【二月廿九番外篇】《沒有穿越的平行時空》: 第十四章 噩耗
第十四章 噩耗
一秒過去，Yeesa張開雙眼。大家都很緊張，究竟Yeesa今年有沒有閃影？
Yeesa突然流淚，而且喊得停不下來。
「做咩呀Yeesa？唔好喊啦！」跳掣攬著Yeesa安慰她。
家聰非常擔心Yeesa今次的閃影經歷，因為她有可能再次見到自己死亡的信息。
Yeesa︰「對……對唔住呀，我想自己一個靜吓，遲啲再搵你哋。」
Yeesa獨自離開神聖幾何。
巴西龜：「究竟Yeesa睇到啲乜呢？莫非又係睇到同一單新聞，都係見到自己會交通意外死？」
耶穌：「就算係見到同一單新聞，都未必會有太大反應，因為上年已經知道。」
Alien︰「莫非佢見到第二啲嘢？」
大家都非常擔心Yeesa，但現在也拿她沒法，就先讓她冷靜下來，第二日再算。
巴西龜：「雪櫃個蛋糕邊個買㗎？」
耶穌：「係咪有人買嚟幫Yeesa慶祝生日㗎？」
沒有人承認買這個蛋糕。
跳掣：「Yeesa呢兩日都唔知會唔會再番嚟，不如我哋食咗佢啦！」
其實，蛋糕是家聰買來為Yeesa慶祝生日。家聰從來不會為任何家人或者朋友慶祝生日，除了他的外婆之外，Yeesa就是第二個。可惜Yeesa再次在閃影中見到不幸的畫面，慶祝不成。
※※※※※※※※※※
落泊的Yeesa一邊想著剛才閃影的片段，一邊拖著緩慢的步伐回家。就在自助洗衣店的位置，她看見Ryan。
Ryan︰「生日快樂呀Yeesa！」
Yeesa看見Ryan站在洗衣店的門口，拿著蛋糕等待著她。她看見Ryan，終於忍不住，衝向Ryan並緊緊的擁抱著他。Ryan大概估到Yeesa再次有閃影，可能又見到不幸的畫面。Ryan也緊緊的攬著Yeesa。
他們二人再次來到Ryan屋企對出的後樓梯位置。
Yeesa︰「我見到我喺一間網吧入面，用電腦開facebook，睇緊Fiona嘅timeline。我見到佢個profile picture變咗蓮花，最update嘅post係2018年8月31號。張相係Fiona、Jonathan同BB嘅合照，個caption係『但願將愛，都留給他倆，See you soon』。」
Yeesa忍不住，再度哭起來。Ryan大概知道發生何事：另一個時空的Yeesa，從2018年穿越到2020年的北海道，然後見到Fiona已一早死去。
Yeesa︰「我見到留言係2018年10月1號前後，每句都係『R.I.P』、『Rest in peace』，即係証明Fiona會喺2018年8月31號至10月1號之間嘅時間……離開我哋！」
Yeesa哭得很厲害，挨在Ryan的心口位置喊個不停，將Ryan的外衣都弄濕了一片。
Ryan︰「咁，Fiona係咪病死？」
Yeesa︰「係！其實閃影入面嗰個我，之後有打去俾當時喺香港嘅Jonathan，去確認Fiona係咪真係死咗。嗰個我係有問Jonathan Fiona係咩病，但我聽唔到聽筒嘅聲，我只係喺遠處觀察住當時嘅我。」
Ryan︰「你仲聽到你自己對住個電話講乜？」
Yeesa︰「我……俾我諗吓先。係呀，嗰個嘅我臨尾問咗Jonathan一句『如果俾你揀多次，係咪無論如何都會揀Fiona呀』，但我唔明我點解咁問，最衰我聽唔到Jonathan講乜！」
Ryan︰「之前我唔知點解，你會無端端有呢個能力，可以睇到另一個時空嘅嘢。我一直都唔信你會喺2020年會有意外，因為出現嘅機會率好低，你只要唔去北海道就好大機會冇事。但今次睇到嘅嘢唔同！」
Yeesa︰「點唔同？」
Ryan︰「嗰股力量令到你睇到Fiona可能會喺2018年9月會病死，但依家只係2018年3月1號，你仲有好多時間可以改變未來，係個天俾機會你去拯救你珍惜嘅人，Fiona可能唔會死。」
Yeesa搖頭說：「太兒嬉喇，Fiona唔會信我講嘅嘢㗎！」
Ryan︰「我相信你。我知道好難開口㗎喇，不過你地十幾年姊妹，佢應該會聽你講㗎喎，起碼做個檢查吖嘛！」
Yeesa︰「都唔知佢係咩病！點檢查呀？」
Ryan︰「一定有辦法，你俾我幫你諗吓。係喎，咁你呢？你仲有冇睇到嗰個新聞報導？」
Yeesa︰「有呀！」Yeesa再度哭起來。
Ryan︰「唔好諗咁多，我送你番屋企先，依家夜喇，你早啲瞓啦，聽日再諗辦法。」
※※※※※※※※※※
第二朝，Ryan直接上來Yeesa屋企。辰叔已見怪不怪，因Ryan之前曾多次上來幫Yeesa補習日文。
辰叔：「你搵Yeesa有咩緊要事？」
Ryan︰「緊要㗎，係關於琴晚佢同我講嘅事。」
辰叔：「佢琴晚眼濕濕咁番嚟，你係咪蝦佢呀？」
Ryan︰「唔係呀……」
此時Yeesa從睡房出來。
Yeesa︰「冇嘢呀阿爸，Ryan係嚟幫我。」
辰叔：「都唔知你哋啲後生攪乜？唉，唔理你哋，我去煮早餐，Ryan你留低食埋早餐先走啦！」
Yeesa有些錯愕，辰叔十年都未煮過早餐，今早竟然為Ryan破例。平時的早上他沒有喝酒已經很好，枉論煮早餐。
Ryan︰「我想同你confirm一樣嘢。另一個時空嗰個你，係咪喺電話入面問Jonathan類似『如果俾你揀多次，係咪點都會揀Fiona』之類嘅說話？」
Yeesa︰「係！」
Ryan︰「你肯定Fiona係病死，同埋見到Fiona生前同Jonathan、BB嘅合照？」
Yeesa︰「係！」
Ryan︰「我覺得你問Jonathan嗰句說話，係佢哋最終揀咗BB。」
Yeesa︰「可唔可以再講清楚啲呀？」
Ryan︰「假設Fiona大緊肚嘅時候知道自己有病，要終止懷孕先可以醫，咁梗係健康為重啦，先醫好個病，之後再努力都唔遲。但如果個病，係你選擇唔要個BB之後，永遠都唔可以再生嘅話，就唔同講法。」
Yeesa︰「有道理。」
Ryan︰「我覺得Fiona係有關於婦科嘅病，治療後會影響生育能力，先會令到嗰個時空嘅佢哋要決擇。佢哋最終揀咗留住個BB，到BB出世之後，Fiona先去治療，可能太遲，所以最終病死。佢哋最初呢個決定，令Jonathan好後悔，所以你問嗰句嘅時候，Jonathan一定答係。」
Yeesa開始又眼泛淚光。