那一天，有女仔嚟咗男校讀書: 第十三章:隱瞞(第二節)

時間嚟到三月中，陸運會即將舉行。
避完一輪風頭，我同小倩終於再次一齊返學放學，我終於可以脫離冇小倩倍同嘅日子。呢幾個星期我真係好似喺地獄咁，淨係可以每晚煲電話粥先聽到佢把聲，喺學校完全係零交流。
但係自從三月頭開始，我覺得小倩開始比較冷漠咁對待我，唔似以前咁熱情。唔通，我哋嘅熱戀期已過?
今日係陸通會正日，我同小倩都冇報名參加，所以可以喺看台上偷偷地打情罵俏。
正當放飯嘅時候，我本來諗住同小倩「撐檯腳」，點知中子竟然過嚟話想同我哋兩個一齊食飯，咁就多咗個電燈膽，破壞哂啲氣氛。
結果就係我哋三個人去咗打邊爐，中子仲話佢請。
我心諗:有冇搞錯，做電燈膽仲要請食飯，咁我咪好冇面?但係爭俾錢又唔係咁好。
「我俾啦!」我提議
「唔使啦，我同你哋兩個咁熟。」中子回應
你哋兩個?唔通，小倩同中子有不可告人嘅關係?回想返過去幾個月，小倩同中子的確唔似兩個啱啱相識嘅人。我下定決心，一陣一定要問清楚。




打完邊爐之後，我呃小倩話我同中子有啲嘢做，叫佢返去運動場先。洗開咗小倩之後，我拉咗中子去一個比較少人嘅地方。
「喂!講!你同小倩係咩關係?」我質問中子
「咪朋友囉!」
「你哋嘅關係唔止咁簡單喎!」我用手抓住佢衫領
「得，我講，你鬆手先」我慢慢放開手
「我同小倩係青梅竹馬」中子娓娓道來:「我哋幼稚園嘅時候已經識，由細玩到大。我好鍾意小倩㗎。」
原來，中子同小倩係咁嘅關係。我如同聽到惡耗一樣，但正因為佢哋有咁樣嘅關係，所以我絕對唔可以俾中子知道我同小倩拍緊拖。

(待續...)