社際比賽嘅第二日,我如常放學返到屋企沖完涼做功課。八點幾食完飯洗完碗之後我返房溫書嗰陣,手機突然震左吓,我諗住較靜音嗰陣見到whatsapp有一則新訊息,聯絡人個名係......顧曉峰?!我打開whatsapp見到佢寫:「Hi,我喺你屋企樓下,落一落嚟得唔得?我有嘢同你講。」



我個心震左吓。佢點知我住邊?更重要嘅係,佢咁夜搵我想同我講咩?



正當我猶疑緊落唔落嘅時候佢又send左個message嚟:「好快㗎咋,唔阻你咁耐。」





既然佢咁講,我就即管落去睇吓佢講咩。安頓完阿妹乖乖哋做功課之後,我就換左套t-shirt踢拖落街。



落到去樓下出左大門,我就見到顧曉峰着住一套運動服裝,攞住枝水同手機,大汗淋漓咁等緊我。
我行過去佢到問:「Sor,你係咪等左好耐?」
「唔耐,我都係啱啱跑步跑到過嚟姐。」
「哦,原來你跑緊步......」我窒左吓,又問:「你......想同我講咩?」


佢望住我對眼,表情好真摰咁講:「表白。」



WHAT...THE HELL?我個腦停頓左。



「吳雪晴,本身我追你只係為左激歐諾宏......」佢停左一陣,之後又繼續講:「其實我自己都唔知係幾時中意左你,或者係你喺船上睇緊海景嗰陣,或者係你喺海邊玩到忘晒形嗰個可愛嘅樣,或者係你平時上堂專心聽書嗰個樣......總之,我就係中意左你。」





我比佢突如其來嘅表白嚇親,個口一邊震一路講:「咪......咪玩啦。我又唔係你中意嗰啲類型......」
「嗯,你的確唔係。你又矮、又冇長腿、個樣又唔係特別靚,但係你係第一個真正吸引到我嘅人,我係真心㗎。所以,希望你可以做我嘅女朋友。」



雖然第一次比人表白係好心動,但係我喺心入面不斷同自己講,心動同中意一個人嘅感覺係完全唔同。而我中意緊嘅人,係歐諾宏。



「對......對唔住我......唔可以應承。」我已經唔敢直視佢。
「點解?因為歐諾宏?」
我冇出聲。
「即係係啦。我唔明,我有邊度比唔上佢?」


「呢啲嘢邊有得比較......」



點知,顧曉峰攬住我講:「我保證,如果你做我女朋友,你會比中意歐諾宏過得更幸福快樂。」



雖然我唔知拍拖係點嘅滋味,但係我覺得同一個人一齊,最重要嘅係互相中意對方,我都好想咁。唔知歐諾宏係咪中意我、抑或係我單戀緊佢都好,我都想自己有一段坦誠、真實嘅感情。所以,我推開左顧曉峰,同佢講:「對唔住,我真係冇辦法接受你嘅表白......多謝你對我嘅感情,希望你之後會遇上一個比我更加好嘅女仔......」我講完即刻頭都不回地跑返入去我住嗰座返屋企。



入到屋企,鎖門,我即刻四肢乏力咁攤左喺沙發。我頭先究竟經歷左啲咩?呀呀呀真係就嚟發癲......!!!不過我相信,自己決斷咁拒絕佢係啱嘅,如果我猶疑,應該只會比更多虛假嘅希望佢,拖住佢,我自己又唔安樂,還不如痛痛快快咁解決。





諗到呢度,我終於鬆一口氣。不過究竟聽日返學要點面對佢?唔理啦,順其自然,而家我需要嘅係安靜嘅時間,比我整頓思緒。



/

第二朝我返到學校,課室有成堆人聚埋左一齊吵吵鬧鬧,唔知做緊啲咩。我迫入佢地之間八掛緊發生咩事嗰陣,發現原來當事人係顧曉峰同歐諾宏。只見歐諾宏件純白校服有一大攤咖啡漬,隔離嘅陳詩婷喺度遞紙巾比佢抹。



「你憑咩話我特登倒瀉杯咖啡落你到啊吓?我唔小心姐,你唔係咁小氣喺度追究吓話?」顧曉峰對住歐諾宏好輕挑咁講。





隔離嘅楊麗雅即刻幫歐諾宏反擊:「你亂講!我兩隻眼清清楚楚咁望到你特登倒落諾宏到!」



唔係又關我事吓話......