面帶緊張地說，並且立刻打開大門。
「你身為家長，點可以嚮細路面前咁失禮？其實過門都係客，你應該請我哋入去飲杯茶。」賈士圖說話同時，雙手放在何大義兒子的肩頸上，賈的手下立即配合行動，搜索屋內每個角落。
「報告老闆，冇發現。」手下說。
話畢，賈士圖進內四處檢查，發現桌面有很多吃剩的飯餸。




「睇嚟呢度唔似得你哋三個人住。」賈士圖說畢，目光落在那些被人浪費的食物上。「原來你哋兩夫妻都冇乜胃口。」
「呢D係班伙記食嘅，佢哋一聽見外面宵禁個個都冇晒胃口，食剩晒咁多就走咗啦。」大義嫂自圓其說。
「原來係非法外勞，唔怪之得行為咁低級。」賈士圖說道。「想過升級做人上人嘛？我哋一言堂一向有獎罰制度，但凡告密者一律既往不咎，更可以舉家獲得上層天堂嘅入境許可證，嗰度先至係一個真正適合一家人生活嘅地方，除咗遠離病毒之外，更可以有免費醫療同教育，最適合小朋友身心發展，嘿嘿。」