第二日,我仍然陶醉於琴日嗰一吻,搞到我完全冇辦法專注喺溫書上。其實我仲未搞清楚小倩嗰一吻究竟係咩意思。不過都係UT完先問啦,而家一定要專心測完個UT先。
今日我都照常喺7點半等小倩,等咗十分鐘,佢都仲未出現。因為佢之前冇試過遲到,所以一開始我仲以為佢今日唔等我 。點知,佢喺7點9先到。一見到佢,我覺得佢個樣好似有啲唔同咗,佢行到埋嚟,我先留意到佢原來化咗個淡妝。佢平時素顏已經好似天仙下凡,而家更加唔使講啦!
「咦?你點解化咗妝㗎?」
「唔得咩?行啦,就嚟夠鐘啦。」
佢一講完就拖住我就手跑返學校。唉!佢咁做就預咗俾人望住㗎啦。果然,班狗公一路鄙視我。睇嚟今個學期我都冇得好過㗎啦。
一返到學校,中子就即刻行過嚟問我
「喂!你真係溝到小倩?」
「唔係呀!我冇主動溝佢㗎,係佢自己無啦啦拖住我隻手㗎!」
「嘩!呢個籍口都俾你吹到出嚟,你好嘢。溫書啦,仲溝女。」
「喂!聽我解釋...」


中子冇理到我就走咗。
我心諗:今次真係跳落黃河都洗唔清...

「測驗時間完畢,請停筆。」
話咁快就測完一科,好彩夠時間做。

本來諗住執嘢走人,點知...
「另外,黃浩銘同葉倩晴,請到7樓教員室,梁欣榮老師有事搵你哋,其他同學可以離開。」

我同小倩對望咗一眼,我同佢都唔知發生咩事,唯有上教員室失知咩事。我同小倩一齊行上七樓,佢都收斂咗好多,冇再拖住我隻手,睇嚟佢有啲淆底,可能係因為梁sir係全挍出哂名惡嘅老師。



一上到7樓,梁sir即刻叫我哋過去,然後佢俾咗張相我哋睇
「你哋點解釋?」
嗰張相影到小倩錫咗我一啖...

(待續...)
已有 0 人追稿