那一天，有女仔嚟咗男校讀書: 第十六章:暑期旅行(第五節)

我哋好快到達國立新美術館，因為之後仲有行程嘅關係，所以只有大約兩至三個鐘頭去參觀。小倩一入到嚟就好興奮，見到咁多當代出名藝術家嘅作品，小倩都幾難唔興奮。我作為一個稱職嘅男朋友，當然係陪小倩行哂成個博物館，而唔係坐喺入口等小倩行完。小倩沿途不斷同我講啲藝術品嘅鑑賞價值，雖然我唔係好聽得明，但係都叫做識多咗嘢。離開國立新美術館後，我帶小倩去咗附近嘅「驚安之殿堂」買嘢，雖然香港都有，但係喺日本買真係唔同感覺。入面有好多新奇嘢，我同小倩都行都好開心，行完都已經差唔多七點，我今日冇特登搵餐廳訂位，因為本來諗住喺驚安買嘢食飽，點知咁啱今日啲美食攤位收哂，我哋唯有喺附近搵餐廳食飯。小倩今日話唔想去太多遊客嘅地方，我同佢走遍橫街窄巷，尋訪著隱世美食，最後我哋揀咗一間「平民食堂」，入面個餐牌係全日文嘅，我哋只好動用Google翻譯。落單嘅時候，我用哂我個腦入面所有識得嘅日文先成功話到俾個侍應聽我哋想食乜。我哋嗌咗一個大嘅牛肉丼飯一齊食，加多個炸薯餅。因為客人唔算多，啲嘢食好快送到。
「嘩!個薯餅好好味喎!外脆內軟。」小倩不斷稱讚個薯餅
「個牛肉飯都好甜又多汁，啲肉汁滲入啲飯，令到啲飯好入味。」我就鍾意個牛肉飯多啲
呢一餐我哋都食得好滿足，難得食到啲好味又夠地道嘅嘢食。

(待續...)