【喪屍】《逃城》: 手術室

點都好，聽完佢講，我都係決定去手術室一趟，就算手術刀細把，點都叫係利器，我始終覺得好過無。

輕手輕腳咁行去手術室門前，嗰兩隻喪屍真係無留意到我，睇黎個女仔無呃我。但係我發現，個女仔無跟住我黎，而係企係原地無郁過。 

我用眼神示意問佢做咩唔一齊行動，佢聳一聳肩，無理到我。

因為佢係我醒翻見到嘅第一個活人，我就理所當然咁當作佢係同伴，諗諗下我連佢係咪好人都唔知就信左佢，如果啲喪屍其實係睇到野，我分分鐘已經比佢害死左。 

既然佢無跟黎，咁我一陣攞到啲咩刀呀較剪呀，都唔洗預佢啦。 





我小心翼翼咁推開手術室嘅門，無發出任何聲音，但係一推開門，竟然同一隻喪屍對上眼。我淨係掛住唔好嘈到走廊嗰兩隻，完全無諗到手術室入面竟然有一隻正對大門嘅喪屍！ 

呢隻喪屍著住手術袍，暫時叫佢醫生喪屍先。醫生喪屍係我開門之後就即刻撲向我，我已經即刻用手想擋住，仍然比佢一野推倒落地下。訓係地上面，即使我用盡全力推開佢膊頭，但呢隻醫生喪屍明顯比我之前係病房制服嗰隻喪屍大力，我出盡力都只係阻止到佢伸個頭埋黎咬我，但無辦法完全推開佢。而頭先被推跌落地嗰下聲響，更加引起左嗰兩隻走廊喪屍嘅注意，同醫生喪屍僵持緊嘅時候，我見到佢哋都衝緊過黎。 

今次死啦。 

砰！ 

頭先個女仔無走到，反而拎住唔知邊度黎嘅滅火筒，一野打落其中一隻走廊喪屍後腦。走廊喪屍比佢趴左係地下，個女仔即刻跳上隻喪屍嘅身上面，踩住隻喪屍，隻喪屍就郁唔到。再將個滅火筒揈向淨低嗰隻走廊喪屍，另一隻喪屍都比佢打低埋。 





兩隻走廊喪屍，一隻係佢腳下，一隻未爬翻起身，而我身上嘅醫生喪屍，好似比佢哋打鬥嘅聲音搞到分心，衝向我嘅力量竟然減輕左少少，趁呢個時候，我用上我最大嘅爆發力一野推開左醫生喪屍，係醫生喪屍爬起身之前，個女仔已經捉住我隻手帶我跑翻去樓梯口。 

個女仔仲記得閂翻樓梯道防火門，好彩喪屍係唔識開門，佢哋就算爬翻起身，都只能夠不斷拍門，追唔上我地。 

而個女仔拖住我一路跑左幾層樓梯，去到一樓先停低。雖然頭先佢救我嗰陣好英勇，不過跑左幾層樓梯，佢已經索曬氣，仲以為佢好好打先會出黎救我⋯⋯