那一天，有女仔嚟咗男校讀書: 第十五章:分開

呢個暑假真係過得好開心，每日同小倩食飯行街睇戲，返到屋企就煲電話粥，基本上我哋兩個全日都痴埋一齊。因為可能，我哋都知道，將來見面嘅機會只會有減無增。嚟緊我哋將要面對揀科嘅挑戰，壓力越嚟越大，見面嘅機會更加少之又少。我諗唯一嘅見面機會就係我幫佢補數嘅時候。經過呢個暑假，我再次同中子和好如初，佢明白就最好啦!
啱啱開學，成個校園好似冇咗生氣一樣，可能因為嗰班女仔走咗，班毒男又獸性大發，粗口橫飛，又回復返平常嘅日子。
因為揀科都真係好重要，所以班毒男都轉死性咁努力溫書，我都唔可以輸蝕，為咗考到理科，我一定唔可以鬆懈。一定要同小倩考到同一科，咁大學就有機會同佢一齊讀!
雖然唔係日日都見到小倩，但起碼我知我哋係一齊奮鬥緊，加上有中子嘅陪伴，我更加有動力溫書。
每個星期五係我同小倩一個星期入面唯一見面嘅機會，我哋會約喺屋企附近嘅圖書館自修室等，之後就開始補數，我亦可以籍此溫故知新。見面嘅次數少咗，反而令我更珍惜呢段愛情，令我更珍惜小倩，令我更珍惜每一次見面嘅機會。
充實嘅生活過得特別快，我同小倩咁啱都係聽日就要考試，我認為我都準備得差唔多，唔知小倩溫成點呢?我WhatsApp佢，問下佢溫成點。佢話都溫得差唔多，準備瞓覺。我覆佢:咁好啦，聽日考試加油!

(待續...)