經過一個鐘頭嘅搭船時間,我地終於到左長洲。落船嘅時候,啲人喺一個搖吓搖吓嘅甲板上面迫嚟迫去,有個中年大叔喺人群之中左穿右插,迫到埋嚟嘅時候成個人撞埋落我度,我失去平衡向右跌,隔離嘅顧曉峰即刻用左手攬住我條腰,右手捉住我隻手,我成個身就咁挨左喺佢嘅懷抱入面,動彈不得。

「Wow~英雄救美喎~」楊麗雅唔知幾時企左喺我地後面,望住我地嘅背影講。我擰去後面,見到陳詩婷同歐諾宏都企左喺度,歐諾宏對眼好似有兩舊火咁,睥住顧曉峰,而顧曉峰露出左好似勝利者咁樣嘅微笑。

成日話女人心海底針,其實男人都唔好得去邊。佢地嘅心諗緊咩,我根本無辦法摸索。

我回過神之後即刻企正個人行走,去出口會合班同學。屙屎玲攞住個老土嘅大聲公喺度講:「各位同學,我地終於嚟到長洲啦!」「woohooooooooo!」我地好合作咁比啲歡呼聲佢。「我地會直接去沙灘進行活動同食lunch,大家幫手攞嗰啲用袋裝住嘅沙灘用品,出發去沙灘!」

當我望到地下嗰啲袋嗰陣,就順手抽起左兩袋幫手拎,左手一袋,右手一袋。歐諾宏突然喺我嘅右手攞走左個袋:「女仔唔洗攞重嘢,我幫你拎。」我都未望過去佢到,左手個袋又突然從我隻手比人抽走左,今次係顧曉峰:「下次唔準再攞,我心痛你。」



究竟佢地兩個有咩問題?點解咁中意玩我?我喺佢地嗰度攞返嗰兩個袋,嬲嬲地咁講:「多謝關心,我自己攞返得啦。」於是行去前面搵返張欣欣一齊行。

去到沙灘,我地擺低左自己嘅行裝,去更衣室換件短袖衫同短褲,方便一陣間玩。林展博動議玩閃避球,啲同學拍晒手話好,於是我地就開始分組。屙屎玲呢個裁判開始指揮:「簡單啲啦,單數嘅我左邊,雙數嘅企我右邊!」我地班有32個人,絕對夠平均分。我13號,行去屙屎玲左邊。企定左之後,我見到歐諾宏慢慢咁行過嚟呢邊...係喎,佢21號,都係單數,真係黑仔。好彩顧曉峰去左另一組,如果唔係我直接退出算。

屙屎玲唔知喺邊度搵左個哨子,大大聲吹左聲雞:「咇!」比賽開始。老實講,我啲反應又唔敏捷,跑步又唔快,預左好快比人淘汰。第一局由對面發球,顧曉峰攞住個波,來勢洶洶咁向住中間助跑,對準我隔離嘅歐諾宏攻擊。歐諾宏運動底子好好,又點會咁易比佢一下就揼中?只見歐諾宏個人郁都唔郁,避都唔避,用兩隻手穩妥咁捉住左個波。佢將個波拋左比我地隊隻鬼,我地隻鬼攻擊唔中,比對面隊攞左個波。今次攻擊嗰個係陳詩婷,佢對眼鎖定左我,望住我心口攻擊。當個波高速咁飛緊過嚟,我又知自己避唔到,只可以任人魚肉嗰陣,歐諾宏喺隔離衝出嚟,喺我前面接住左個波。我嚇左一嚇,o住嘴咁望住佢,佢擺出個好自信嘅笑容對左我講:「只要你喺我嘅視線範圍之內,你都會好安全。」

頂,點解又要令我心動???正一賤男!!!

而陳詩婷見到呢一幕,嬲到咬牙切齒,成個比賽淨係係咁攻擊我一個。就係咁,成個比賽歐諾宏就係係咁幫我接波、攻擊,佢每次都成功幫我避左個波,而佢每次快、狠、準嘅攻擊都成功淘汰到對手,話咁快個場上面淨返我、歐諾宏同對面隊嘅顧曉峰。



顧曉峰用調戲嘅語調對住我講:「雪晴你做咩仲未out㗎!你叫我點捨得攻擊你?」其他人聽到佢呢番咁暖昧嘅說話,紛紛喺度起哄:「woooooo~~~」「勁揪喎吳雪晴~~~」我翻左眼白眼。

趁我地嘅注意力轉移左喺其他地方嘅時候,顧曉峰趁機將個波快速咁揼過嚟,我一唔留神,個波已經揼中左我隻腳。

「喂,你唔好再估惑啲?」歐諾宏對顧曉峰嘅偷襲感到非常不滿,扯晒火咁對住佢鬧。
「男子漢大丈夫,雪晴走左我地先可以正面對決㗎嘛係咪?」顧曉峰好臭寸咁講。
「對就對。」

佢地兩個都唔係人感品,一出招就氣勢洶洶,好似想置對方於死地咁。有好幾次,歐諾宏都差啲比顧宏峰揼中,好彩佢身手敏捷,輕輕一避就避過左。互相攻擊左十幾輪,歐諾宏終於成功擊中顧曉峰。經過一輪消耗體力嘅激戰,佢地大家都攰到坐左喺一下,歐諾宏一路喘氣,一路得意洋洋咁望住我笑。



雖然我好唔想承認,但一路流緊汗一路笑嘅佢,真係好charm。

可惡嘅閃避球......