【校園】【純愛】那天來了一位交換生: 第七十九章

我好細個嘅時候

我老豆因為工作關係

所以成日都會俾人調嚟調去

所以我哋都會跟住搬屋

因為想就返老豆返工嘅地方



咁所以其實我由細到大都無一班固定嘅朋友

淨係小學時期我已經搬過三次屋

同時三次我都轉咗唔同嘅學校

每次轉校之後

我都唔會去主動識新朋友



因為我好清楚

只要我識咗一班新朋友之後

好快我又會搬屋跟住失去佢哋

我唔想每次都要承受同朋友分別嘅痛苦

大家都知道我好重視朋友



所以每次分開我都會好唔開心

於是我就明白到一個道理

沒有得到就不會失去

我唔去識朋友

咁我之後離開咪唔會唔開心囉

由嗰陣時開始我就開始收埋自己

有其他同學覺得我係一個怪人

所以就開始蝦我



放垃圾入我書包或者將我書包所有嘢晒出來

不過我都唔緊要

因為呢個係我嘅選擇

所以我唔會怨恨

同埋我寧願而家捱一陣

我都唔想之後離開嘅時候會咁傷心

而且亦都係因為我成日俾人欺凌



所以我亦都唔會對呢個地方有任何留戀

咁我就可以更加瀟灑咁離開

我當時真係有一刻覺得自己好型

但係我冇真正意識過其實我當時係幾咁戇鳩

直到我上咗中學之後

我老豆老母就開始變成去外國公幹

咁所以屋企就無再打算搬屋

咁即係代表我係中學終於可以去識新朋友



我亦都好好彩

中一已經同文哥一班

我同佢因為踢波同好多嘅嘢所以就成為咗朋友

跟住阿軒佢哋都開始逐個逐個咁出現係我嘅生命入面

雖然我細個冇朋友

亦都冇一個開心童年

但係原來個天係會見到



佢會補償返俾我

但係而家佢哋又係唔知點解係咁疏遠我

可能關係真係會有期限

唔緊要啦

其實我都享受咗好多好開心嘅時光

因為咁

所以我都無再搵佢哋

不過 當然我有繼續同Cherry一齊啦

咁我哋又唔係分手

只係佢呢排有啲忙姐

咁我同佢都會一齊出街拍拖咁啦

Cherry：點解呢排好似見你咁頹咁嘅

我：冇呀 只係唔知點解文哥佢哋好似唔想再理我咁

Cherry：可能佢哋真係有嘢做呢

我：可能掛 但係其實我覺得應該係我唔知做錯啲咩 所以佢哋唔想理我

Cherry細細力敲我個頭一下

Cherry：傻瓜

然之後我都同佢講咗我以前發生咗啲咩事

點解我而家會咁唔開心

佢聽完之後 唔知點解已經眼濕濕咁

Cherry：點解我之前無聽你講過嘅

我：咁我唔想俾人知就梗係唔講架啦

Cherry：咁阿軒佢哋知唔知架

我：我一直以來都無同人提過呢件事 我老豆老母都唔知

Cherry之後就無再出聲 好似喺度諗緊嘢咁