【喪屍】《逃城》: 探索醫院

呢間房有落窗簾，只可以透過房門嗰塊玻璃窗睇，一望，入面竟然有七八隻喪屍企係度！我即刻縮翻個頭。唔講打唔過咁多隻，淨係佢哋一齊拍門嘅聲，應該都可以引曬全層嘅喪屍過黎。 

小心翼翼咁行到下一間病房，探頭望左望，入面同樣有七八隻喪屍。睇黎雖然走廊唔覺仲有喪屍，但好可能每間病房都有，如果唔小心發出聲響，引起佢哋嘅注意，可以想像到會係一場災難⋯⋯ 

我無再逐間房睇，始終唔確定佢哋係咪盲，萬一佢哋見到我會有反應，咁就大鑊。我烏低身慢慢潛行到走廊中央，唔知係咪好彩，路上真係一隻喪屍都無。

走廊中央有升降機，不過應該已經用唔到。隔離嘅指示牌見到，我身處嘅係四樓，雖然有唔同部門，但整體黎講成層都係病房，樓上五樓都係病房，而三樓就有手術室。 

唔知咩原因呢個地方嘅「人」好似都變曬喪屍，唔知淨係呢間醫院係咁，定其他地方都係。雖然我好想即刻離開呢度，去搵下有冇其他正常人類，不過望到樓下有手術室，我又有少少諗法。 





手術室應該會有刀、較剪之類利器，可以當武器旁身。反正落去都會經過三樓，我決定順便去手術室偷翻啲「武器」。

升降機隔離就有樓梯，透過嗰塊細細塊嘅長方形玻璃，可以見到樓梯應該係無喪屍嘅。確認安全之後，慢慢行落一層，推開三樓嘅樓梯門，就見到右邊走廊有兩間手術室，而且沿路都無喪屍，但係左邊嘅走廊就隱約見到兩個呆立嘅身影。我唔係好確定，係我行去手術室期間，呢兩隻會唔會發現到我。 

「喂。」
係我猶豫不決嘅時候，身後突然出現一把女仔聲。我差啲叫左出聲，好彩揞得切個口。另轉頭見到，係一個中長頭髮嘅女仔，五官算幾好睇，笑起上黎應該會幾甜美，但係佢宜家目無表情咁，比人一種難以親近嘅感覺。 

不過樣唔係重點，重點係佢係一個活人！ 

「你頭先想做咩？」個女仔壓低聲音問，嗰兩隻喪屍暫時無咩動靜，照咁睇，細細聲講野嘅音量應該唔會吸引到佢哋。 





「想去手術室睇下，但嗰邊有兩隻喪屍⋯⋯」
我學佢壓低聲音講野，眼角仍然留意住左邊走廊嗰兩隻喪屍，如果佢哋有咩反應我就即刻逃走。雖然仲想問下佢知唔知係咩情況，可以交換下情報咁，不過呢個環境唔太適合講太多野，都係一陣先。 

「想搵刀？手術刀咁細把有咩用。嗰兩隻野你唔洗驚，唔好太大聲佢哋就睇你唔到。」
個女仔一語道破我嘅目的，雖然口講無用，但又話我知唔洗驚嗰兩隻喪屍。一時間真係睇唔透呢個女仔諗緊乜。