那一天我成為了練習男友: 【I】宿命
「歡迎光臨萬食屋。」沒錯，萬食屋就係我打工嘅地方。
樓面有我，阿威，同阿琪。
至於廚房個班人我暫時仲未熟，淨係識阿政一個，主要都係因為我哋嘅年齡比較相近。
但大家都真係對我好好，一開始入嚟搞彎曬啲嘢都無十萬隻字屌鳩我，諗番自己個蝦碌樣都有d想笑添。
呢到係教左我好多野嘅地方，所以我一直好感激佢地，尤其係店長，時刻都會包容我。
然而呢到 Part Time 份糧有萬五雖然已經係相當高，但事實係唔夠還債，所以只能多加努力…
每日放學就只有半個鐘時間去休息，五點就要準時開工，直踩到九點，實在少癫。九點就返屋企食飯沖涼做功課，基本上十二點後訓係例行公事。
一星期返五日，放星期五同星期日，而呢段時間都可能會約下 friend 玩嘅，但洗費就真係唔可以咁多。
咁樣 chur 真係同做牛冇分別，沒錯，香港人就係咁，奴才咁款。
「希神，辛苦曬啦今日，呢到係今個月份糧。」係店長把聲。
「唔該曬店長，你都辛苦啦。」
店長年不過三十，講真幾靚女都唔知點解仲係單身，明明咁好人。
「我走先啦。」，說罷我已經推開門走左出去。
「等埋！可唔可以一齊走？比多少少時間我。」
叫停我嘅係做收銀嘅阿惠，全名王文惠，係同我同齡嘅女同事，無記錯嘅話佢讀緊果間學校同我果間好似就係左近。
我同佢接觸都算係比較多嘅，不過只係工作上，我要負責指導會咁解姐。
私人嘢就甚少。
「好啊，反正又順路。」等一下亦無妨。
五分鐘後已經搞掂，出發去火車站。
「最近幾好嗎？黎左三個月慣唔慣？」佢算係新黎嘅，仲遲過我四個月。
「都可以啊，你呢，升中五好忙喎…」阿惠回答。
「都叫應付到嘅…同埋我想問...」
「係！咩事！」佢呢句大聲到有啲嚇襯我添。
「我塊面痴左啲咩野？做乜你係咁望我？」我表示疑惑。
「冇嘢冇嘢，真係冇嘢，啱啱發下呆姐。」
「冇嘢就好，行啦。」黑人問號des。
之後一路行都無乜講嘢，氣氛有啲尷尬。
承接著呢個尷尬氣氛，我哋好快行到去火車站。
「你走先啦，我今日踩單車返屋企，聽日見。」唔止今日，其實係日日。
「拜拜。」
就係咁我哋兵分兩路，各自歸家。
要攰死了，日日咁粗法真係搞唔掂，返學又成日恰眼瞓，都聽唔入耳嘅，小灰。
「凌希神，又瞓覺，上我堂都夠膽訓覺？罰企二十分鐘，殺無赦。」係中文老師大肥婆呀qaq
諗返起都覺得好那辛酸...
每日咁樣比人罰企，真係會有陰影架。
拿拿聲返屋企早啲訓覺好過。
噉樣踩返去都係25分鐘左右姐，好快返到去啦。
吹住夜晚嘅涼風，感覺只有呢二十幾分鐘係可以放鬆一下嘅，平時真係連休息嘅時間都無。
同我架愛車相處嘅時間才是最好的，畢竟架車我用咗大半份糧呢都去買，我同佢簡直係情同手足。
我對佢甚至好過對我班兄弟，整傷佢我連兄弟都唔會放過。
無論返學返工定去玩我大部份時間都會踩單車而唔搭mtr係為咗慳番啲車費，反正又住得唔遠，慳埋慳埋都幾百一個月，已經賺番啲車費啦。
「偷嘢呀！」忽然間有位女士大叫。
個小偷迎面而來，我即刻停車，等待佢嘅到來。
「前面果個，唔好阻住我,打7你架。」
鬼會驚你咩。
我一個轉身飛踢，直接ko佢，簡單直接，話晒以前參加學校興趣班都學過下防身術。
「小姐，比番個袋你，下次小心啲啦。」我都覺得自己幾型。
佢送咗一盒朱古力以作謝禮，嘩正，係靚嘢，Godiva！
返屋企同阿媽開心share先。
至於個小偷就等佢哋自己處理，始終係人哋私事，唔方便插手。
我繼續沿著河流踩返屋企...
「我返黎啦。」
「返嚟啦？過嚟坐低食飯啦。」係阿媽把聲。
今日嘅餸係叉燒炒蛋，很吸引的樣子。
咬咗一啖，果然係我阿媽，真係好好食。
「返學點呀呢排？」阿媽問。
「啱啱上中五都可以，無咩特別難，認真啲就ok。」
「加油啦。」
「話時話阿媽，今日我路見不平守望相助，結果收到一盒能朱古力，送畀你呀，返工辛苦啦。」
「不愧係我嘅乖仔呀哈哈，」
我擺左盒朱古力上台當飯後甜品。
人哋送嘅嘢食落都好味啲啦。
食飽之後，我就負責洗碗，真係一個乖仔...講笑。
而家諗返由上年開始我嘅生活就係咁過，打工返學，無其他嘢，唔買名牌，唔會周圍去玩，因為我所過嘅生活離不開還錢二字。
係辛苦架啦，但又有乜計呀，有得快啲清咗佢嘅話，我又點會唔想吖。。。
有得揀，我都唔想成世人冇出色。
「好撚熱呀，又唔開得冷氣，費事嘥電費，太貴啦。」
於是我又成晚喺度諗啲戇鳩嘢加埋自言自語，就訓著咗。。。
一覺瞓醒又天光，好似唔係幾夠訓添。
但又要返學都無計，接受現實啦哈利。
刷牙換衫之後，我係廚房攞咗個菠蘿包同埋一罐咖啡就踩著單車出咗門口了。
我連搭火車嘅車費都唔想洗，一架單車可以捱過十年，咁樣其實最後可以慳番唔少。
一路踩一路望住沿途嘅美景，日日咁樣都唔錯呀，係隻腳會攰啲姐。
「凌希神！又唔攝衫！喂咪走呀，記過呀！」
「采你都傻，白痴仔。」
係學校門口守著嘅係head prefect之一嘅梁一，我因為多次犯小過比佢發現，因而佢開始係咁針對我。
「阿一，追我呀笨。」
佢已經放棄咗我，直接收皮。
「日日都咁好比我撚，正傻一來嘅。」
冇錯，我一早就會返到學校，最主要都係要搵個靚位拍好我架愛車，加埋可以早啲返去處理（抄）埋未做完嘅功課，順便可以撚下阿一，然後有時間淨嘅話就爭取時間休息。
起手一揮，我以飛快嘅速度炒咗學霸過份功課，too easy。
「早晨呀希神。」叫我嘅係我學校嘅同班同學陳維基，算得上係好friend嘅其中一個。
「早晨喎基爺，乜今日咁早呀，平時應該20分鐘之後先見到你架。」
咁早見到佢簡直係奇蹟，嚇親人。
「唔好咁執著係呢啲細節位啦，反正都係搭的士返學，冇乜所謂啦。」
冇錯，有錢仔嚟嘅。
我地學校有錢嘅人係特別多架啦，始終直資學校，當然，我係除外嘅。
我唔攞學費全免資助就想入嚟？冇得傾啦。
不過我對某啲有錢仔冇乜好感，感覺上佢哋就係恃住自己有錢就周圍搞事，當然阿基吾係屬於果一派嘅，如果吾係我都唔會同佢做到兄弟。
我哋窮人永遠都會係呢間學校收到歧視，已經吾係啲咩新鮮事。
呢個就係醜陋社會地位機制，見高就拜，見低？一個字，踩。
好似我咁，就算讀到書，都上唔到啲所謂嘅精英班，因為上精英班係要有兩個條件。
一，要讀書叻。
二，要捐錢比學校。
第二個好明顯係我達成唔到嘅。
所以叻都冇用，緊何況我而家仲開始有退步嘅跡象。
「其實個重點係今日會有個女插班生入我哋班，所以我咪早啲返嚟期待下囉。」阿基將我哋返嚟現實。
平時小測又唔見你咁q準時。。。死咸濕仔。
好明顯，阿基係成績差個堆嚟嘅。
「堅定流架。」
「認真堅，trust me bro，我比咗五舊水個校長問架。」呢啲算唔算非法勾當。。。
「希望唔會失望啦。」
不過靚唔靚都唔關我事啦，因為拍過幾次拖嘅我知道，拍拖，係一個洗錢，自我毀滅嘅行為，而依家我乜都已經有，就係無錢。
所以女呢家嘢，我完全不感興趣。
對現今嘅我，現實啲講句，錢，係重要過女人。
冇錯，一定係咁。
「女插班生喎，關我春事咩，瞓個靚覺算吧啦。」
我好成功咁利用收功課之前嘅時間瞓着咗。
一瞓著就唔想起身。
「叮噹叮噹。」伴隨著學校鈴聲響起，又係一日嘅正式開始。
「唯屌你，夠鐘起身啦，你俾Miss Li屌死嘅話我真係幫你唔到呀兄弟。」阿基果然係真好兄弟。
我打咗個喊露。
「各位同學，等我嚟介紹一下我哋嘅新同學先，請入黎。」Miss Li 嘅宣報令同學們一時間起哄。
「哦係果個插班生？即管睇下。」我自言自語。
門漸漸地打開了，一名女子緩緩地走入來。
「大家好，我叫允天月，請大家多多指教。」
「Woooooooooooooooo！！！！！」
鼓掌聲佈滿整個班房，咁係正常嘅，都係靚女嚟嘅。
我就冇乜興趣啦，因為我係熱衷於單身嘅人，因此我並冇跟著起哄，亦無拍手。
趴番低先。
但漸漸我發現有啲唔妥。。。
腳步聲越來越近。
「同學，請問你知唔知我叫咩名？」佢問我。
「errrr，允畋月?」我雙目無神咁望住佢。
佢黑我面。。。
『有人唔記得我個名，你都係第一個。』佢好細聲咁講。
我諗應該得我一個聽到。。。
好大嘅壓逼感。
「你真係幾夠膽架喎，唔理我？」
「你邊度嚟咁巴閉啊。」痴撚線嘅。
我哋係係耳邊進行緊傳話，係其他人眼中可能我哋係好close，而事實係打緊交。。。
「我幾欣賞你，你知唔知你得罪嘅係允氏集團嘅大千金呢？」
「整朱古力果間大廠？」仆街啦，睇嚟真係得罪錯人。。。
她點了點頭。
「哈哈係咩，咁又點？大哂架咩？」
死啦，氣勢上已經輸哂，如果因為咁而染上啲咩麻煩令我要浪費多餘嘅時間去處理，我就會離還債越來越遠。
「見你有返咁上下能耐，都可以放過你嘅，一個要求姐。」
「講嚟聽吓？雖然我覺得我冇做錯啲乜嘢。」我淆了。
「好，咁你跟我出一出離。」佢拉咗我出班房。
所有人都好好奇究竟咩事，但Miss Li 制住咗佢哋，所以佢哋只好乖乖啲交功課。
我哋就企咗喺班房正出面，然後閂咗道門。
乜佢可以咁大牌連Miss Li 都比佢為所欲為架咩。。。就咁行出嚟？
「請講。」我而家其實已經有啲唔耐煩，但我又無計，我感覺反抗佢會發生啲唔好嘅嘢。
「我希望你，凌希神可以做允天月，即係我嘅男朋友。」
哈哈哈，我聽咗啲乜嘢
。。。
『你傻架？』