農曆新年假期過去,呢個假期我幾乎每一日都同小倩約出嚟,呢段日子絕對充實過每日都喺屋企打機嘅假期。
一返到學校,中子已經到咗課室。
「喂!做咩呢排成日咁遲覆WhatsApp?」
「冇嘢,掛住打機啫!」
「真係?」
「係呀!」
「係咪溝到女呀?」死喇,中子好似唔信我
「唔係呀!」
「介紹嚟識下啦!」
「都話冇囉,唔好再問喇!」


「哎,有女唔理我喇!」
「你都痴線,唔得閒睬你。」
「有女就認啦,我唔會爆出去喎!」
「冇呀!」
「暫時放過你先,下次我見到你拍拖你就死!」
中子終於放過我,真係死纏爛打。
小倩過咗一陣就返咗嚟,我偷偷地同佢講咗頭先發生咩事,佢同我講叫我小心啲,雖然我守祕密唔叻,但係呢個祕密關乎於我同小倩嘅關係,所以我會盡全力守住呢個祕密。
今日放學我同小倩分開行返屋企,以免中子見到我哋一齊行。今日行返屋企嘅呢段路特別長,本來淨係得大約十分鐘嘅路程,就好似三十分鐘咁長。到呢一刻我先意識到小倩對我嚟講嘅重要性。原來,我冇咗小倩,我衹係一個淨係識打機嘅宅男。原來,愛情真係可以令一個人徹底改變,愛情為我嘅生活增添咗好多意義。
第二日中子依然纏住我,叫我介紹俾佢識,我真係差啲答咗佢:「嗰個你都識㗎!咪小倩囉!」好彩冇真係講出嚟。
自從農曆新年之後,我同小倩有成一個星期冇再一齊返學放學,真係好折磨。不過中子都冇再纏住我。



(待續...)
已有 0 人追稿