「呃......?明顯冇。」我對佢突如其來嘅問題感到愕然。
顧曉峰又問:「咁你呢?你中唔中意佢先?」
「......唔中意。」
佢嘴角向上揚,滿意咁講:「咁就得啦。」
「你咁講係咩意思?」我皺住眉頭,好奇咁問佢。
「你唔洗知。」佢冇回應我嘅問題。
我望住顧曉峰嘅時候,睄到佢右邊隔一條走廊嘅歐諾宏面阻阻咁望住我地傾計,我避開佢嘅時線,望住自己枱面。





去到午飯嘅時候,我同張欣欣落去小食部諗住買嘢食,點知顧曉峰坐左喺一張枱,隔離有碗魚蛋撈麵同一樽檸檬茶,揮住手同我講:「買左嘢食比你啦!」佢望到張欣欣同我一齊,又好似醒起啲嘢咁對住我地講:「係喎,仲有你個friend,等我一陣,我買多個餐。」轉頭就跑左去小食部。



張欣欣用手撞左吓我隻手,細細聲問:「喂,顧曉峰做咩突然間對你咁好,唔通佢又霖你?」
「我都唔知點解佢突然間對我咁好,不過一定唔係霖我囉,同佢都冇交情,點會突然霖我。」
顧曉峰買左個lunch返嚟,我即刻問佢:「做咩失驚無神買lunch比我地?」
顧曉峰烘埋嚟我塊面前面,陰陰嘴笑咁講:「因為我想溝你囉。」講完望住我露出個任何女仔都會覺得sweet嘅笑容,一路行走一路講:「Enjoy your lunch!」





佢......有冇病?



「頂頂頂頂頂!!!我有冇聽錯???吳雪晴你唔聲唔聲溝仔原來咁叻!!!」張欣欣好似個癲婆咁周圍fing,捉住我隻手喺度跳嚟跳去。而我,就呆左喺度,唔知點算。



佢真係中意我咩?我唔想自己再相信佢地嘅說話。佢只係第二個歐諾宏,當我公仔咁玩,中意就聊吓佢,玩厭左就搵另一個。





我將顧曉峰買嗰兩份午餐送左比其他同學食,自己再買過。張欣欣係咁問我點解,我每次都答佢:「只係假象。」



/


話咁快到左十二月一號,係學校旅行日。我地分別出發,九點鐘喺中環碼頭出發,坐船去長洲。所有人到齊之後,我地就上左船,買嘅飛係普通位,即係底嗰層。我同張欣欣行喺條隊嘅最後,行入去之後周圍望都唔見有位,喺我地諗住行前之際,有兩個人同時企左起身向住我地揮手大嗌「呢度有位!」



就係歐諾宏同顧曉峰。佢地兩個隔離都有一個位空左,而全架船剩返嗰兩個位,至弊我兩個位都唔想坐。




我望住佢地,嘆左聲氣,顧曉峰見我仲猶疑緊,即刻行出嚟拉住我返埋佢個位。張欣欣已經feel到好尷尬,唯有硬住頭皮行去歐諾宏個位到問:「咳咳......你唔介意我坐㗎可?」歐諾宏無計可施,唔應承仲有咩辦法。



坐船嗰陣,我一句聲都冇出,靜靜地望住出面個海,任由自己嘅長髮飄嚟飄去,聞住清新嘅海風,享受搭船嗰種新鮮嘅感覺。



顧曉峰喺我沉醉緊喺海景嘅時候打斷左我:「睇緊咩?」
「海景囉。」
「睇緊風景嘅你好靚。」
我估到呢啲係佢聊女嘅慣常招數,雖然我嘅理智上係清楚,但係我嘅情感上都會有啲心動。當然啦,呢種心動係人之常情嗰隻,唔代表我中意佢。